ضحی بتول
آج کے دور میں ٹیکنالوجی نے دنیا بھر میں تعلیم کے طریقوں کو مکمل طور پر بدل دیا ہے، خاص طور پر اسکول کی ابتدائی جماعتوں میں اس کا استعمال بچوں کی تعلیم میں ایک نیا موڑ لے آیا ہے۔ تعلیمی ٹیکنالوجی کی مدد سے بچے نہ صرف روایتی طریقوں سے سیکھتے ہیں بلکہ وہ جدید اور دلچسپ طریقوں سے علم حاصل کر رہے ہیں جو ان کے سیکھنے کی رفتار اور سمجھ بوجھ میں اضافہ کرتے ہیں۔ ٹیکنالوجی جیسے کمپیوٹر، ٹیبلٹس، انٹرنیٹ، اور تعلیمی ایپس بچوں کو تعلیمی مواد تک فوری رسائی فراہم کرتی ہیں۔
یہ ٹیکنالوجی بچوں کے لئےانٹر ایکٹو سیکھنے کے مواقع پیدا کرتی ہے، جہاں وہ گیمز، ویڈیوز اور دیگر تعلیمی مواد کے ذریعے نہ صرف مضامین کو سمجھتے ہیں بلکہ اپنے تخلیقی خیالات کو بھی اُجاگر کرتے ہیں۔ علاوہ ازیں ٹیکنالوجی بچوں کی مشاہدہ کرنے کی صلاحیت، مسائل حل کرنے کی مہارت، اور خود مختاری میں بھی اضافہ کرتی ہے۔
تاہم، یہ ضروری ہے کہ ٹیکنالوجی کا استعمال متوازن ہو، تاکہ بچوں کے اس کے مثبت اثرات سے بھر پور فائدہ اُٹھا سکیں۔ ٹیکنالوجی کے استعمال سےبچوں کو ایک ایسا ماحول فراہم کیا جا رہا ہے، جس سے نہ صرف ان کی تعلیمی ترقی ممکن ہو رہی ہے بلکہ ان کی ذاتی صلاحیتوں کی نشوونما بھی ہو رہی ہے۔
ٹیکنالوجی کے استعمال کے فوائد :
اسکول کی ابتدائی جماعتوں میں ٹیکنالوجی کے استعمال سے بچوں کی سیکھنے کی رفتار میں اضافہ ہوتا ہے۔ ویڈیوز، انٹرایکٹو گیمز اور آن لائن لرننگ پلیٹ فارم بچوں کو اس انداز میں سکھاتے ہیں جو ان کے لئے دلچسپی پیدا کرتا ہے۔ ٹیکنالوجی بچوں کی تخلیقی صلاحیتوں کو بھی اجاگر کرتی ہے۔ان سرگرمیوں کے ذریعے بچے اپنی سوچ کو منطقی اور منظم طریقے سے پیش کرنا سیکھتے ہیں۔
اسکول کی ابتدائی جماعتوں میں ٹیکنالوجی کا استعمال نہ کیا جائے تو بچوں کی بہت سی اہم صلاحتیں اُجاگر نہیں ہو پاتی۔ بچوں کا تخلیقی اظہار محدود ہو جاتا ہے، کیوں کہ وہ صرف کتابوں اور روایتی طریقوں پر انحصار کرتے ہیں۔ انٹرنیٹ اور ڈیجیٹل مواد کی کمی بچوں کو عالمی سطح پرہونے والی نئی تبدیلیوں سے آگاہ نہیں ہونے دیتی۔
ٹیکنالوجی کے نہ استعمال کی وجہ سے بچے روایتی تعلیم کے دائرے میں محصور رہ جاتے ہیں، جس سے ان کی تجزیاتی اور تحقیق صلاحیتوں کا صحیح استعمال نہیں ہو پاتا۔ اسکول کی ابتدائی جماعتوں میں ٹیکنالوجی کا غیر استعمال ان کی ترقی میں رکاوٹ بن سکتا ہے۔ اس لیے ضروری ہے کہ تعلیمی ادارے بچوں کے لئے ایک ایسا توازن قائم کریں جہاں ٹیکنالوجی کے فوائد سے استفادہ بھی ہو اور روایتی تعلیم کی اہمیت بھی قائم رہے۔
