جموں //اسرائیل کے اعلیٰ فوجی کمانڈر کی قیادت میں ایک وفد نے منگل کو ادھم پور میں قائم فوج کی شمالی کمان کا دورہ کرکے سینئر فوجی افسران کے ساتھ تبادلہ خیال کیا۔اسرائیلی کمانڈر کے ہمراہ ان کی اہلیہ کے علاوہ نئی دلی میں قائم اسرائیلی سفارتخانے کے سینئر اہلکار بھی تھے۔ معلوم ہوا ہے کہ اسرائیلی فوج میں ’’گرائونڈ فورسز کمانڈ‘‘ کے سربراہ میجر جنرل یاکو(کوبی) براک کی قیادت میں ایک وفد منگل کی صبح جموں پہنچ گیا اور ادھم پور میں فوج کی شمالی کمان کا تفصیلی دورہ کیا۔ اسرائیلی فوجی کمانڈر نے شمالی کمان میں تعینات فوج کے سینئر اور اعلیٰ اہلکاروں کے ساتھ بات چیت کی۔ مہمان میجر جنرل نے شمالی کمان کے جنرل آفیسر کمانڈنگ اِن چیف لیفٹنٹ جنرل دیوراج انبو سے ملاقات کی جس دوران مشترکہ دلچسپی کے معاملات پر خیالات کا تبادلہ کیا گیا۔اس سلسلے میںفوج کی طرف سے جاری کئے گئے ایک بیان میں کہا گیا کہ اسرائیلی وفد نے بھارت کے ساتھ دو طرفہ تعلقات کے حوالے سے اشتراک کو فروغ دینے پر مکمل اطمینان کا اظہار کیا۔بیان کے مطابق اسرائیلی فوج کے میجر جنرل کی اہلیہ اوریٹ براک نے لیفٹنٹ جنرل دیو راج انبو کی اہلیہ اورآرمی وائیوز ویلفیئر ایسو سی ایشن کی علاقائی صدر گوری انبو کے ہمراہ ادھم پور میں آشا اسکول کا دورہ بھی کیا۔ اسرائیلی فوج سے وابستہ سینئر افسران ماضی میں بھی بھارت بالخصوص جموں کشمیر کے دوروں پر آتے رہے ہیں جس دوران وہ خاص طور پر جنگجو مخالف حکمت عملی کے بارے میں مقامی فوجی کمانڈروں کے ساتھ تبادلہ خیال کرتے ہیں۔ان دوروں کو عمومی طور صیغہ راز میں رکھا جاتا ہے ، تاہم اس بار اس بارے میں فوج کی طرف سے ایک بیان بھی جاری کیا گیا۔
اسرائیلی فوجی کمانڈر کی ریاست آمد
