یو این آئی
دمشق// شام میں اسرائیلی فوج کے فضائی حملوں میں کم از کم 16افراد ہلاک ہوگئے ۔غیر ملکی میڈیا کے مطابق اسرائیلی فوج نے وسطی شام میں فضائی حملے کیے جس کے نتیجے میں 16 افراد ہلاک اور 40 سے زائد زخمی ہوئے ہیں۔میڈیا رپورٹس میں بتایا گیا ہے کہ اتوار کو رات گئے وسطی غزہ میں متعدد دھماکے سنے گئے اور فضائی کارروائیاں دیکھنے میں آئیں جہاں طرطوس اور ہاما میں یہ حملے کیے گئے جن میں مرنے والے عام شہری ہیں۔خبر ایجنسی کے مطابق اسرائیلی فوج نے شام میں حالیہ حملوں سے متعلق میڈیا رپورٹس پر کسی بھی قسم کے تبصرے سے انکار کردیا ہے ۔مقامی اسپتال کے ڈائریکٹر کا کہنا ہے کہ ہاما کے علاقے میساف میں ہلاکتوں کی تعداد 14 ہوگئی ہے اور 43 کے قریب زخمی ہیں جن میں سے 6 کی حالت تشیوشناک ہے ۔ادھر اسرائیل کی جانب سے یہ دعویٰ کیا گیا ہے کہ جنوبی لبنان میں حزب اللہ کے ٹھکانوں پر بمباری کی گئی ہے ۔عرب میڈیا کا اس حوالے سے کہنا ہے کہ اسرائیل کی جانب سے جنوبی لبنان میں کئے گئے حملے کے نتیجے میں طبی عملے کے 3 اہلکار ہلاک ہوگئے ، جس کے بعد صورتِ حال کشیدہ ہو گئی۔عرب میڈیا کی رپورٹ کے مطابق حزب اللہ نے جوابی کارروائی کرتے ہوئے اسرائیل کے علاقے کریات شمعون کی 2 بستیوں کو نشانہ بنایا۔حزب اللہ کے مطابق اسرائیلی بستیوں پر حملہ جنوبی لبنان میں حملے کے جواب میں کیا گیا ہے ۔
