یو این آئی
غزہ//اسرائیلی فورسز کے غزہ کی پٹی میں کیے گئے تازہ ترین حملوں میں کم از کم مزید 40 فلسطینی ہلاک ہوگئے ۔غیر ملکی میڈیا رپورٹ کے مطابق ان اموات سے متعلق فلسطینی طبی اداروں نے بتایا جب کہ اسرائیل خطے میں وسیع تر ممکنہ جنگ کے لیے تیار ہے ۔طبی اداروں نے کہا کہ اسرائیل نے وسطی غزہ کے البریج کیمپ میں گھروں کو فضائی حملوں کا نشانہ بنایا جس میں 15 لوگ مارے گئے اور النصیرت کیمپ کے قریب کیے گئے حملے میں 4 افراد ہلاک ہوئے ۔بیان میں بتایا گیا اسرائیلی طیارے نے غزہ شہر کے قلب میں شمالی علاقے میں بھی ایک گھر پر بم برسائے جس میں 5 فلسطینی زندگی کی بازی ہار گئے جب کہ ایک اور جنوبی شہر خان یونس میں کیے گئے فضائی حملے میں ایک شخص ہلاک اور دیگر زخمی ہوگئے ۔علاقے کی سول ایمرجنسی سروس نے اپنے ایک بیان میں بتایا کہ جمعرات کو ہی کیے گئے غزہ شہر کے مشرق میں 2 اسکولوں پر کی گئی بمباری میں 15 فلسطینی ہلاک اور 30 زخمی ہوگئے ۔سوشل میڈیا پر زیر گردش فوٹیج میں ایک گدھا گاڑی پر زخمیوں اور میتوں کو ایک ہسپتال منتقل کرتے ہوئے دیکھا گیا۔حماس کے مسلح ونگ اور اسلامک جہاد نے کہا کہ وہ غزہ میں آپریشن کرنے والی اسرائیلی فورسز پر ٹینک شکن راکٹس اور مارٹر گولے داغ رہے تھے ، ان حملوں کے نتیجے میں اسرائیل فوج ہلاک اور زخمی ہوئے ۔اسرائیلی فوج نے کہا کہ اس نے گزشتہ 24 گھنٹے کے دوران پورے غزہ میں راکٹ داغنے والے پیڈ سمیت عسکری اہداف کو نشانہ بنایا۔غزہ کی وزارت صحت نے جمعرات کو جاری کردہ اپ ڈیٹ میں بتایا کہ گزشتہ برس 7 اکتوبر سے اب تک کم از کم 39 ہزار 699 فلسطینی ہلاک کیے جا چکے ہیں اور اسرائیل کی تباہ کن فضائی اور زمینی جنگ میں 91 ہزار 722 فلسطینی زخمی بھی ہوئے ۔
اسرائیل جنگبندی مذاکرات پر رضامند
یو این آئی
یروشلم//اسرائیل نے جمعہ کی صبح قطر، مصر اور امریکی ثالثوں کو جواب دیتے ہوئے کہا کہ وہ 15 اگست کو غزہ جنگ بندی معاہدے پر بات چیت دوبارہ شروع کرنے کے لیے ایک وفد بھیجے گا۔اسرائیلی وزیر اعظم بنجامن نتن یاہو کے دفتر نے ایک بیان میں کہا کہ مذاکراتی ٹیم کو ‘‘فریم ورک معاہدے پر عمل درآمد کے لیے تفصیلات کو حتمی شکل دینے کے لیے بھیجا جائے گا۔’’یہ اعلان تینوں ممالک کے ثالثوں کی جانب سے ایک مشترکہ بیان جاری کرنے کے بعد سامنے آیا ہے جس میں اسرائیل اور حماس سے مجوزہ معاہدے میں باقی تمام کمیوں کو ختم کرنے اور بغیر کسی تاخیر کے اس پر عمل درآمد کے لیے 15 اگست کو دوبارہ مذاکرات شروع کرنے کی اپیل کی گئی۔
روس غزہ معاہدے کو آسان بنانے کیلئے تیار: وزیر خارجہ
یو یان آئی
ماسکو//روس کے نائب وزیر خارجہ میخائل بوگدانوف نے ماسکو میں فلسطینی سفیر عبد الحفیظ نوفل کے ساتھ بات چیت میں غزہ کی پٹی میں لڑائی کے خاتمے کے لیے سیاسی اور سفارتی کوششیں جاری رکھنے کے لیے ملک کی تیاری کی تصدیق کی۔یہ اطلاع روسی وزارت خارجہ نے ایک بیان میں دی ہے ۔قبل ازیں 8 اگست کو مشرق وسطیٰ اور افریقہ کے لیے روسی صدارتی ایلچی نائب وزیر خارجہ میخائل بوگدانوف نے ان کی درخواست پر فلسطینی سفیر نوفل سے ملاقات کی۔وزارت نے کہا کہ “بات چیت کے دوران، اہم نکتہ فلسطین اسرائیل تنازعہ والے علاقے کی صورت حال پر تھا۔ “روسی فریق خونریزی کو تیزی سے ختم کرنے اور غزہ کی پٹی میں متاثرہ رہائشیوں کو ضروری انسانی امداد فراہم کرنے کے لیے سیاسی اور سفارتی کوششیں جاری رکھنے کے لیے اپنی تیاری کا اعادہ کرتا ہے ۔”بیان میں کہا گیا ہے کہ ملاقات کے دوران دونوں فریقوں نے روایتی طور پر روس-فلسطین دوستانہ تعاون کو مضبوط بنانے پر بھی تبادلہ خیال کیا۔
