یو این آئی
غزہ// اسرائیل کے غزہ میں حملے جاری ہیں، صہیونی فوج کی بمباری سے 24 گھنٹے کے دوران مزید 90 فلسطینی جاں بحق ہوگئے ۔ فلسطینی وزارت صحت نے بتایا کہ اسرائیلی فوج نے 10 روز میں اقوام متحدہ کے 8 پناہ گزین اسکولوں کو نشانہ بنایا۔اقوام متحدہ کے مطابق غزہ سے کروڑوں ٹن ملبہ صاف کرنے میں 15 سال لگیں گے ۔واضح رہے کہ 7 اکتوبر 2023 کے بعد سے اسرائیلی حملوں میںجاں بحق فلسطینیوں کی تعداد 38 ہزار 794 سے تجاوز کر چکی ہے جبکہ 89 ہزار 364 افراد زخمی ہو چکے ہیں۔ادھر اسرائیلی پارلیمنٹ میں فلسطینی ریاست کے قیام کے خلاف قرارداد منظور کرلی گئی، اسرائیلی پارلیمنٹ کینسیٹ نے فلسطینی ریاست کے قیام کو مسترد کردیا۔بین الاقوامی خبر رساں ادارے کی رپورٹ کے مطابق اسرائیلی میڈیا کا کہنا ہے کہ تاریخ میں پہلی بار اسرائیلی پارلیمنٹ نے ایسی قرارداد منظور کی ہے ۔مشرق وسطیٰ میں امن کیلئے دو ریاستی منصوبے کے خلاف اسرائیلی پارلیمنٹ میں قراردار منظور کی گئی، فلسطینی ریاست کے قیام کیخلاف 68 اراکین پارلیمنٹ نے ووٹ دیا جبکہ 9 اراکین نے قرار داد کی مخالفت کی۔اسرائیلی میڈیا کا کہنا ہے کہ قرارداد سے اسرائیلی اور عرب ممالک میں امن کیلئے سفارتی کوششوں کو نقصان پہنچنے کا اندیشہ ہے ۔دوسری جانب ترکیہ کی نیوز ویب سائٹ ٹی آر ٹی ورلڈ کی رپورٹ کے مطابق امریکا نے مقبوضہ مغربی کنارے میں فلسطینیوں کے خلاف ‘پرتشدد’ کارروائیوں کا ارتکاب کرنے والے اسرائیلیوں کے خلاف نئی ویزا پابندیوں کا اعلان کر دیا اور اسرائیل سے مطالبہ کیا ہے کہ وہ ان افراد کا احتساب کرے ۔امریکی محکمہ خارجہ کے ترجمان میتھیو ملر نے صحافیوں کو بتایا کہ افسوس ہے کہ تشدد میں اضافے کا وسیع رجحان ہم نے گزشتہ مہینوں میں دیکھا ہے اور اس کے لیے ان افراد کو جوابدہ ٹھہرانے کے لیے اسرائیل کو مزید کچھ کرنے کی ضرورت ہے ۔امریکی اقدامات کے بعد اسرائیلی امریکا میں داخل نہیں ہو سکیں گے ۔
