آن لائن فراڈ کرنے والوں کے خلاف مہم شروع

 یو این آئی

نئی دہلی// کسٹمز اور بالواسطہ ٹیکس کا سنٹرل بورڈ (سی بی سی آئی) کسٹم افسر بن کر لوگوں کو آن لائن دھوکہ دینے والوں کے خلاف عام لوگوں کو خبردار کرنے کیلئے ایک بیداری مہم چلا رہا ہے۔ایسے عناصر لوگوں سے آن لائن یا میسجز کے ذریعے رابطہ کرتے ہیں، امپورٹڈ منشیات رکھنے کی صورت میں ان کے خلاف کارروائی کی دھمکی دیتے ہیں، ان کی ذاتی معلومات لیتے ہیں اور رقم بٹورنے کے بعد غائب ہو جاتے ہیں۔بورڈ نے کہا ہے کہ ہندوستانی کسٹمز حکام پرائیویٹ اکاؤنٹس میں ڈیوٹی کی ادائیگی کیلئے کبھی بھی فون، ایس ایم ایس یا ای میل کے ذریعے عام لوگوں سے رابطہ نہیں کرتے۔اس مہم کے تحت بورڈ لوگوں کو دھوکہ بازوں کے طریقہ کار کے بارے میں آگاہ کر رہا ہے اور ان سے درخواست کر رہا ہے کہ وہ اپنی معلومات کو محفوظ رکھیں، کال کرنے والے کے ٹریک ریکارڈ کی تصدیق کریں اور چوکس رہیں اور ایسی سرگرمیوں کی اطلاع دیں۔اس مہم کے حوالے سے اتوار کو وزارت خزانہ کی جانب سے جاری ہونے والی ایک ریلیز میں کہا گیا ہے کہ دھوکہ دہی کرنے والے ہندوستانی کسٹمز کے اہلکار بن کر پورے ملک میں لوگوں کو ان کی محنت کی کمائی ٹھگنے والے مختلف نیوز پورٹلز؍سوشل میڈیا پلیٹ فارمز کے ذریعے بے نقاب ہوئے ہیں۔ یہ فراڈ بنیادی طور پر فون کالز یا ایس ایم ایس جیسے ڈیجیٹل ذرائع کا استعمال کرتے ہوئے کیے جاتے ہیں، اور اس کے پیچھے کا مقصد فوری تعزیری کارروائی کی دھمکی دے کر لوگوں سے پیسے بٹورنا ہوتا ہے۔بورڈ آگاہی مہم کے تحت اخبارات میں اشتہارات، عام لوگوں کو ایس ایم ایس؍ای میلز ، سوشل میڈیا کا استعمال کر رہا ہے۔ اس کام میں مقامی انتظامیہ اور کاروباری اداروں کی مدد بھی لی جا رہی ہے۔