چندی گڑھ// پنجاب کے 2 لوگ پیر کو ایک کشمیری شخص کی مدد کے لیے آگے آئے جس کے سیب کے ڈبے فتح گڑھ صاحب ضلع میں ٹرک الٹنے کے بعد چوری ہو گئے تھے۔
پٹیالہ کے راجویندر سنگھ اور موہالی کے گروپریت سنگھ نے جموں و کشمیر کے بارہمولہ ضلع کے سوپور کے رہنے والے شاہد کو 9.12 لاکھ روپے کا چیک دیا تاکہ اس کے نقصان کی تلافی کی جا سکے۔
بتا دیں کہ ہفتہ کو فتح گڑھ صاحب ضلع میں دہلی امرتسر ہائی وے پر پھلوں سے لدے ٹرک کے الٹ جانے کے بعد گاؤں والوں اور راہگیروں نے سیب کے 1,200 ڈبے چوری کر لیے۔ ٹرک سری نگر سے بہار جا رہا تھا۔ سیب کے ڈبے مقامی لوگو کے لے جانے کی ویڈیو وائرل ہوگئی۔
راجویندر سنگھ اور گرپریت سنگھ نے پولیس سے رابطہ کیا اور ٹرک کے مالک کو ہونے والے نقصان کی تلافی کی خواہش ظاہر کی۔
راجویندر سنگھ نے کہا کہ انہیں یقین نہیں آتا کہ کچھ لوگ حادثے کا شکار ہونے والے ٹرک ڈرائیور کی مدد کرنے کے بجائے سیب کے ڈبے چرانے میں مصروف ہیں۔
انہوں نے کہا کہ یہ انتہائی افسوسناک واقعہ تھا جو پنجاب میں پیش آیا،”ہم لوگوں کو پنجابیت کا ایک اچھا پیغام دینا چاہتے تھے”۔
راجویندر نے کہا کہ لوگوں کو ضرورت مندوں کی مدد کے لیے آگے آنا چاہیے۔
گرپریت سنگھ نے بتایا کہ ٹرک کے مالک کو 9.12 لاکھ روپے کا چیک دیا گیا۔
ٹرک کے مالک شاہد نے کہا کہ جب اس نے سیب کے ڈبے چوری ہونے کی ویڈیو دیکھی تو اسے بہت برا لگا، یقین نہیں آرہا کہ یہ پنجاب ہو گا جہاں لوگ ہر وقت مدد کے لیے آگے آتے ہیں۔
انہوں نے کہا کہ انہوں نے پنجاب میں تعلیم حاصل کی ہے اور وہ جانتے ہیں کہ یہاں کے لوگ مدد کی پیشکش کے لیے جانے جاتے ہیں۔
انہوں نے 9.12 لاکھ روپے کا چیک دینے کے لیے دونوں پنجابیوں کا شکریہ ادا کیا۔
فتح گڑھ کے سینئر سپرنٹنڈنٹ آف پولیس صاحب رجوت گریوال نے بتایا کہ سیب چوری کرنے کے سلسلے میں ایک مقدمہ درج کیا گیا ہے اور اس سلسلے میں 10 افراد کو گرفتار کیا گیا ہے۔
پنجاب کے 2 رہائشیوں نے کشمیری شخص کے سیب چوری ہونے کے بعد 9.12 لاکھ روپے ادا کیے
