عظمیٰ ویب ڈیسک

کپواڑہ// شمالی کشمیر کے کپواڑہ ضلع کے کیرن علاقے میں جمعرات کو ایک جھڑپ میں دو غیر ملکی ملی ٹینٹ مارے گئے ہیں۔
ایک عہدیدار نے بتایا کہ 18 جولائی کو تقریباً ساڑھے 12 بجے، چوکس فوجیوں نے ایل او سی پر اپنے اطراف میں گھنے پودوں کے ذریعے دو ملی ٹینٹوں کی نقل و حرکت کا مشاہدہ کیا۔ جس کے بعد دراندازوں کو چیلنج کیا گیا، جس پر انہوں نے فائرنگ شروع کر دی اور فوج نے جوابی کاروائی کی جس کے نتیجے میں شدید فائرنگ کا تبادلہ ہوا۔
عہدیدار نے بتایا، “دو سخت گیر غیر ملکی ملی ٹینٹ مارے گئے ہیں اور ساتھ ہی اسلحے، جنگی سٹورز اور ایک پاکستانی شناختی کارڈ بھی برآمد ہوا”۔
انہوں نے کہا، “یہ کامیاب انٹیلی جنس پر مبنی آپریشن فوج، بی ایس ایف اور جموں و کشمیر پولیس کے درمیان قریبی ہم آہنگی کی ایک اور مثال ہے”۔
گزشتہ چند ہفتوں کے دوران لائن آف کنٹرول پر دراندازی کے خلاف یہ تیسرا کامیاب آپریشن تھا اور یہ لائن آف کنٹرول کے تقدس کو برقرار رکھنے اور وادی کشمیر میں امن برقرار رکھنے کے لیے دراندازی کے خلاف مضبوط موقف کو برقرار رکھنے کے لیے فوج کے غیر متزلزل عزم کی نشاندہی کرتا ہے۔