عظمیٰ ویب ڈیسک

سرینگر// 8 جولائی کو اعلان کردہ 10 روزہ گرمائی تعطیلات ختم ہو چکی ہیں جس کے بعد کشمیر بھر کے سکول آج دوبارہ کھل گئے۔
سکول دوبارہ کھولنے سے قبل حکومت نے تمام اداروں کے سربراہان کو ایک جامع صفائی مہم شروع کرنے کی ہدایت دی تھی۔ حکام نے کلاس رومز، بیت الخلاﺅں، راستوں اور کھلے علاقوں کی مکمل صفائی اور دیکھ بھال کی اہمیت پر زور دیا تھا تاکہ طلباءکے لیے حفظان صحت کے ماحول کو یقینی بنایا جا سکے۔
جمعرات کی صبح خوشگوار موسم کے درمیان بچوں کو جوش و خروش کے ساتھ سکولوں کی طرف جاتے دیکھا گیا، جو اپنے ساتھی طلباءاور اساتذہ کے ساتھ مل رہے تھے۔ بہت سے طلباءنے سکول واپس آنے پر اپنی خوشی کا اظہار کیا، اپنی پڑھائی دوبارہ شروع کرنے اور کلاس روم کی سرگرمیوں میں حصہ لینے کے خواہش ظاہر کی۔
ادھر، گزشتہ کئی ہفتوں سے جاری شدید گرمی کے درمیان جمعرات کی صبح سرینگر سمیت کشمیر کے کئی علاقوں میں ہلکی بوندا باندی ہوئی، جس سے گرمی کی شدت سے قدرے راحت نصیب ہوئی۔