دہلی//جموں و کشمیر کے آخری گورنر ستیہ پال ملک نے آج کہا، ”پیپلز کانفرنس کے رہنما سجاد لون 2018 میں اسمبلی کی تحلیل سے ٹھیک پہلے جموں و کشمیر کا وزیر اعلی بننا چاہتے تھے حالانکہ ان کے پاس صرف چھ ایم ایل اے تھے“۔
۔2018 میں گورنر کے ذریعہ جموں و کشمیر اسمبلی کی تحلیل سے قبل پردے کے پیچھے کی سیاسی سرگرمیوں پر روشنی ڈالتے ہوئے، ستیہ پال ملک، جو اب میگھالیہ کے گورنر ہیں، نے سجاد لون کو مرکز کا “نیلی آنکھوں والا لڑکا” قرار دیا۔
انہوں نے کہا،” میں نے لون سے کہا تھا کہ وہ انہیں 87 رکنی ایوان میں اس حمایت کے بارے میں لکھیں۔ لون نے کہا کہ ان کے پاس چھ ایم ایل اے ہیں لیکن “مجھے بتایا کہ اگر آپ مجھے حلف دلائیں تو میں ایک ہفتے میں اپنی اکثریت ثابت کردوں گا”۔
ملک نے ان حالات کے بارے میں بات کی جن میں انہوں نے نومبر 2018 میں اسمبلی کو تحلیل کر دیا حالانکہ پی ڈی پی سربراہ محبوبہ مفتی نے کانگریس اور نیشنل کانفرنس (NC) کی حمایت سے حکومت بنانے کا دعویٰ پیش کیا تھا۔
محبوبہ کی سربراہی میں پی ڈی پی-بی جے پی حکومت اس سے قبل جون 2018 میں بی جے پی کے اتحاد سے باہر ہونے کے بعد گر گئی تھی۔
ملک نے کہا کہ انہوں نے لون سے کہا تھا، ’’یہ گورنر کا کردار نہیں ہے اور میں ایسا نہیں کروں گا۔ سپریم کورٹ مجھے پھٹکار لگائے گی۔ اگلے دن سپریم کورٹ کہے گی کہ آپ ایوان کو طلب کریں۔ تم ہار جاو گے۔ میں ایسا نہیں کروں گا‘‘۔
گورنر نے کہا کہ ایسا لگتا ہے کہ پی ڈی پی-این سی-کانگریس اتحاد کو اکثریت حاصل ہو سکتی تھی لیکن ”بے وقوفی” سے انہوں نے کوئی رسمی میٹنگ نہیں کی اور نہ ہی کوئی قرارداد منظور کی اور نہ ہی ”محبوبہ کو حمایت کا خط دیا”۔
ملک نے ایک انٹرویو میں “دی وائر” کو بتایا کہ انہوں نے اس وقت کے مرکزی وزیر خزانہ ارون جیٹلی سے صورتحال کے بارے میں بات کی تھی اور مرکز سے ہدایات مانگی تھیں۔ گورنر نے کہا کہ انہوں نے جیٹلی سے کہا تھا کہ اگر انہیں محبوبہ مفتی کا خط ملتا ہے جس میں حکومت بنانے کا دعویٰ کیا گیا ہے تو میں انہیں حلف کے لیے بلانے کا پابند ہوں۔
مرکز نے انہیں کوئی مشورہ نہیں دیا تھا اور کہا تھا کہ وہ جو مناسب سمجھے وہ کریں۔ ملک نے کہا کہ اس کے بعد انہوں نے نومبر 2018 میں اسمبلی کو تحلیل کر دیا تھا۔
محبوبہ مفتی 56 ایم ایل ایز کی حمایت کے ساتھ گورنر ہاؤس پہنچنا چاہتی تھیں جن میں کانگریس اور این سی شامل تھے، لیکن جموں میں راج بھون کی فیکس مشین خراب ہونے کی وجہ سے یہ خط نہیں پہنچایا جا سکا۔
سجاد لون صرف 6 ایم ایل اے کے ساتھ وزیر اعلی بننا چاہتے تھے: ستیہ پال ملک
