یو این آئی

نئی دہلی// کانگریس کے لیڈر اور رکن پارلیمنٹ راہول گاندھی نے اتوار کو بھارتیہ جنتا پارٹی (بی جے پی) کی قیادت والی مرکزی حکومت پر لوک سبھا اور اسمبلیوں میں خواتین ریزرویشن نافذ کرنے کے وقت پر طنز کرتے ہوئے کہا کہ خواتین ریزرویشن اور دس سالہ مردم شماری یا حد بندی کی مشق کے درمیان کوئی تعلق نظر نہیں آتا یہاں آسام کے میڈیا نیٹ ورک کے ایک پروگرام میں بات کرتے ہوئے مسٹر گاندھی نے کہا کہ خواتین ریزرویشن بل کو لوک سبھا اور اسمبلی کی 33 فیصد نشستیں خواتین کو مختص کرکے آج نافذ کیا جا سکتا ہے۔ سیاسی نظام میں خواتین کی شرکت کے معاملے پر انہوں نے کہا کہ ہندوستانی خواتین سیاسی نظام میں اس طرح حصہ نہیں لے رہی ہیں جس طرح انہیں لینا چاہیے۔

انہوں نے کہا، ’’ان (خواتین) کو سیاست میں حصہ لینے میں مدد کرنے کا سب سے بڑا کام کانگریس پارٹی نے پنچایتی راج میں 33 فیصد ریزرویشن دے کر کیا تھا۔‘‘ بی جے پی کو نشانہ بناتے ہوئے،انہوں نے کہا، “جب ہم پنچایتی راج میں خواتین کے ریزرویشن کو منظور کرنے کی کوشش کر رہے تھے، تو بی جے پی نے اس معاملے پر ہماری مخالفت کی۔ ایسی صورتحال میں یہ بات بالکل واضح ہے کہ خواتین کو بااختیار بنانے میں کون دلچسپی رکھتا ہے۔

بی جے پی پر بھٹکانے والی حکمت عملی اپنانے کا الزام لگاتے ہوئے کانگریس کے لیڈر نے کہا کہ ان کی پارٹی نے اب ماضی کے تجربات سے سیکھا ہے کہ اس سے کیسے نمٹا جائے۔ انہوں نے کہا، ’’ہم نے سیکھ لیا ہے کہ بی جے پی کے خلفشار کے ہتھکنڈوں سے کیسے نمٹا جائے۔ کرناٹک انتخابات میں ہم نے ایک واضح نقطہ نظر دیا اور اب ہم بیان پر کنٹرول رکھتے ہیں. اس سے کوئی فرق نہیں پڑتا ہے کہ وہ کچھ بھی کرنے کی کوشش کرتے ہیں، اب ہمارا بیان پر کنٹرول ہے۔

منی پور تنازعہ کے مسئلہ پر بات کرتے ہوئے کانگریس کے رکن پارلیمنٹ نے الزام لگایا کہ شمال مشرقی ریاست کی صورتحال پر مرکزی حکومت کا کوئی کنٹرول نہیں ہے۔ انہوں نے کہا کہ بی جے پی وہاں نفرت کی سیاست کر رہی ہے۔ انہوں نے ریاست منی پور کو تباہ کر دیا ہے۔ انہوں نے کہا کہ میں نے منی پور میں جو کچھ دیکھا وہ اپنی پوری زندگی میں کبھی نہیں دیکھا۔

‘انڈیا الائنس’ اور متحدہ اپوزیشن جماعتوں کے لچک کے ساتھ کام کرنے کے بارے میں بات چیت کرتے ہوئے مسٹر گاندھی نے کہا، “تمام چیلنجوں کے درمیان ہم (انڈیا الائنس) متحد ہوئے ہیں اور میں نے پہلے کبھی اپوزیشن کو اس طرح کام کرتے نہیں دیکھا۔ اتنی لچک کے ساتھ کیونکہ ہم ایک سیاسی جماعت سے لڑ رہے ہیں لیکن ہندستان کے خیال کا دفاع کر رہے ہیں، اسی لیے ہم نے اپنے اتحاد کا نام آئی این ڈی آئی اے رکھا ہے۔”