شوپیاں حملے میں ملوث جنگجوؤں کو نہیں بخشا جائے گا: منوج سنہا

سری نگر// جموں و کشمیر کے لیفٹیننٹ گورنر منوج سنہا نے شوپیاں میں اقلیتی فرقے کے دو افراد پر جنگجوؤں کے حملے کی مذمت کرتے ہوئے کہا کہ اس حملے کے ذمہ دار جنگجوؤں کو کسی بھی صورت میں نہیں بخشا جائے گا۔
انہوں نے کہا کہ سماج کے ہر فرد کو اس حملے کی پر زور مذمت کرنی چاہئے۔
موصوف لیفٹیننت گورنر نے ان باتوں کا اظہار منگل کو اپنے ایک ٹویٹ میں کیا۔
ان کا ٹویٹ میں کہنا تھا: ’شوپیاں میں عام شہریوں پر ہونے والے دہشت گردانہ حملے کے درد کو الفاظ میں بیان کرنا ممکن نہیں ہے میرے خیالات سنیل کمار کے اہلخانہ کے ساتھ ہیں‘۔
انیوں نے ٹویٹ میں مزید کہا: ’ہر فرد کو اس حملے کی پر زور مذمت کرنی چاہئے اور اس حملے کے ذمہ دار دہشت گردوں کو بخشا نہیں جائے گا‘۔
بتادیں کہ شوپیاں کے چھوٹی گام علاقے میں منگل کو جنگجوؤں کے حملے میں اقلیتی فرقے کا ایک شخص از جان جبکہ اس کا بھائی زخمی ہوگیا۔