جموں و کشمیر میں جی ایس ٹی وصولی میں ریکارڈ اضافہ

سری نگر// جموں و کشمیر میں جون 2023 کے مہینے میں جمع ہونے والی جی ایس ٹی آمدنی میں گزشتہ مالی سال کے جون ماہ کے مقابلے میں 58 فیصد کا خاطر خواہ اضافہ ریکارڈ ہوا ہے”۔
مرکزی وزارتِ خزانہ نے بتایا کہ یہ شرح نمو قومی اوسط سے تین گنا زیادہ ہے اور درمیانے اور بڑے دائرہ اختیار میں ملک میں بہترین ہے۔ جون 2023 میں جی ایس ٹی کی مجموعی آمدنی 588.68 کروڑ ہے، جو جون 2022 میں 371.83 کروڑ تھی۔
واضح رہے کہ جون 2023 کے مہینے کے لیے بھارت کی مجموعی جی ایس ٹی آمدنی 1,61,497 کروڑ رہی، جس میں سال بہ سال 12 فیصد اضافہ ہوا۔ 2017 میں جی ایس ٹی کے آغاز کے بعد سے یہ چوتھی بار ہے کہ ماہانہ مجموعی جی ایس ٹی کی وصولی 1.60 لاکھ کروڑ سے زیادہ ریکارڈ کی گئی۔
کمشنر سٹیٹ ٹیکس جموں وکشمیر، ڈاکٹر رشمی سنگھ نے ریاستی ٹیکس افسران کی کارکردگی کو سراہتے ہوئے کہا کہ وہ ماہ بہ ماہ جی ایس ٹی آمدنی میں مسلسل اضافہ کو یقینی بنانے کے لیے ان کی انتھک کوششوں کو سراہتے ہیں۔
ڈاکٹر رشمی سنگھ نے کہا کہ یہ کارکردگی جموں و کشمیر میں سٹیٹ ٹیکس آفیسر کی لگن اور محنت کو ظاہر کرتی ہے۔
انہوں نے مزید کہا کہ یہ متاثر کن ترقی جموں و کشمیر میں جی ایس ٹی کے نفاذ کی چھٹی سالگرہ کے موقع پر ہے۔ ریاستی ٹیکس محکمہ 01 جولائی سے 07 جولائی تک جی ایس ٹی ہفتہ منا رہا ہے تاکہ تمام متعلقہ فریقوں میں جی ایس ٹی کے بارے میں بیداری پیدا کی جا سکے۔