محمد تسکین
بانہال/ ڈاکٹروں کی شدید کمی کے خلاف ایک ڈرامائی احتجاج کرتے ہوئے بی جے پی رہنما محمد سلیم بھٹ نے منگل کے روز سب ڈسٹرکٹ ہسپتال (ایس ڈی ایچ) بانہال کے مرکزی دروازے کو تالا لگا دیا اور ہسپتال احاطے میں دھرنا دیا، جس کے باعث کچھ دیر کے لیے طبی خدمات متاثر ہوئیں۔
محمد سلیم بھٹ نے الزام لگایا کہ ہسپتال میں ڈاکٹروں کی شدید قلت کے باعث بانہال، رامسو اور گول سب ڈویژنز کے مریضوں کو سخت مشکلات کا سامنا ہے۔ انہوں نے کہا کہ انہوں نے بارہا ضلع انتظامیہ کے سامنے ماہر ڈاکٹروں کی خالی اسامیوں کا مسئلہ اٹھایا، مگر اب تک کوئی ٹھوس قدم نہیں اٹھایا گیا۔
انہوں نے مزید کہا کہ اس انتہائی قدم سے قبل انہوں نے ہسپتال حکام کے ذریعے چیف میڈیکل آفیسر سے رابطہ کرنے کی کوشش کی، لیکن کوئی جواب نہیں ملا۔
عملے کی کمی کو اجاگر کرتے ہوئے بٹ نے کہا کہ ایک کنسلٹنٹ گائناکالوجسٹ کو گزشتہ سال مبینہ بدعنوانی کے بعد ڈائریکٹوریٹ آف ہیلتھ سروسز جموں کے ساتھ منسلک کر دیا گیا، جبکہ تین ڈاکٹر اعلیٰ تعلیم (اسٹڈی لیو) پر ہیں۔ انہوں نے مزید کہا کہ ایک ڈاکٹر کو ضلع ہسپتال رام بن تعینات کیا گیا ہے اور ان کی جگہ کسی کو تعینات نہیں کیا گیا۔ انہوں نے نیشنل کانفرنس کی قیادت والی حکومت کو بھی عوامی مسائل حل کرنے میں ناکام قرار دیا۔
بعد ازاں پولیس اور سب ڈویژنل مجسٹریٹ بانہال محمد نصیب کی مداخلت کے بعد صورتحال پر قابو پا لیا گیا۔ ایس ڈی ایم نے یقین دہانی کرائی کہ معاملہ اعلیٰ حکام کے ساتھ اٹھایا جائے گا، جس کے بعد ہسپتال کا گیٹ کھول دیا گیا اور طبی خدمات بتدریج بحال ہو گئیں۔
ادھر ہسپتال انتظامیہ کا کہنا ہے کہ تین میڈیکل آفیسرز اس وقت پوسٹ گریجویٹ کورسز کے لیے اسٹڈی لیو پر ہیں، جبکہ ایک تربیت یافتہ سونولوجسٹ کو عارضی طور پر ضلع ہسپتال رام بن بھیجا گیا ہے جہاں ریڈیولوجسٹ رخصت پر ہیں۔
انتظامیہ کے مطابق عملے کی کمی کے باوجود دستیاب ماہرین، جن میں سرجن، آرتھوپیڈسٹ، گائناکالوجسٹ اور دیگر میڈیکل آفیسرز شامل ہیں، مریضوں کو خدمات فراہم کر رہے ہیں۔
بانہال میں ڈاکٹروں کی کمی پر بی جے پی رہنما کا انوکھااحتجاج، ہسپتال گیٹ پر لگادیا تالا، انتظامیہ کی مداخلت پر معاملہ حل
ملک و جہان کی خبروں سے رہیں اپڈیٹ
نیوز لیڑ ای میل پر پائیں
