عظمیٰ ویب ڈیسک
سرینگر// سالانہ حج-2024 رواں ہفتے کے شروع میں اختتام پذیر ہوا، جس کے بعد جموں و کشمیر کے حجاج کی پہلی پرواز ہفتہ کی شام سرینگر بین الاقوامی ہوائی اڈے پر اتری۔
حکام نے بتایا کہ جموں و کشمیر سے تعلق رکھنے والے 320 عازمین کا پہلا قافلہ ہفتہ کو سعودی عرب میں حج ادا کرنے کے بعد واپس آیا۔
ایگزیکٹیو آفیسر جموں و کشمیر حج کمیٹی ڈاکٹر شجاعت قریشی نے بتایا کہ 320 عازمینِ حج کا پہلا قافلہ آج واپس لوٹا اور سرینگر انٹرنیشنل ایئرپورٹ پر جموں و کشمیر حج کمیٹی کے ارکان، سول انتظامیہ و پولیس کے افسران، ایئرپورٹ حکام اور سینئر حکام نے ان کا استقبال کیا۔
ہوائی اڈے کے ایک سینئر افسر نے بتایا، ’’آج ایک فلائٹ طے کی گئی تھی، جس میں 320 عازمین – 166 مرد اور 156 خواتین – واپس آئے اور رات تقریباً 9 بج کر 15 منٹ پر یہاں پہنچے‘‘۔
ڈاکٹر قریشی نے کہا کہ سرینگر کے بین الاقوامی ہوائی اڈے پر عازمین حج کی آمد اور امیگریشن سمیت ضروری رسمی کاروائیوں کے بعد حاجی اپنے رشتہ داروں کے ساتھ براہ راست اپنے گھروں کو جائیں گے۔
انہوں نے کہا کہ عازمین کو حاصل کرنے کے خواہشمند افراد کے لیے گاڑیوں کے پاس پہلے ہی آن لائن جاری کیے جا چکے ہیں۔ امیگریشن عملہ کو بھی جموں و کشمیر پولیس نے تعینات کیا ہے، حج کمیٹی کا عملہ بھی موجود رہے گا۔
حکام کے مطابق، رواں سال خطے کے 7000 سے زائد عازمین نے مکہ اور مدینہ میں فریضہ حج ادا کیا۔ ان میں سے تقریباً 6800 عازمین سرینگر ایمبریکیشن پوائنٹ کے ذریعے روانہ ہوئے، جبکہ 500 سے زائد عازمین نے دوسرے ہوائی اڈوں سے سفر کیا۔
جموں و کشمیر حج کمیٹی نے پہلے ہی 29 جون تک واپسی کی پرواز کا شیڈول جاری کر دیا ہے جس میں 23 جون کو صبح 11:50 اور شام 4:25 پر دو پروازیں طے کی گی ہیں۔
