بانہال کے چملواس علاقے میں ہولناک آتشزدگی،سات رہائشی مکان خاکستر

تسکین وانی
بانہال // بانہال کے چملواس علاقے گزشتہ شب پیش آئی آگ کی ایک ہولناک واردات میں سات رہائشی مکان مکمل طور سے جل کر راکھ ہوگئے ہیں۔ آگ کی اس وارادت میں متاثرہ کنبوں کا لاکھوں روپئے کا مال و اسباب مکمل طور سے خاکستر ہوگیا ہے ۔
آگ کی یہ واردات گزشتہ رات قریب بارہ بجے رونما ہوئی اور دیکھتے ہی دیکھتے سید پورہ کی بستی کو اپنی لپیٹ میں لے گئی۔ بانہال سے پولیس ، فائر سروسز اور رضاکار تنظیم بانہال والنٹیرس کی ٹیمیں جائے وقوعہ پر پہنچ گئیں اور انہوں نے مقامی لوگوں کے ساتھ مل کر سخت مشقت کے بعد آگ کو قابو کیا اور مزید گھروں کو آگ کی لپیٹ میں آنے سے بچا لیا۔
خطہ افلاس سے نیچے زندگی بسر کرنے والے گوجر طبقے کے ان متاثرین کی شناخت محمد یوسف شاہ ، الطاف احمد شاہ، گلزار احمد شاہ، مشتاق احمد شاہ، شبیر احمد شاہ، جماعت علی شاہ اور غلام نبی شاہ تمام ساکنان سید پورہ چملواس بانہال کے طور کی گئی ہے اور وہ تن پر لگے کپڑوں کے سوا کوئی بھی چیز اپنے جلتے گھروں سے بچا نہیں پائے ہیں۔