عظمیٰ ویب ڈیسک
سرینگر// بھارتیہ جنتا پارٹی (بی جے پی) آئندہ ہفتے جموں و کشمیر کی قانون ساز اسمبلی میں اپوزیشن لیڈر کے انتخاب کے لیے اپنا قانون ساز پارٹی اجلاس منعقد کرنے جا رہی ہے۔
ذرائع کے مطابق، بی جے پی آئندہ ہفتے اپنی قانون ساز پارٹی اجلاس میں اپنا پارٹی لیڈر منتخب کرے گی، جو ایوان میں اپوزیشن لیڈر بھی ہوں گے۔
ذرائع نے انکشاف کیا کہ سنیل کمار شرما (ایم ایل اے پڈر ناگسینی) اور دیویندر رانا (ایم ایل اے نگروٹا) اس اہم عہدے کے مضبوط امیدواروں میں شامل ہیں۔
بی جے پی کو ایوان میں اپنی تعداد کے حساب سے اپوزیشن لیڈر کا اہم عہدہ ملنے کی توقع ہے۔ اپوزیشن جماعتوں میں بی جے پی کے پاس 29 ایم ایل ایز ہیں، پی ڈی پی کے تین اور پیپلز کانفرنس کا ایک ایم ایل اے ہے۔
بی جے پی نے اپنے قانون ساز پارٹی اجلاس کے لیے سینئر رہنماؤں ترون چُگھ اور پرہلاد جوشی کو مبصر مقرر کیا ہے۔
