ڈوڈہ //مرکزی حکومت کی جانب سے جموں و کشمیر کے لئے دی گئی حد بندی کمیشن کے اراکین آج وادی چناب کے ایک روزہ دورہ پر آرہے ہیں جہاں وہ ڈوڈہ،کشتواڑ و رام بن اضلاع کے وفود کے ساتھ پی ڈبلیو ڈی گیسٹ ہاؤس کشتواڑ میں ملاقات کریں گے۔اس دوران سیاسی و عوامی سطح پر بھی سرگرمیاں تیز کی گئیں ہیں.ذرائع کے مطابق ڈوڈہ، بھدرواہ، ٹھاٹھری و بھلیسہ کے 33 وفود کمیشن سے ملاقات کریں گے۔ادھر تین تحصیلوں و پانچ بلاکوں پر مشتمل علاقہ بھلیسہ کی سیاسی و سماجی تنظیموں نے علیحدہ اسمبلی حلقہ قائم کرنے کا مطالبہ کرتے ہوئے کہا کہ جغرافیائی اعتبار سے بھی الگ خطہ ہے۔گندوہ، چنگا، جکیاس، چلی و کاہرہ پر مشتمل علاقہ بھلیسہ میں گذشتہ برس کے ڈی ڈی سی انتخابات میں رائے دہندگان کی مجموعی تعداد 75 ہزار کے قریب تھی جبکہ 2011 کی مردم شماری کے مطابق تھانہ پولیس گندوہ کے دائرے اختیار میں رہائش پذیر آبادی کی تعداد 143641 تھی جو کہ آج ڈھائی لاکھ سے زائد تجاوز کر گئی ہے۔بھلیسہ یونائٹڈ فرنٹ کے چیئرمین محمد حنیف ملک نے کشمیر عظمیٰ سے بات کرتے ہوئے کہا کہ 1967 تک بھلیسہ بونجواہ ایک ہی اسمبلی حلقہ ہوا کرتا تھا لیکن پھر کچھ اسوقت کے سیاسی قائدین نے اپنے مفاد کی خاطر اس علاقہ کو دو حصوں میں تقسیم کر کے بھدرواہ و اندروال کے ساتھ ضم کیا۔ انہوں نے کہا کہ پولیس تھانہ گندوہ کے دائرے اختیار میں تین تحصیلیں و پانچ بلاک قائم ہیں جن میں بھلیسہ، چنگا، جکیاس، چلی و کاہرہ شامل ہیں۔ پانچ بلاکوں و تین تحصیلوں میں کل 95 گاؤں و 65 پنچائتیں شامل ہیں۔انہوں نے کہا کہ بھلیسہ خطہ چناب کا سب سے پسماندہ علاقوں میں سے ایک ہے جہاں کی سرحدیں ایک طرف سے ہماچل پردیش، دوسری جانب سے پاڈر کشتواڑ اور بونجواہ کے ساتھ ملتی ہیں لیکن یہ تینوں تحصیلیں و پانچوں بلاک ڈوڈہ ضلع کا حصہ ہیں۔ ملک نے کہا کہ بھلیسہ سے پندرہ کے قریب وفود نے حد بندی کمیشن کے ساتھ ملاقات کرنے کے لئے رجسٹریشن کروائی ہے اور ہماری پوری کوشش رہے گی کہ ا س علاقہ کو علیحدہ اسمبلی قائم کرنے کے لئے ہر ممکن جدوجہد کریں گے ۔
حدبندی کمیشن سے ملاقات سے ایک روزقبل این سی کی مشاورت
جموں//نیشنل کانفرنس کے صوبائی صدر دیویندر سنگھ رانا نے حد بندی کمیشن کے اجلاس سے قبل اندرون خانہ مشاورت کے لئے صوبہ جموں اور کور گروپ کے عہدیداروں کے اجلاس طلب کئے۔ صوبائی صدر نے پارٹی پر پارٹی کے ردعمل کو کمیشن سے متعلق حلقوں کی تجویز کردہ حد بندی کے حوالے سے تفصیلی تجاویز طلب کیں ، امید ہے کہ زمینی حقائق اور عوام کی امنگوں کو ملحوظ خاطر رکھتے ہوئے اس عمل کو منصفانہ انداز میں انجام دیا جائے گا۔ شام کو منعقدہ کور گروپ کے اجلاس میں رانا نے نیشنل کانفرنس کے ردعمل پر تبادلہ خیال کیا ، جس کے بارے میں کمیشن کے سامنے تفصیل ہوگی۔ نچلی سطح پر سینئر رہنماؤں اور صوبائی عہدیداروں نے آبادی اور تناسب کے تناسب پر خصوصی توجہ کے ساتھ حلقوں کے حصول کے ڈھانچے کا تفصیلی جائزہ دیا۔رانا نے پارٹی کے ساتھیوں کا مکمل زمینی کام انجام دینے پر اظہار تشکر کرتے ہوئے کہا کہ اس سے کمیشن کے ساتھ بحث کے لئے ایک جامع حکمت عملی تیار کرنے میں مدد ملے گی۔ پارٹی لائحہ عمل کو حتمی شکل دینے کے لئے کور گروپ کل یہاں شیر کشمیر بھون میں دوبارہ ملاقات کرے گا۔
