سری نگر// جموں وکشمیر پولیس نے وسطی ضلع بڈگام کے چاڈورہ علاقے میں دو جنگجو اعانت کاروں کو گرفتار کرکے اُن کی تحویل سے اسلحہ وگولہ بارود اور قابل اعتراض مواد برآمد کرنے کا دعویٰ کیا ہے۔
پولیس کے ایک ترجمان نے بتایا کہ ’50 آرآر،181 بٹالین سی آر پی ایف اور بڈگام پولیس نے ممنوع تنظیم لشکر طیبہ سے وابستہ دو معاونین کو گرفتار کیا ہے‘۔
انہوں نے گرفتار اعانت کاروں کی شناخت عمران مجید ماگرے ولد عبدالمجید اور عاقب امین ولد محمد امین راتھر ساکنان ماگرے محلہ موچھوا کے بطور کی ہے۔
انہوں نے کہا کہ ابتدائی تحقیقات کے دوران معلو ہوا ہے کہ گرفتا رشدہ اعانت کار ضلع میں سرگرم جنگجوں کو منطقی مدد فراہم کر رہے تھے۔
ترجمان کا مزید کہنا ہے کہ گرفتا رشدگان کے قبضے سے دو ہینڈ گرنیڈ ، دو اے کے میگزین، 30 اے کے گولیوں کے راونڈ اور دوسرا قابل اعتراض مواد برآمد کرکے ضبط کیا گیا ۔
انہوں نے کہا کہ مذکورہ اعانت کار لشکر کمانڈروں سے رابطے میں تھے اور وہ ماچھوا، کرالہ پورہ، چترا گام ، ستسو، نوگام اور چاڈورہ علاقوں میں اسلحہ و گولہ بارود کو ایک جگہ سے دوسری جگہ پہنچانے میں بھی ملوث رہے ہیں۔
پولیس نے اس ضمن میں کیس درج کرکے مزید تحقیقا ت شروع کی ہے۔
