یو این آئی

سری نگر// وسطی کشمیر کے چرار شریف علاقے میں 65 سالہ شہری پر چاقو سے وار کیا گیا جس کے نتیجے میں وہ شدید طورپر زخمی ہوا ہے۔
پولیس نے ملزم کو دھر دبوچ کر سلاخوں کے پیچھے دھکیل دیا ۔
اطلاعات کے مطابق چرار شریف میں اتوار کے روز وازہ باغ علاقے میں مخالف سمت میں ایک شخص نے اپنی ٹاٹا موبائیل گاڑی کھڑی کر رکھی تھی چنانچہ ایک مقامی شہری جو کہ اپنی گاڑی میں سوار تھا نے ٹاٹا موبائیل ڈرائیور کو گاڑی ایک سائڈ کرنے کے لئے کہا تاکہ ٹریفک کی آمدورفت میں کوئی خلل نہ پڑ سکے ۔
مقامی ذرائع نے بتایا کہ جوں ہی مقامی شہری نے ٹاٹا موبائیل ڈرائیور کو اپنی گاڑی ایک سائڈ کرنے کے لئے کہا جو کہ اس کو گوارا نہ ہوا اور طیش میں آکر اس نے کسی تیز دھار والے ہتھیار سے مقامی شہری جس کی شناخت 65سالہ عبدالرشید بابا ولد عبدالغنی ساکن وازہ باغ چرار شریف کے بطور ہوئی ہے پر حملہ کیا جس کے نتیجے میں وہ شدید طورپر زخمی ہوا اور اس کو علاج ومعالجہ کی خاطر نزدیکی ہسپتال منتقل کیا گیا۔
معمر شہری کے فرزند نے یو این آئی ارد کوبتایا کہ چرار شریف میں وازہ باغ چونگی کے نزدیک جب میرے والد نے مخالف سمت میں کھڑی کی گئی گاڑی کے ڈرائیور کو گاڑی ایک سمت کرنے کو کہا جس پر وہ بھڑک گیا اور اس نے ان کے والد کی گردن پر چاقو اور گاڑی کی چابی سے کئی وار کئے جس کے نتیجے میں وہ شدید طورپر زخمی ہوا اور اس کو علاج ومعالجہ کی خاطر ہسپتال لے جایا گیا جہاں اس کے سر پر کئی ٹانکیں آئیں۔
مقامی لوگوں نے ڈرائیور کے خلاف سخت کارروائی عمل میں لانے کا مطالبہ کیا۔
دریں اثنا یو این آئی اردو نے جب پولیس کے ایک سینئر عہدیدار کے ساتھ رابط قائم کیا تو انہوں نے اس بات کی تصدیق کی کہ وازہ باغ چرار شریف میں مقامی شہری پر کسی تیز دھار والے ہتھیار سے حملہ کیا گیا ہے۔
انہوں نے بتایا کہ پولیس نے فوری کارروائی عمل میں لا کر ملزم جس کی شناخت عابد حسن راتھر ولد غلام حسن راتھر ساکن باغ مہتاب سری نگر کے بطور ہوئی کی گرفتاری عمل میں لائی ہے۔
مذکورہ عہدیدار نے بتایا کہ اس سلسلے میں ایف آئی آر زیر نمبر 74/2023زیر دفعات 307,323,341آئی پی سی کے تحت کیس درج کرکے مزید تحقیقات شروع کی گئی ہے۔