عظمیٰ نیوز سروس
سرینگر//جموں و کشمیر اسپورٹس کونسل نمایاں مقامات پر روڈ شوز کا انعقاد کر رہی ہے ۔ پہلے شو کا انعقاد لال چوک سری نگر کے مشہور گھنٹہ گھر میں کیا گیا تاکہ عوام کو کھیلو انڈیا سرمائی کھیل 2024 کے آئندہ چوتھے ایڈیشن کی آمد سے آگاہ کیا جا سکے۔روڈ شو نے بہت سے لوگوں کو اپنی طرف متوجہ کیا جن میں بچوں کی ایک اچھی تعداد بھی شامل تھی۔ سیکرٹری سرمد حفیظ نے سول سیکرٹریٹ جموں میں ایک روڈ شو کی قیادت کی۔انہوںنے اس تقریب سے منسوب اہمیت پر روشنی ڈالی اور بتایا کہ یہ کس طرح جموں و کشمیر کے مرکز کے زیر انتظام علاقے بالخصوص خوبصورت گلمرگ میں ہونے والے بین الاقوامی سرمائی کھیلوں کے مقابلوں کا مرکز بن سکتا ہے۔ انہوں نے کھیلو انڈیا سرمائی کھیلوں کے پچھلے ایڈیشنوں پر بھی روشنی ڈالی اور اس بات پر بھی روشنی ڈالی کہ انتظامیہ کس طرح کھیلوں میں عمدہ کارکردگی کو فروغ دینے کے لیے پرعزم ہے۔سرمد حفیظ نے کھیلوں کے شائقین اور سیاحوں میں جوش و خروش پیدا کرنے کے لیے سرمائی کھیلوں کی بھرپور تشہیری مہم پر بھی زور دیا۔ڈل جھیل اور دیگر کئی مقامات پر اسی طرح کے شوز کا انعقاد کیا گیا۔
