سری نگر//شمالی کشمیر کے بارہمولہ ضلع کے سوپور کے سیاد پورہ علاقے کا ایک 33 سالہ ملزم، جو اپنے بھائی کے ساتھ ڈسٹرکٹ جیل کپواڑہ میں بند تھا، منگل کو آدھی رات کے قریب فوت ہو گیا۔
تفصیلات کے مطابق ملزم خورشید احمد وانی ولد غلام محمد وانی ساکن سیاد پورہ سوپور، جو آئی پی سی کے تحت درج ایک کیس ایف آئی آر نمبر 52/2021 سیکشن 363, 498 اور 109 کے تحت 5 اکتوبر 2021 سے جیل میں بند تھا۔
ذرائع نے بتایا کہ خورشید کی طبیعت کافی عرصے سے ٹھیک نہیں تھی اور گزشتہ نصف شب کے قریب ان کے بھائی جو کہ اسی کیس کے سلسلے میں جیل میں بند ہیں، نے وہاں تعینات پولیس اہلکاروں کو مطلع کیا جس کے بعد ہسپتال کے محکمہ صحت کے اہلکار وہاں پہنچ گئے۔
جیل حکام نے اسے سب ضلع ہسپتال کپواڑہ منتقل کیا جہاں ڈاکٹروں نے اسے مردہ قرار دیا۔
واضح رہے کہ گزشتہ چھ مہینوں میں جیل میں یہ دوسری موت ہے کیونکہ براتھ کلاں سوپور کے ایک ملزم کی گزشتہ سال 14 جون کو جیل میں موت ہوئی تھی۔
جیل کے سپرنٹنڈنٹ شہباز حسین نے 33 سالہ کی موت کی تصدیق کی۔
اُن کا کہنا ہے، "وہ کچھ عرصے سے بیمار تھا ۔ جیسے ہی اس کی حالت خراب ہوئی، اسے ہسپتال لے جایا گیا لیکن اس نے دم توڑ دیا"۔
