یو این آئی
کلکتہ/تیز گیندباز جسپریت بمراہ (27 رن پر پانچ وکٹ) کی شاندار اور تباہ کن گیندبازی کی بدولت ہندوستان نے جنوبی افریقہ کو ایڈن گارڈنز میں کھیلے جا رہے پہلے ٹیسٹ کے پہلے دن جمعہ کو محض 55 اوور میں 159 رنز پر ڈھیر کر دیا۔ جواب میں ہندوستان نے اسٹمپ تک 20 اوور میں ایک وکٹ کے نقصان پر 37 رن بنا لیے ہیں اور ابھی پہلی اننگز میں 122 رنز پیچھے ہے ۔ پورا دن جسپریت بمراہ اور ہندوستانی ٹیم کے نام رہا۔ بمراہ کے پانچ وکٹوں نے جنوبی افریقہ کی بلے بازی کی لائن اپ کو بکھیر کر رکھ دیا۔ ان کا بھرپور ساتھ کلدیپ یادو اور محمد سراج نے دیا۔ جنوبی افریقی بلے باز پچ پر جمنے کے باوجود وکٹیں گنوا بیٹھے ۔ ہندوستان کو یشسوی جیسوال 12کے طور پر ایک جھٹکا ضرور لگا، لیکن اس کے بعد واشنگٹن سندر اور کے ایل راہل نے سنبھل کر بلے بازی کی اور یقینی بنایا کہ ہندوستان دوسرے دن کھیل میں مضبوط پوزیشن سے داخل ہو۔ اسٹمپ کے وقت راہل 59 گیندوں پر 13 جبکہ سندر 38 گیندوں پر چھ رنز بنا کر کریز پر موجود تھے ۔ اس سے قبل جنوبی افریقہ نے ٹاس جیت کر بلے بازی کا انتخاب کیا تھا۔ رائن ریکلٹن اور ایڈن مارکرم نے محتاط آغاز ضرور کیا، لیکن بمراہ نے دونوں سلامی بلے بازوں کو پویلین کی راہ دکھائی اور کلدیپ نے ٹیمبا باووما کو آؤٹ کیا۔ دوسرے سیشن میں بمراہ اور کلدیپ نے ایک ایک وکٹ لیا، جبکہ آخری لمحات میں محمد سراج نے دو اہم وکٹیں حاصل کیں اور اکشر پٹیل کے ایک شکار کے ساتھ جنوبی افریقہ کا اسکور آٹھ وکٹ پر 154 ہو گیا۔ آخری سیشن میں بمراہ نے دونوں باقی وکٹ لے کر پوری اننگز سمیٹ دی۔ سلامی بلے بازوں نے مثبت شروعات کی تھی۔ ریکلٹن 23 نے شاندار شروعات کی، جبکہ مارکرم 31 نے اپنا کھاتا کھولنے کے لیے 23 گیندیں لگائیں، لیکن اس کے بعد بلے بازوں نے کھل کر کھیلنا شروع کیا ۔ بمراہ کو آخرکار اپنے چھٹے اوور میں کامیابی ملی – پہلے ایک، پھر دوسرا، اور مہمان ٹیم نے کچھ ہی دیر میں اپنے دونوں سلامی بلے بازوں کا وکٹ گنوا دیا ۔ یہی حال باووما 3 کا بھی ہوا، جو اپنے کم بیک ٹیسٹ میں جلد ہی آؤٹ ہو گئے ۔71/3 کے اسکور پر پہلے گھنٹے کی تمام محنت ضائع ہو گئی۔ ملڈر 24، ٹونی ڈیزورزی 24 اور کائل ویریں 16 ، تینوں نے اننگز کا آغاز تو اچھا کیا لیکن تقریباً ایک ہی انداز میں آؤٹ ہو گئے ۔ ٹرسٹن اسٹبز نے 15 رن بنا کر ناٹ آؤٹ رہتے ہوئے پچھلے بلے بازوں کے ساتھ مل کر اننگز کو سنبھالنے کی کوشش کی، لیکن ہندوستانی گیندبازوں نے صرف 13 رنز کے اندر آخری پانچ وکٹیں گرا کر جنوبی افریقہ کی پوری ٹیم کو سمیٹ دیا۔ بمراہ کی پانچ وکٹوں کے علاوہ سراج نے 47 رن کے عوض دو، کلدیپ نے 36 رن پر دو اور اکشر پٹیل نے 21 رن پر ایک کھلاڑی کو آؤٹ کیا۔
