عظمیٰ نیوزسروس
جموں//وزیربرائے خوراک،شہری رسدات و اَمورِ صارفین، ٹرانسپورٹ اور آئی ٹی ستیش شرما نے جموں ریلوے سٹیشن پر ہیلتھ کم میڈیکل کیمپ کا اِفتتاح کیا۔ یہ کیمپ موٹر وہیکل ڈیپارٹمنٹ، محکمہ صحت اور ٹیکسی آپریٹر یونین ریلوے سٹیشن جموں کے اِشتراک سے منعقد کیا گیا تاکہ ٹرانسپورٹ کارکنوںمیں صحت سے متعلق بیداری اور فلاح و بہبود کو فروغ دیا جاسکے۔ کیمپ کے دوران زائد اَز 450ڈرائیوروں نے شرکت کی اوررنگ اندھا پن اور آنکھوں کی بینائی سے متعلق دیگر مسائل کے لئے بلڈ پریشر، شوگر اور بینائی کا چیک اپ کیا۔وزیر کے ہمراہ ڈِی آئی جی جے کے ایس رینج ، ٹرانسپورٹ کمشنر جموں و کشمیر ، ایس ایس پی ریلوے ، جوائنٹ ٹرانسپورٹ کمشنر جموں و کشمیر ، آر ٹی او جموں ، سی ایم او جموں اور متعلقہ محکموں کے دیگر سینئر افسران بھی تھے۔وزیرموصوف نے تقریب سے خطاب کرتے ہوئے ڈرائیوروں کی لگن کو سراہا جنہوں نے اپنے مطلوبہ شیڈول کے باوجود روزانہ کی کمائی پر اَپنی صحت کو ترجیح دیتے ہوئے کیمپ میں حصہ لیا۔ اُنہوں نے شرکأ پر زور دیا کہ وہ سڑک کی حفاظت کے اَقدامات بشمول سیٹ بیلٹ اور ہیلمٹ پہننے اور ڈرائیونگ کے دوران موبائل فون کے اِستعمال سے گریز کرتے ہوئے ذمہ داری کا احساس پیدا کریں۔اُنہوں نے بچوں میں اچھی عادات پیدا کرنے کی ضرورت پر زور دیا اور ان کی حوصلہ افزائی کی کہ وہ ہر چیز میں جلدی کرنے کے بجائے بہتر مستقبل کے لئے صحت مند مسابقت پر توجہ مرکوز کریں۔ اُنہوں نے کہا کہ ڈرائیور ایک ذمہ دار اور ترقی پسند معاشرے کی تعمیر میں اہم رول اَدا کرتے ہیں کیوں کہ ان کا طرز عمل اور رویہ جدوجہد کے دوران اَپنی گاڑیوں میں سفر کرنے والے نوجوان ذہنوں پر اثر انداز ہوتا ہے ۔ستیش شرما نے سڑک حادثات میں ہونے والی ہلاکتوں کی بڑھتی ہوئی تعداد پر بھی تشویش کا اِظہار کیا جس میں سالانہ تقریباً 1,70,000افراد ہلاک ہوجاتے ہیں ۔اُنہوں نے اس بات پر زور دیتے ہوئے کہ یہ تعداد کچھ بیماریوں سے ہونے والی ہلاکتوں سے کہیں زیادہ ہے۔ اُنہوں نے تمام شراکت داروں پر زور دیا کہ وہ آگے آئیں اور سڑک کی حفاظت اور حادثات کی روکتھام کے لئے اَپنا رول اَدا کریں۔ اُنہوں نے یقین دِلایا کہ محکمہ ٹرانسپورٹ اور ہیلتھ کے تعاون سے ڈرائیوروں کے لئے ماہانہ ہیلتھ چیک اَپ کیمپ کا انعقاد کیا جائے گا۔مزید برآں، ڈرائیوروں اور ان کے معاونین کی فلاح و بہبود کے لئے بڑے ٹرانسپورٹ ہبز میں ہوسٹل، بیت الخلأ اور ’’ڈرائیور سرائے‘‘ قائم کرنے کی کوششیں کی جائیں گی۔اِس سے قبل ٹرانسپورٹ کمشنر اور ڈی آئی جی نے روڈ سیفٹی کی اہمیت اور حادثات کی روکتھام کے لئے ضروری اَقدامات کے بارے میں تفصیل سے بات کی۔
