یوتمال ( مہاراشٹر)/یو این آئی/ وزیراعظم نریندر مودی نے سنیچر کو ایک بار پھر دوہرایا کہ پلوامہ کے شہیدوں کی قربانی رائیگاں نہیں جائے گی اور اس کے قصوروار چاہے جتنا چھپ جائیں، ان کو ان کے اس گناہ کی سزا ضرور ملے گی۔ وزیراعظم مودی نے ملک کے عوام سے صبر و تحمل اور اپنے جوانوں پر یقین رکھنے کی اپیل کی۔ انہوں نے کہا ’’پلوامہ کے قصورواروں کو کیسے ، کہاں، کب، کونسی اور کس طرح کی سزا دی جائے گی، اس کا تعین ہمارے جوان کریں گے ۔ دہشت گردوں کو ان کے کئے کی سزا ضرور ملے گی‘‘۔پاکستان کا نام لئے بغیر مودی نے کہا کہ ہندوستان کی تقسیم کے بعد جو ایک ملک وجود میں آیا، دہشت گردوں کی پناہ گاہ اور دہشت گردی کا دوسرا نام بن چکا ہے ۔ یہ ملک دیوالیہ ہونے کے دہانے پر ہے اور اس کے منصوبوں کو ہم کسی طور کامیاب نہیں ہونے دیں گے ۔ فوجیوں، خاص کر سینٹرل ریزرو پولیس فورس میں جو غصہ ہے ، اس سے بھی ملک بخوبی واقف ہے ۔ اس لئے حٖفاظتی دستوں کو پوری آزادی دے دی گئی ہے ۔
قصورواروں کو سزا ملے گی: وزیراعظم
