بھوپال// (یو این آئی) وزیر اعظم نریندر مودی نے ملک کی ثقافتی ترقی میں قبائلی سماج کے تعاون کا ذکر کرتے ہوئے کہا کہ قبائلیوں کی ہر بات میں حکمت ہوتی ہے اور بھگوان رام کی زندگی میں قبائلی سماج کی بے مثال تعاون نے ایک ’راج کمار‘ کو ’مریادا پرشوتم‘ بنا دیا۔ مودی یہاں بھگوان برسا منڈا کے یوم پیدائش پر منائے جانے والے ’جن جاتیہ گورو دوس‘ کے تحت منعقد ایک بڑے قبائلی کنونشن سے خطاب کر رہے تھے۔ اس موقع پر گورنر منگو بھائی پٹیل اور وزیر اعلی شیوراج سنگھ چوہان بھی موجود تھے۔اس دوران انہوں نے کہا کہ شری رام نے ون واس کے دوران قبائلی سماج کی روایات سے تحریک حاصل کی۔ انہوں نے کہا کہ ہندوستان کے ثقافتی سفر میں اس سماج کا تعاون بے مثال ہے۔ انہوں نے سوال کیا کہ اس سماج کے تعاون کے بغیر بھگوان شری رام کی زندگی میں کامیابی کا تصور کیا جا سکتا ہے۔ جنگل میں رہنے والوں کی برادری کے ساتھ گزارے گئے وقت نے ایک’راج کمار‘ کو ’مریادا پرشوتم‘ بنانے میں اہم تعاون دیا۔اس پروگرام سے پہلے انعقاد کے مقام پر مدھیہ پردیش کے تقریباً تمام قبائل میں کئے جانے والے کرما رقص کی پیش کش کی گئی۔ اس رقص کے گانے کے حوالے سے مسٹر مودی نے کہا کہ قبائلیوں کی ہر بات میں حکمت ہے۔ اس کی ہر بات میں’پرپز آف لائف‘ ہوتا ہے۔ انہوں نے کہا کہ ہمیں ان سے بہت کچھ سیکھنے کی ضرورت ہے۔ اس سے بڑا ملک کا ورثہ اور سرمایہ کچھ نہیں ہے۔اس رقص کی پیش کش کے بعد مودی نے گانے کا مطلب بتاتے ہوئے اپنے خطاب میں کہا کہ زندگی چار دن کا میلہ ہے اور تمام دھن دولت سب یہیں چھوٹ جانی ہے۔
انڈین ریلوے کا جدید مستقبل کملا پتی ریلوے اسٹیشن میں دکھے گا :مودی
بھوپال// وزیر اعظم نریندر مودی نے کہا کہ انڈین ریلوے اس سمت میں آگے بڑھ رہا ہے اور ریلوے کا مستقبل رانی کملا پتی ریلوے اسٹیشن میں دکھے گا۔ مودی نے یہ بات یہاں پرائیویٹ گورنمنٹ پارٹنرشپ (پی پی پی) اسکیم کے تحت ازسرنو تیار شدہ رانی کملا پتی ریلوے اسٹیشن اور کچھ دیگر ریلوے اسکیموں کے افتتاح کے موقع پر اپنے خطاب میں کہی۔ اس ریلوے اسٹیشن (سابقہ حبیب گنج) کمپلیکس میں جدید ترین سہولیات سے آراستہ تقریب میں گورنر منگو بھائی پٹیل، وزیر اعلیٰ شیوراج سنگھ چوہان اور وزیر ریلوے اشونی وشنو بھی موجود تھے۔
