سرینگر//سرینگر کے ریذیڈنسی روڈ پر واقع سٹیٹ بینک آف انڈیا (ایس بی آئی) کے مین برانچ کے چیف منیجر سمیت 4 ملازموں کا کورونا ٹیسٹ مثبت آنے کے پیش نظر منگل کے روز احتیاطی طور پر بند رکھا گیاتاہم سری نگر اور وادی کے دوسرے حصوں میں قائم ایس بی آئی کی تمام شاخیں حسب معمول کھلی رہیں۔مذکورہ بینک کے ایک ملازم نے بتایا کہ بینک کے چیف منیجر سمیت چار ملازموں کا کورونا ٹیسٹ مثبت آیا ہے جنہیں ہوم کورنٹائن کیا گیا ہے۔انہوں نے کہا کہ ایک میڈیکل ٹیم نے بینک کے دیگر تمام ملازموں کے ٹیسٹ کئے تاہم ان کے ٹیسٹ منفی آئے۔مذکورہ ملازم نے کہا کہ صارفین کی حفاظت کے لئے منگل کے روز بینک کو بند رکھا گیا۔دریں اثنا بینک کے باہر اپنے اپنے امور کی انجام دہی کے لئے لوگوں کی بھیڑ جمع ہوئی تھی جنہیں مایوس ہو کر ہی گھر واپس لوٹنا پڑا۔عبدالعزیز نامی ایک سبکدوش انجینئر نے بتایا کہ میں اپنی لائف سرٹیفکیٹ جمع نہیں کر سکا کیونکہ یہاں پہنچ کر معلوم ہوا کہ بینک بند ہے۔
سرینگر میں سٹیٹ بنک کا مین برانچ بند
