رائے دہندگان کو خائف کیا جا رہا ہے، ضمنی الیکشن کی کوئی ضرورت نہیں:اعظم خان

رامپور/ سینئر سماج وادی پارٹی (ایس پی) لیڈر و سابق کابینی وزیر محمد اعظم خان نے رام پور میں ہونے والے ضمنی الیکشن میں مقامی انتظامیہ کو رائے دہندگان کو دھمکانے کا موردالزام ٹھہراتے ہوئے کہا کہ موجودہ حالات میں بی جے پی امیدوار کو فاتح قرار دے دینا چاہئے۔ہفتہ کی دیر رات اپنی رہائش گاہ پر میڈیا نمائندوں سے بات چیت میں اعظم خان نے کہا ‘جب رامپور میں ضمنی الیکشن شفاف طریقے سے منعقد نہیں ہو رہے ہیں تو ایسی صورت میں بی جے پی امیدوار کو منتخب ہوا قرار دے دینا چاہئے۔ اس کے لئے میں پارٹی سربراہ کے ذریعہ الیکشن کمیشن سے درخواست کروں گا۔انہوں نے کہا کہ ایسی اطلاعات موصول ہوئی ہیں کہ پارٹی صدر اکھلیش یادو، راشٹریہ لوک دل (آر ایل ڈی) صدر جینت چودھری اور چندر شیکھر آزاد رام پور آ رہے ہیں۔ جب شفاف طریقے سے رامپور میں ضمنی الیکشن نہیں ہو رہے ہیں تو انہیں یہاں آنے کی کیا ضرورت ہے۔ایس پی لیڈر نے کہا کہ جس طریقے سے فلیگ مارچ کے ذریعہ رائے دہندگان کو خائف کیا جا رہا ہے ایسے میں ضمنی الیکشن کی کوئی ضرورت نہیں ہے۔ اعظم خان نے الزام لگایا کہ رائے دہندگان کو خائف اور انہیں ووٹنگ کے لئے گھروں سے باہر نہ آنے کی دھمکی دی جا رہی ہے۔ ووٹروں کو دھمکی دی جا رہی ہے کہ اگر انہوں نے ایس پی کو ووٹ کیا تو انہیں ان کے گھروں سے نکال دیا جائے گا۔ یہاں تک کی میری بیوی کو بھی گھر سے باہر نہ آنے کا انتباہ دیا گیا ہے۔ اس طرح کی وحشیانہ حرکت، خواتین کے ساتھ ناروا اور ناشائستہ سلوک کسی بھی سسٹم کو زیب نہیں دیتا۔سابق وزیر نے دعوی کیا کہ ان کے پاس کچھ ویڈیوز اور تصاویر ہیں لیکن انہیں وہ کچھ وجوہات کی وجہ سے میڈیا کو شیئر نہیں کرسکتے۔ اگر اسے میڈیا کے حوالے کردیا گیا تو عدالت ان ویڈیوز اور تصاویر کو نوٹس نہیں لے گی۔