عظمیٰ نیوز سروس
سرینگر//نیشنل کانفرنس صدرڈاکٹر فاروق عبداللہ نے لال قلعہ دہلی میں ہونے والے وحشیانہ دھماکوں کی شدید الفاظ میں مذمت کرتے ہوئے کہا کہ یہ ایک بزدلانہ اور غیر انسانی عمل ہے، جس کا مقصد معصوم لوگوں کے دلوں میں خوف و دہشت پھیلانا ہے۔ ڈاکٹر فاروق نے کہا، ’’ایسے سفاکانہ حملے کی مذمت کے لئے الفاظ ناکافی ہیں۔ یہ دھماکے نہ صرف بے گناہ شہریوں کی جانوں پر حملہ ہیں بلکہ انسانیت اور امن کے جذبے پر بھی کاری ضرب ہیں۔فاروق عبداللہ نے جاں بحق افراد کے اہل خانہ سے گہری ہمدردی کا اظہار کیا اور زخمیوں کی جلد صحتیابی کے لئے دعا کی۔ انہوں نے حکام سے مطالبہ کیا کہ اس بزدلانہ واردات کے مرتکبین کو جلد از جلد انصاف کے کٹہرے میں لایا جائے۔
