عظمیٰ نیوزسروس
جموں //جموں پولیس نے بشناہ جموں میں 17 سالہ لڑکے کے قتل کیس کو کامیابی سے حل کیا ہے اور اس بھیانک جرم میں ملوث تین افراد کو گرفتار کیا گیا ہے۔ 13جنوری 2025کو رات پولیس سٹیشن بشناہ میں ایک شکایات موصول ہوئی جس میں بتایا گیا کہ ایک نامعلوم شخص کو تیز دھار ہتھیار سے بے دردی سے قتل کیا گیا ہے اور لاش بھٹیاری، بشناہ روڈ کے ساتھ پڑی ہے۔ بعد میں متوفی کی شناخت اجے کمار ولد رومیش لال ساکنہ بھٹیاری، بشناہ کے طور پر کی گئی۔ متوفی پیشہ سے میٹاڈور کا کنڈیکٹر تھا۔اس پر فوری طور پر کارروائی کرتے ہوئے جموں پولیس نے ایک کیس پولیس سٹیشن بشناہ میں درج کیا اور گہرائی سے تفتیش شروع کی۔ایس ڈی پی او آر ایس پورہ کی قریبی نگرانی میں ایس ایچ او بشناہ انسپکٹر سشیل چودھری کی قیادت میں ایک خصوصی تفتیشی ٹیم نے مشتبہ افراد کا سراغ لگانے کیلئے تکنیکی تجزیہ اور انسانی ذہانت کے ذریعے احتیاط سے کام کیا۔ان کی مسلسل کوششوں کے نتیجے میں چند مشتبہ افراد کی شناخت ہوئی اور پولیس پارٹیوں نے مجرموں کو پکڑنے کیلئے جموں اور ملحقہ اضلاع میں مختلف مقامات پر چھاپے مارے اور آخر کار گرفتار کرنے میں کامیاب ہوئے۔ گرفتار افراد کی شناخت انمول شرما ولد گنیش داس ساکنہ سانبہ ، نکھل شرما ولد باوا دتہ شرما ساکنہ سانبہ اور نشانت چودھری ولد پرشوتم پال ساکنہ وجے پور سانبہ کے بطور ہوئی ۔ مسلسل پوچھ گچھ کے دوران ملزمان نے اعتراف جرم کرتے ہوئے انکشاف کیا کہ قتل ذاتی دشمنی سے ہوا ہے۔ ان کے بیانات کے مطابق نکھل شرما نے تیز دھار ٹوکا کا استعمال کرتے ہوئے متاثرہ پر جان لیوا حملہ کیا، جب کہ انمول شرما اور نشانت چودھری اس جرم کو انجام دینے میں سرگرم عمل تھے، جس کا انہوں نے ذاتی دشمنی کا بدلہ لینے کے لیے منصوبہ بنایا تھا جو کہ آپس میں جھگڑا ہوا تھا۔ جاری تفتیش کے ایک حصے کے طور پر، پولیس نے جرم میں استعمال ہونے والے ہتھیار ایک ٹوکا اور ایک خاکری برآمد کر لیے ہیں اور ملزمان کے خلاف کیس کو مزید مضبوط کیا ہے۔مزید برآں اس جرم میں ملوث گاڑی کو بھی ضبط کر لیا گیا ہے۔پولیس کے مطابق تینوں مشتبہ افراد کو حراست میں لینے اور اہم شواہد کو محفوظ رکھنے کے ساتھ، تفتیش ایک سخت قانونی کارروائی کی طرف بڑھ رہی ہے۔
