نیوز ڈیسک
نئی دہلی// سپریم کورٹ نے بدھ کو نفرت انگیز تقاریر پر سخت برہمی کا اظہار کیااور کہا کہ جس لمحے سیاست اور مذہب الگ ہو جائیں گے اور سیاست دان سیاست میں مذہب کا استعمال بند کر دیں گے، ایسی تقریریں ختم ہو جائیں گی۔ سپریم کورٹ نے کہا کہ نفرت انگیز تقاریر سرکردہ عناصر کر رہے ہیں اور لوگوں کو خود کو روکنا چاہیے۔جسٹس کے ایم جوزف اور بی وی ناگرتھنا کی بنچ نے سابق وزرائے اعظم جواہر لال نہرو اور اٹل بہاری واجپائی کی تقاریر کا حوالہ دیتے ہوئے کہا کہ دور دراز کے علاقوں اور کونے کونے سے لوگ انہیں سننے کے لیے جمع ہوتے تھے۔عدالتیں کتنے لوگوں کے خلاف توہین عدالت کی کارروائی شروع کر سکتی ہیں اس پر تعجب کرتے ہوئے بنچ نے کہا کہ ہندوستان کے لوگ دوسرے شہریوں یا برادریوں کی توہین نہ کرنے کا عہد کیوں نہیں لے سکتے۔بنچ نے نفرت انگیز تقاریر کرنے والوں کے خلاف ایف آئی آر درج کرنے میں ناکامی پر مختلف ریاستی حکام کے خلاف توہین عدالت کی درخواست کی سماعت کرتے ہوئے کہا، “ہر روز یہ عناصر ٹی وی اور عوامی فورمز سمیت دوسروں کو بدنام کرنے کے لیے تقاریر کر رہے ہیں۔”سالیسٹر جنرل تشار مہتا نے بھی کیرالہ میں ایک شخص کی طرف سے ایک مخصوص کمیونٹی کے خلاف کی گئی توہین آمیز تقریر کی نشاندہی کی اور سوال کیا کہ عرضی گزار شاہین عبداللہ نے ملک میں نفرت انگیز تقاریر کے واقعات کو چن چن کر نشاندہی کی ہے۔
