بلال فرقانی
سرینگر// نیشنل کانفرنس نائب صدر عمر عبداللہ نے پیر کو کہا کہ جموں و کشمیر میں جاری انہدامی مہم نے لوگوں میں مایوسی اور افراتفری کی لہر کو جنم دیا ہے۔انہوں نے کہا’’ حکومت بلڈوزر کو اپنا آخری سہارا بنائے، لوگوں کو ایک موقع فراہم کرے، اپنے دعوے کو ثابت کرنے اور ریاستی اراضی پر غیر قانونی قبضہ رکھنے والے لوگوں کو مناسب نوٹس جاری کئے جائیں‘‘۔ انہوں نے مزید کہا کہ نیشنل کانفرنس ان لوگوں کے خلاف نہیں ہے جنہوں نے ریاستی زمین پر قبضہ کیا ہے لیکن “ایک مناسب طریقہ کار پر عمل کیا جانا چاہئے۔”عمر نے ایک پریس کانفرنس سے خطاب کرتے ہوئے کہا’’جموں و کشمیر میں ہر طرف افراتفری ہے، گھر، کمپلیکس اور عمارتیں گرانے کے لیے جگہ جگہ بلڈوزر بھیجے جا رہے ہیں، لیکن کوئی نہیں جانتا کہ طریقہ کار کیا ہے اور کس بنیاد پر یہ مسماری مہم چلائی جا رہی ہے،‘‘ ۔
عمر نے کہا کہ ان کی بہن نے عمر کے گپکار مکان کے مجوزہ انہدام کے سلسلے میں ہائی کورٹ سے رجوع کیا اور حکومت کی طرف سے عدالت کے سامنے بتایا گیا کہ میڈیا میں گردش کرنے والی فہرست “جعلی” ہے۔ انہوں نے کہا، “عدالت میں حکومت کے جواب کو دیکھتے ہوئے، میں حکومت سے درخواست کرتا ہوں کہ وہ ان لوگوں کی حقیقی فہرست بنائے جنہوں نے سرکاری زمین پر قبضہ کیا ہے،” ۔عمر نے حکومت کو مسمار کرنے کی مہم کے حوالے سے متعدد اقدامات کی تجویز دی۔ انہوں نے کہا ’’کسی بھی حکومت کو عوام کے لیے پریشانی نہیں لانی چاہیے،بلڈوزر آخری حربہ ہونا چاہیے ،حکومت کو چاہیے کہ وہ ان لوگوں کو مناسب نوٹس جاری کرے، جنہوں نے، اس کے مطابق، ریاستی اراضی پر قبضہ کیا ہے اور انہیں کم از کم چھ ہفتے کا وقت دیاجائے کہ وہ اپنی زمین پر اپنا دعویٰ ثابت کریں اور دستاویزات ظاہر کریں۔” انکا کہنا تھا ہمارے معاملے میں، میری بہن نے ہائی کورٹ کے سامنے دستاویزات پیش کیں جن میں کہا گیا ہے کہ گپکار گھر کی لیز ابھی بھی فعال ہے اور اس کی میعاد ختم ہونے میں کچھ سال باقی ہیں۔ اسی طرح لوگوں کو دستاویزات پیش کرنے کا وقت دیا جائے اور ریونیو ٹیم کو ان کی تصدیق کرنے دیں، اگر مناسب تصدیق کے بعد کسی کی بھی زمین ناجائز قبضے میں پائی جاتی ہے تو یقینی طور پر بلڈوزر استعمال کیا جا سکتا ہے۔عمر نے کہا کہ حکومت کو ان لوگوں کی “حقیقی فہرست” بھی منظر عام پر لانی چاہیے جنہوں نے سرکاری زمین پر قبضہ کر رکھا ہے۔ “ایسا لگتا ہے کہ جاری مہم کا مقصد کمیونٹیز کے درمیان ایک خلیج پیدا کرنا ہے۔ اس مہم میں مناسب طریقہ کار کا فقدان ہے،‘‘۔انہوں نے کہا کہ این سی لیڈر علی محمد ساگر کے انہدام کے معاملے میں انہوں نے محسوس کیا کہ کوئی نوٹس نہیں دیا گیا۔ “ایک طریقہ کار ہے کہ اگر اس شخص کو نوٹس موصول نہیں ہوتا ہے، تو وہی گیٹ کے سامنے والے حصے پر لگا دیا جاتا ہے۔ کہیں بھی ایسا نہیں کیا جا رہا ہے،”۔ انہوں نے مزید کہا، “نیڈوس میں بلڈوزر کے ساتھ موجود اہلکاروں نے میرے رشتہ داروں کو بتایا کہ ان پر اوپر سے دباؤ ہے اور انہیں اپنے مالکان کو دکھانے کے لیے کچھ کرنا پڑے گا۔”عمر نے کہا کہ بہت سے علاقوں میں جاری مسماری اور بے دخلی مہم “بدعنوانی کا مرکز” بن رہی ہے۔ انہوں نے کہا، “مجھے کئی علاقوں سے بہت سے کالز موصول ہوئے جن میں لوگوں نے کہا کہ انہیں فہرست سے نام ہٹانے کے لیے 1 یا 1.5 لاکھ روپے ادا کرنے کو کہا جا رہا ہے۔”
