عظمیٰ نیوز سروس
سرینگر// اوڑی میں مہورہ پاور ہائوس 123سال قبل 1902میں تعمیر ہوا لیکن گزشتہ 33سالوں سے بے کار پڑاہے ،کیونکہ اس کی بحالی کیلئے حکومت کے پاس درکار فنڈس نہیں ہیں ۔ ممبراسمبلی اوڑی ڈاکٹر سجادشفیع کے ایک سوال کے جواب میں حکومت نے کہاکہ مہورہ پاور پروجیکٹ کی بحالی غیر یقینی ہے کیونکہ جموں و کشمیر حکومت اس منصوبے کو قابل عمل بنانے کے لیے مرکزی مالی امداد کا انتظار کر رہی ہے۔ وزیر انچارج نے کہا کہ اس تاریخی پروجیکٹ کی ترجیحی حیثیت کے باوجود، 10.50 میگاواٹ کے اس منصوبے کو وزیر اعظم کے ترقیاتی پیکیج15 کے تحت مرکز سے مطلوبہ فنڈز نہیں ملے ہیں۔ اس منصوبے پر 20 کروڑ 13 لاکھ روپے لاگت آنے کا تخمینہ تھا۔ سمال ہائیڈرو ڈیولپمنٹ پروگرام کے تحت 33 چھوٹے ہائیڈرو پروجیکٹس کی منظوری دی گئی ہے۔ تاہم، مالی امکانات کے بارے میں خدشات کی وجہ سے، اس کی نئی تعمیر روک دی گئی ہے۔ انہوں نے کہا کہ حکومت نے بار بار جائزہ میٹنگوں میں اس مسئلے کو اٹھایا اور، 60 فیصد تک مرکزی مالی امداد کا مطالبہ کیا ، لیکن ابھی تک کوئی گرانٹ منظور نہیں کی گئی ہے۔انچارج وزیر نے کہا کہ آئی آئی ٹی( روڑکی) نے نئی اور قابل تجدید توانائی کی وزارت کے ذریعے ایک فزیبلٹی اسٹڈی کرنے کے بعد اس کی قابل عملیت کی بنیاد پر مرکزی مالی امداد کے لیے مہورہ پروجیکٹ کی سفارش کی ہے۔ یہ تجویز فی الحال مرکز کے پاس زیر غور ہے۔انچارج وزیر نے یہ بھی بتایا کہ جموں و کشمیر انتظامیہ سرمایہ کاری کو راغب کرنے اور اس شعبے میں نجی شراکت کی حوصلہ افزائی کے لیے ایک نئی ہائیڈرو پالیسی پر کام کر رہی ہے۔ یہ بھی توقع کی جاتی ہے کہ مرکز کی آنے والی قومی ہائیڈرو پالیسی ایسے رکے ہوئے پروجیکٹوں کے لیے مالی مدد فراہم کر سکتی ہے۔قابل ذکر ہے کہ مہورہ پائو رپلانٹ کو جموں وکشمیر کا پہلا پن بجلی پروجیکٹ ماناجاتاہے ۔ اوڑی کے علاقے میں سرینگر مظفرآباد قومی شاہراہ پر دریائے جہلم کے کنارے واقع یہ پاور پروجیکٹ کشمیر میں1992 کے سیلاب کے دوران بند ہو گیا تھا۔ تب سے لے کر اب تک حکومت نے اسے بحال کرنے کے لیے کوئی سنجیدہ کوشش نہیں کی ہے ۔اس پروجیکٹ کی اپنی ایک تاریخ ہے۔ یہ منصوبہ مہاراجہ رنبیر سنگھ کے دور میں قائم کیا گیا تھا، جس میں 1947 کی تقسیم سے پہلے گھوڑا گاڑیوں کے ذریعے راولپنڈی سے مشینری لائی گئی تھی۔جانکارکہتے ہیں کہ کہ مہورہ ہائیڈرو الیکٹرک پروجیکٹ 1902 میں کینیڈا میں پیدا ہونے والے انجینئر میجر ایلین ڈی لٹبنیئر نے تعمیر کیا تھا۔ اسے منفرد خصوصیات کے ساتھ ڈیزائن کیا گیا تھا، جس میں 11 کلو میٹر طویل لکڑی کی ایک نہر بنائی گئی تھی۔ اس منصوبے کو پہلی بار 1959 کے سیلاب کے دوران نقصان پہنچا ، لیکن انجینئرز نے اسے بحال کرنے کے لیے کام کیا، اس کی صلاحیت کو 4 میگاواٹ سے بڑھا کر 9 میگاواٹ کر دیا ۔یہ پروجیکٹ1962 میں جموں و کشمیر حکومت کے حوالے کیا گیا تھا۔تاہم،1992 کے سیلاب کے بعد، یہ ایک بار پھر شدید متاثر ہوا۔
