عظمیٰ نیوز سروس
سرینگر// محکمہ موسمیات کی پیشین گوئی کے مطابق جموں وکشمیر میں 26 جولائی تک موسم گرم اور مرطوب رہنے کا امکان ہے۔ متعلقہ محکمہ کے ایک ترجمان نے بتایا کہ 20 سے 26 جولائی تک کشمیر میں کہیں کہیں گرج چمک کے ساتھ ہلکی بارشیں ہوسکتی ہیں جبکہ اس دوران جموں خطے کے بیشتر مقامات پر بارشوں کا امکان ہے۔ادھر سرینگر میں کل دن کا درجہ 34.4درج کیا گیا۔ اس دوران محکمہ کے ترجمان نے کہا کہ بعد ازاں 27 سے 31 جولائی تک جموں وکشمیر میں گرج چمک کے ساتھ رک رک کر بارشیں متوقع ہیں۔ محکمہ نے اپنی ایڈوائزری میں کہا ہے کہ جموں خطے کے خطرناک مقامات پر مٹی کے تودے اور چٹانیں کھسک آنے کے بھی امکانات ہیں۔
انہوں نے کہا کہ جموں وکشمیر میں 26 جولائی تک گرم اور مرطوب موسم کا سلسلہ جاری رہ سکتا ہے۔ قابل ذکر ہے وادی کشمیر میں بھی شدید گرمی نے لوگوں کو بے حال کر کے رکھ دیا۔ شدید گرمی سے بچنے کے لئے جہاں لوگوں کی اکثریت پہاڑی علاقوں میں واقع سیاحتی مقامات کا رخ کر رہی ہے وہیں بچے گرمی سے راحت حاصل کرنے کے لئے ندی نالوں میں دن بھر نہاتے رہتے ہیں۔شدید گرمی سے راحت پانے کیلئے جہاں لوگوں کی اکثریت پہاڑی علاقوں میں واقع سیاحتی مقامات کا رخ کر رہی ہے وہیں بچے گرمی سے راحت حاصل کرنے کیلئے ندی نالوں میں دن بھر نہاتے رہتے ہیں۔وادی میں گرمی کی شدت بڑھنے کے ساتھ ہی سیاحتی مقامات پر لوگوں کا تانتا بندھا رہتا ہے جبکہ مقامی سیلانیوںکے ساتھ ساتھ ملکی سیاح بھی کافی تعداد میں گلمرگ،سونہ مرگ، پہلگام اور دیگر جگہوں پر بڑی تعداد میں نظر آرہے ہیں۔
