سرینگر // محکمہ موسمیات کی پیش گوئی کے عین مطابق پیر کی شام سے وادی کے شمال جنوب میں ہلکی برف باری اور ہلکی بارشوں کا سلسلہ شروع ہوا ۔اس دوران محکمہ موسمیات کا کہنا ہے کہ اگلے 24 گھنٹوں کے دوران یہی صورتحال رہے گی۔وادی اور جموں میں پیر کی صبح سے ہی مطلع ابر آلود رہا اور وادی میں جہاں سہ پہر بعد ہلکی برفباری و بارشوں کا آغاز ہوا وہاں جموں میں دن بھر ہلکی بارشیں ہوتی رہیں۔ محکمہ موسمیات کے ڈائریکٹر سونم لوٹس کے مطابق 17اور 18جنوری کے بیچ خطہ لداخ اور جموں میں بارشیں جبکہ کشمیر کے بالائی علاقوں میں برف باری ہو گی۔ انہوں نے مزید بتایا کہ 21 اور 22 جنوری کے بیچ بھی وادی میں ہلکے سے درمیانہ درجہ کی برف باری ہونے کا امکان ہے اور اس کے بعد جنوری کے مہینے میں جموں وکشمیر میں برف باری ہونے کا کوئی امکان نہیں ہے ۔کپوارہ سے اشرف چراغ کے مطابق بعددوپہر سے برف باری کا سلسلہ شروع ہوا جو شام دیر گئے تک جارہی تھا ۔ضلع کے بالائی علاقوں میں بھاری برف باری ہوئی ، جس کی وجہ سے کرناہ ، کیرن اور مژھل کی سڑکوں کو ایک بار پھر احتیاطی طور پر گاڑیوں کی آمد ورفت کیلئے بند کر دیا گیا ۔نستہ چھن گلی پر 6انچ تازہ برف جمع ہوئی ، جبکہ پھرکیاں گلی پر 4انچ ، زیڈ گلی مژھل پر 4انچ برف جمع ہوئی ۔آخری اطلاعات ملنے تک ، سادھنا ٹاپ ، شمس بھری پہاڑی سلسلہ ، رامحال کی پہاڑیوں اور بنگس وادی میں برف باری کا سلسلہ جاری تھا ۔بارہمولہ سے فیاض بخاری کے مطابق ضلع میں سوموار کی صبح سے ہی ہلکی بارشوں کا سلسلہ شروع ہوا تاہم بعد دوپہر گلمرگ ،ٹنگمرگ اور رفیع آباد کے بالائی علاقوں میں برف باری کا سلسلہ شروع ہوا جبکہ میدانی علاقوں میں بارشیں جاری رہیں۔ بانڈی پورہ اور بڈگام کے بالائی علاقوں میں بھی برف باری ہوئی۔کنگن سے غلام نبی رینہ کے مطابق ،زوجیلہ ، سونہ مرگ ،گگن گیر ، کلن ،گنڈ اور گنہ ون میں دوپہر کے بعد ہلکی برف باری کا سلسلہ شروع ہوا ۔ادھر گمری اور منی مرگ سے بھی برف باری ہونے کی اطلاعات ہیں ۔جنوبی کشمیر کے اننت ناگ سے عارف بلوچ کے مطابق جواہر ٹنل ، کپرن ، ویری ناگ ، ڈورہ ،سنتھن ٹاپ اورکوکرناگ علاقوں میں دوپہر سے ہلکی برف باری ہوئی ، جبکہ شوپیان کے پہاڑی علاقوں پیر کی گلی ، دبجن ، ہیر پورہ اور سیدھومیں ہلکی برف باری شروع ہوئی ۔ کولگام سے خالد جاوید کے مطابق ضلع کے بالائی علاقوں وٹو اہربل ، دنیو کنڈی مرگ اور باڈی جہلن میں ہلکی برف باری ہوئی ۔پلوامہ سے سید اعجاز کے مطابق شام کے وقت ضلع میں ہلکی برف باری شروع ہوئی ۔دربہ گام، راجپورہ، شادی مرگ،کہلیل اور دیگر بالائی علاقوں میں ہلکی برفباری ہورہی تھی۔ادھر موسم ابرالود رہنے کے نتیجے میں شبانہ درجہ حرارت میں بہتری آئی ۔اتوار اور سوموار کی درمیانی رات سرینگر میں1.0 ڈگری ریکارڈ کیا گیا۔ گلمرگ میں منفی4.6 ، پہلگام میں منفی3.6 ڈگری ریکارڈ کیا گیا ۔
۔18 کی شام تک صورتحال جوں کی توں رہنے کا امکان
