اشرف چراغ +خالد جاوید
کپوارہ+کولگام//شمالی ضلع کپوارہ کے گونی پورہ جگٹیال میں قائم فوجی کیمپ میںحادثاتی طور پر ایک گرینیڈ دھماکہ ہوا جس میں ایک اہلکار ہلاک ہوا۔یہ واقعہ جمعرات کی شام دیرگئے گونی پورہ جگٹیال کے41آر آر کے فوجی کیمپ کے گیٹ پر پیش آیا۔ فوجی اہلکار کے ہاتھ میںایک ہتھ گولہ حادثاتی طور پھٹ گیا جس کے دوران وہاں ڈیوٹی پر تعینات سنتری بھرت یادو ونشی شدید طور پر زخمی ہوا ۔زخمی اہلکار کونزدیکی فوجی اسپتال زانگلی پہنچایاگیا تاہم دوران شب وہ زخمو ں کی تاب نالاکر دم تو ڑ بیٹھا ۔ پولیس نے دفعہ 174کے تحت کیس درج کر کے تحقیقات شروع کر دی ہے۔ادھر جنوبی ضلع کولگام کے مشی پورہ گائوں میں جمعہ کے روز چوتھے دن بھی جنگجو مخالف آپریشن جاری رہا۔ جمعرات کے روز سیکورٹی فورسز نے یہاں دو مقامی جنگجوئوں کوہلاک کرنیکا دعویٰ کیا تھا۔پولیس کے مطابق علاقے میں تیسرا جنگجو بھی محصور ہے جس کی تلاش کی خاطر اضافی کمک کو بھی طلب کیا گیا ہے ۔چوتھے کجر اور مشی پورہ دیہات کے درمیان میوہ باغات کی تلاشی کا کام جاری رہا۔پولیس نے بتایا کہ تیسرا اب بھی علاقے میں محصور ہے جس کی تلاش شدومد سے جاری ہے ۔پولیس نے بتایا کہ مفرور جنگجو کو تلاش کرنے کی خاطر ہیومن انٹیلی جنس کے ساتھ ساتھ ٹیکنالوجی کو بھی بروئے کار لایا جارہا ہے ۔اُن کے مطابق جمعرات کو دو ملی ٹینٹوں کی ہلاکت کے بعد علاقے میں جنگجووں اور فورسز کے مابین دوبارہ آمنا سامنا نہیں ہوا ۔انہوں نے بتایا کہ علاقے کے سبھی داخلی اور خارجی راستوں کو سیل کیا گیا ہے ۔ادھربی ایس ایف نے جموں و کشمیر کے ضلع سانبہ میں بین الاقوامی سرحد پر جمعہ کے روز ایک ٹینک شکن سرنگ کو بر آمد کرکے بعد میں اْسے تباہ کیا۔بی ایس ایف نے بتایا کہ ضلع سانبہ میں بین الاقوامی سرحد کے نزدیک رام گڑھ علاقے میں جمعہ کی صبح بارڈر سیکورٹی فورسز اہلکاروں نے ایک اینٹی ٹینک سرنگ کو بر آمد کیا۔انہوں نے بتایا کہ بم ناکارہ بنانے والی ٹیم کو فوری طورپر جائے موقع پر طلب کیا گیا جنہوں نے انتھک کوشش کے بعد اس کو تباہ کیا۔
