کشتواڑ میں چرس سمیت سمگلرگرفتار

کشتواڑ//کشتواڑ پولیس نے گزشتہ روز ایک سمگلر کو گرفتار کرتے ہوئے اس کے قبضے سے چرس برآمد کرنے کا دعویٰ کیا ہے۔ تفصیلات کے مطابق آپریشن سنجیونی کے بینر تلے پولیس نے سماج دشمن عناصر کے خلاف اپنی مسلسل مہم کو جاری رکھتے ہوئے قصبہ کشتواڑ سے منشیات فروش کو حراست میں لیا ہے۔پولیس نے کشمیر عظمیٰ کو بتایا کہ ایک خاص اطلاع ملنے پر پولیس نے قصبہ کے سنگرام باٹہ علاقے میں ایک خصوصی ناکہ لگایا۔ اسی دوران ایک مشکوک شخص کو گرفتار کر کے اس کے قبضے سے 50 گرام چرس برآمدکی۔ گرفتار شخص کی شناخت منصور احمد ولد بشیر احمد لون ساکنہ ملوانہ تحصیل گندنہ ضلع ڈوڈہ کے طور پر کی گئی ہے۔پولیس نے اس ضمن میں این ڈی پی ایس ایکٹ کے ایک ایف آئی آر زیر نمبر 267/2021 زیر دفعہ 8/20 درج کر کے مزید تحقیقات کا آغاز کر دیا ہے۔