سرائے بالا ،جناب صاحب صورہ اور دیگر مقامات پر بڑے بڑے اجتماعات منعقد
سرینگر//قطب الآفتاب ، پیر کامل شیخ عبدالقادر جیلانیؒحضرت غوث العظم دستگیر ؒ کے سالانہ عرس کی تقریبات کے سلسلے میں کل پوری وادی میں روح پرور تقریبات کا انعقاد کیا گیا ۔سب سے بڑی تقریب حضرت شیخ عبدالقادر جیلانی ؒ سے منسوب آستان عالیہ واقع خانیار میں منعقد ہوئی جہاں پر ہزاروں کی تعداد میں عقیدت مندوں نے شرکت کی اور کووڈ 19کے پیش نظر ہیلتھ گائڈ لائنوں پر عمل پیراہوکرنماز فجر کے بعد ہی درودوازکار کی روح پر ور مجالس کا انعقاد کیا گیا ۔ جبکہ موسم بہتر رہنے اور اچھی خاصی دھوپ نکلنے کے پیش نظر وادی کے اطراف واکناف سے زائرین کی بڑی تعداد نے آستان عالیہ پر حاضری دیکر نماز جمعہ میں شرکت کی اورنمازیوں کی صف بندی خانیار چوک تک رہی ۔نماز کے اختتام کے ساتھ ہی عقیدت مندوں کو شیخ عبدالقادر جیلانیؒ کے تبرکات کے دیدار سے فیضیاب ہوئے ۔ حضرت شیخ سید عبدالقادر جیلانی ؒ کے سالانہ عرس کی تقاریب کے موقعے پر ہر سال کی طرح اس بار بھی اہل وادی نے جوش و خروش اور عقیدت و احترام کا بھرپور مظاہرہ کیا۔ آستان عالیہ خانیار شریف میں بعد عصر تا نماز مغرب ایک سیرتی تقریب منعقد ہوئی جس میں انجمن حمایت الاسلام کے صدر مولانا خورشید احمد قانونگو نے اپنے خراج عقیدت میںکہاکہ آنجنابؒ کی ذات بابرکت خداتعالیٰ کی طرف سے نعمت نصیب ہوئی جن کی تبلیغ واخلاقی انقلاب سے گمراہ عوام راہ راست پر آکر خدمتِ دین میں جُٹ گئے۔ مولاناقانونگو نے کہاکہ آنجنابؒ نے دین اسلام کی جو خدمت کی ہے وہ آبِ زر سے لکھنے کے قابل ہے۔ انہوںنے کہاکہ حضرت شیخ عبدالقادر جیلانیؒ کو بہترین خراج عقیدت یہ ہوگا کہ امت مسلمہ اُنؒکے فرمودات پر عمل پیرا ہوجائیں۔ دستگیر صاحبؒ کے عرس کے سلسلہ میں سرائے بالا میں بھی عقیدتمندوں کی بڑی تعداد نے شب خوانی کی جس کے نتیجے میں علاقہ کی فضائیںروح پرور آوازوں سے گونجتی رہیں۔حضرت غوث العظم ؒ کے تبرکات کے دیدار سے فیضیاب ہوئے اور یہ عمل ہر نماز کے بعد دہرایا گیا۔ادھر آستان عالیہ جناب صاحب صورہ میں بھی لوگوں کی بڑی تعداد نے عرس مبارک کے سلسلے میں منعقدہ تقریب میں حصہ لیا اور جمعہ کی نماز بھی اداکی ۔درگاہ عالیہ رہباب صاحب تجر شریف سوپور کی خانقاہ میں حضرت غوث العظم دستگیرؒ کا عرس منایا گیا ۔ اس دوران وادی کے مختلف علاقوں میںدن بھر لوگوں کی بھاری تعداد نے غوث العظم ؒ کی زیارت گاہوں پر حاضری دی ۔خانقاہ جامع پانپور میںنماز جمعہ کے موقعہ پر مولانا ریاض احمد ہمدانی نے غوث پاک ؒ کی پاک اور مقدس سیرت بیان کرتے ہوئے کہا کہ شاہ جیلانؒ نے اسلام کی جو آبیاری تبلیغ واشاعت اور اُن کے تاریخی اسلامی کارنامے ، روحانی اور علمی کمالات عالم اسلام کی تاریخ میں ایک سنہری باب ہے اور اُن کی تعلیم قرآن وحدیث پر مبنی اور ہمارے لئے مشعل راہ ہے۔ ادھرآثارشریف پنجورہ شوپیان،خانقاہ دستگیرصاحبؒؒبارہمولہ،سونہ وار سرینگر،نادی ہل رفیع آباد،بانڈی پورہ ،کھرم سرہامہ، زچلڈارہ ہندوارہ، اور وادی کے دیگر کئی علاقوں کی مساجد ،خانقاہوں اور درگاہوں میں بھی تقریبات منعقد ہوئیں۔بانہال اور جموں صوبے کے مختلف مقامات پر بھی تقریبات منعقد ہوئیں۔یاد رہے کہ حضرت شیخ عبدالقادر جیلانی ؒ کے عرس کے سلسلے میںتقریبات وادی بھر میں تزک واحتشام اور روایتی عقیدت کے ساتھ منایا جاتا ہے اور اس ضمن میںوادی بھر میں ان کی خانقاہوں پر چراغاںکیا جاتا ہے اور میلے لگائے جاتے ہیں۔اس بار کووڈ 19کے پیش نظر اگرچہ لوگوں نے احتیاطی تدابیر اپنائی تاہم مجموعی طو رپر آستانوں پر لوگوں کا بھار ی رش رہا ۔
