عظمیٰ نیوز سروس
ممبئی// وزیر اعظم نریندر مودی نے ہفتے کے روز کہا کہ آر بی آئی کی ایک رپورٹ کے مطابق، ملک میں پچھلے تین سے چار سالوں میں8 کروڑ نئی ملازمتیں دستیاب ہوئی ہیں، جس نے بے روزگاری کے بارے میں جعلی بیانیہ پھیلانے والوں کو خاموش کر دیا ہے۔شہر میں سڑک، ریلوے اور بندرگاہ کے شعبوں میں 29,000 کروڑ روپے کے پروجیکٹوں کا آغاز اور سنگ بنیاد رکھنے کے بعد ممبئی کے مضافاتی علاقے گورگائوں میں ایک تقریب سے خطاب کرتے ہوئے، وزیر اعظم نے یہ بھی کہا کہ چھوٹے اور بڑے سرمایہ کاروں نے این ڈی اے کی تیسری میعاد کا جوش و خروش کے ساتھ خیرمقدم کیا ہے۔
انہوں نے کہا کہ لوگ جانتے ہیں کہ صرف قومی جمہوری اتحاد کی حکومت ہی استحکام فراہم کر سکتی ہے۔مودی نے حزب اختلاف پر تنقید کرتے ہوئے کہا جس نے حالیہ لوک سبھا انتخابات میں بے روزگاری کو ایک اہم مسئلہ بنایا تھا”آر بی آئی نے حال ہی میں روزگار پر ایک تفصیلی رپورٹ شائع کی ہے۔ رپورٹ کے مطابق پچھلے تین چار سالوں میں تقریبا 8کروڑ نئی ملازمتیں پیدا ہوئیں۔ ان اعداد و شمار نے ملازمتوں کے بارے میں جعلی بیانیہ پھیلانے والوں کو خاموش کر دیا ہے، “۔انہوں نے کہا کہ کورونا وائرس کی وبا کے باوجود پچھلے چار سالوں میں ریکارڈ سطح پر روزگار پیدا ہوا ہے۔پی ایم نے کہا”جو لوگ جعلی بیانیہ پھیلاتے ہیں وہ سرمایہ کاری، انفراسٹرکچر کی ترقی اور ملک کی ترقی کے دشمن ہیں۔ ان کی ہر پالیسی نوجوانوں کو دھوکہ دینے اور روزگار کو روکنے کی ہے۔ اب وہ بے نقاب ہو رہے ہیں کیونکہ لوگ ان کے جھوٹ کو مسترد کر رہے ہیں، “۔انہوں نے کہا کہ ملک میں ہنر کی ترقی اور روزگار کی ضرورت ہے اور ہماری حکومت اس سمت میں کام کر رہی ہے۔مودی نے کہا کہ منصوبے شہر کے قریبی علاقوں کے ساتھ رابطے کو فروغ دیں گے، جو خواتین کے لیے بہتر سہولیات کے ساتھ ساتھ تحفظ کو یقینی بناتا ہے۔وزیر اعظم نے کہا کہ میٹرو پولس میں میٹرو ریل نیٹ ورک کی توسیع کا کام تیزی سے جاری ہے، جو دس سال پہلے صرف 8 کلومیٹر سے بڑھ کر اب 80 کلومیٹر ہو گیا ہے، جب کہ 200 کلومیٹر پر کام جاری ہے۔
