پرائمری اسکولی تعلیم کی تبدیلی

 

سرینگر//سرینگر میونسپل کارپوریشن نے  پرجا فانڈیشن اور عظیم پریم جی فانڈیشن کے ساتھ شہری نظم و نسق کو مزید موثر بنانے اور سرینگر شہر میں پرائمری اسکول کی تعلیم کو تبدیل کرنے کے لیے مفاہمت کی یادداشت پرلیفٹیننٹ گورنر، منوج سنہا کی موجودگی میں دستخط کئے گئے۔لیفٹیننٹ گورنر نے کہا کہ ایس ایم سی اور پرجا فانڈیشن کے درمیان مفاہمت نامے کا مقصد سرینگر میں بہتر ای-گورننس سسٹم اور میونسپل کونسلرز اور انتظامیہ کے لیے صلاحیت سازی کے پروگراموں کے ذریعے شہریوں کی شرکت کو بااختیار بنانا ہے۔لیفٹیننٹ گورنر نے مشاہدہ کیا کہ پرجا فانڈیشن کے تعاون سے شہروں میں اچھی شہری حکمرانی اور پائیداری کے لیے انتھک کوششوں کو مزید تقویت دی جائے گی۔شہری نظم و نسق میں شفاف اور شراکتی عمل وسیع امکانات، شہروں کی زندگی اور اعلی اقتصادی ترقی کے لیے اہم ہیں۔ لیفٹیننٹ گورنر نے مزید کہا کہ شہری نظم و نسق میں اصلاحات سے شہری بنیادی ڈھانچہ، غریبوں کے لیے شہری خدمات میں بہتری آئے گی اور شہروں کو ان کی فطری صلاحیتوں کو بڑھانے میں مدد ملے گی۔لیفٹیننٹ گورنر نے تیز رفتار تبدیلی کے عمل کو عوام کی ضروریات اور امنگوں کا عکاس بنانے اور ایک نئی خود شناسی کو فروغ دینے کے لیے عوام اور پالیسیوں کے درمیان رابطہ قائم کرنے کے لیے اسمارٹ حل، اسمارٹ پلیٹ فارم بنانے کی ضرورت پر زور دیا۔لیفٹیننٹ گورنر نے کہا کہ شہری نظم و نسق میں حکومت کی طرف سے متعارف کرائی گئی اصلاحات کا مقصد بنیادی خدمات جیسے پینے کے پانی، صحت کی دیکھ بھال، صفائی ستھرائی، رہائش اور شہروں میں بہتر معیار زندگی کو بہتر بنانے کے لیے انتہائی ضروری انسانی اور مالی وسائل فراہم کرنا ہے۔انہوں نے مزید کہا کہ آنے والے مستقبل میں شہروں میں بڑے پیمانے پر شہری تبدیلی آنے والی ہے، جس سے معیار زندگی میں بہتری آئے گی اور نئی سرمایہ کاری کو بھی راغب کیا جائے گا۔آج، ہمیں اپنے شہروں کو سمارٹ بنانے کے دوران چند چیلنجوں پر قابو پانا ہے۔ ہمیں سماجی عدم مساوات کو ختم کرنے کے لیے پالیسیاں اور پروگرام بنانا ہوں گے۔لیفٹیننٹ گورنر نے میونسپل کارپوریشن کے عہدیداروں اور دیگر اسٹیک ہولڈرز سے کہا کہ وہ ان چیلنجوں کو سمجھیں اور اس کے مطابق کام کریں۔ لیفٹیننٹ گورنر نے مزید کہا کہ یہ ہماری اجتماعی ذمہ داری ہے کہ ہم لوگوں کو بنیادی کم سے کم سہولیات، ذریعہ معاش اور بہتر خدمات فراہم کریں۔سوامی وویکانند کا حوالہ دیتے ہوئے لیفٹیننٹ گورنر نے کہا کہ عوام کی خدمت کے لیے صرف ایک چیز کی ضرورت ہے انہیں تعلیم دی جائے تاکہ وہ اپنی شخصیت کو نکھار سکیں۔لیفٹیننٹ گورنر نے مزید کہا کہ عظیم پریم جی یونیورسٹی کے ساتھ شراکت داری تمام SMC کے اسکولوں میں تعلیمی منظر نامے کو بہتر بنانے اور اساتذہ اور انتظامی قیادت کی مسلسل پیشہ ورانہ ترقی کے لیے کوشاں رہے گی۔