جموں// کووڈ 19 کے معاملات میں ایک بڑا اضافہ ہونے کا انکشاف کرتے ہوئے محکمہ صحت نے شری ماتا ویشنو دیوی یونیورسٹی کٹرہ میں
820طلباء اور عملہ کے دیگر ارکان کے نمونے لینے کے دوران اب تک 154 طلباء کو کووڈ 19 مثبت پایا۔محکمہ کے عہدیداروں نے کہا کہ انہوں نے یونیورسٹی میں طلباء کے نمونے لینے کے لئے کئی میڈیکل ٹیمیں تعینات کی تھیں۔انہوںنے کہا کہ کیمپس سے کووڈ 19 کے لیے کم از کم 820 نمونے لیے گئے اور 154 کووڈ 19 مثبت کیس نکلے۔ یہ سب غیر علامتی ہیں۔انہوں نے کہا کہ انہوں نے غیر مقامی متاثرہ طلباء کے لیے کیمپس کے اندر ایک الگ تھلگ سہولت قائم کی ہے، اور مقامی طلباء کو گھر سے الگ تھلگ رہنے کی اجازت دی ہے۔عہدیدارنے مزید کہا کہ کیمپس میں نمونے لینے کا عمل جاری رہے گا۔یہاں یہ یاد رہے کہ اس یونیورسٹی میں عملے کے چند ارکان سمیت 35 طلباء کا پہلے ہی کوویڈ 19 مثبت ٹیسٹ کیا جا چکا ہے۔ ضلع مجسٹریٹ ریاسی چرندیپ سنگھ نے بھی حال ہی میں اس یونیورسٹی میں13 کووڈ 19 مثبت معاملات کا پتہ لگانے کے بعد اگلے احکامات تک یونیورسٹی کو بند کرنے کا حکم دیاتھا۔دریں اثنا ادھم پور کے ضلع اسپتال کے او پی ڈی میں 14 مریضوں بشمول ایک 2 سالہ لڑکا اور 6 سالہ لڑکی کوکووڈ 19 مثبت پایاگیا۔ایک عہدیدارنے بتایا کہ یہ لوگ اپنے طبی معائنے کے لیے آئے تھے لیکن ان کے ریپڈ اینٹی جن ٹیسٹ کے دوران ان کا کوویڈ 19 مثبت آیا جس میں ان میں سے بہت سے لوگوں میں ہلکی علامات ہیں۔ان کا کہناتھا’’ان 14 کووڈ 19 مثبت کیسوں میں سے 5 خواتین اور ایک نابالغ بچی کا کوویڈ 19 مثبت آیا ہے ۔زیادہ تر کیس ادھم پور کے مختلف علاقوں سے آئے ہیں، ایک ضلع کی رام نگر تحصیل سے ہے اور ایک ضلع رام بن سے ہے‘‘۔اس کے علاوہ ضلع جموں میں 58 کوویڈ 19 مثبت کیس درج ہوئے ہیں۔حکام نے بتایا کہ 58 مثبت کیسوں میں جموں ضلع کے محکمہ صحت کا ایک نوڈل افسر بھی شامل ہے جو کووڈ کے نمونے لینے کی نگرانی کر رہا تھا۔ اہلکار نے کہا کہ نوڈل افسر نے خود کو الگ تھلگ کر لیا ہے۔کل سے 12 کیسوںکا اضافہ ہوا ہے۔ 03 جنوری 2022 کو جموں ضلع میں 46 کیس ریکارڈ کیے گئے جن میں 2 غیر ملکی مسافر اور 5 مقامی مسافر شامل تھے۔ایک عہدیدارنے بتایا کہ ’’ہر گزرتے دن کے ساتھ کیسوں میں اضافہ ہو رہا ہے۔ ہم سمجھتے ہیں کہ یہ اومیکرون ہو سکتا ہے، لیکن اس کی تصدیق صرف نمونے کی رپورٹوں سے ہو سکتی ہے تاہم، اس میں بہت وقت لگتا ہے‘‘۔انہوںنے بتایا کہ دسمبر کے پہلے ہفتے میں تین نمونوں کی رپورٹس نے اومکرون کی تصدیق کی تھی،اسکے بعد سے رپورٹس کا انتظار کیا جا رہا ہے۔ ہم نے 1600 سے زیادہ نمونے بھیجے ہیں اور 350 کی رپورٹ کا ابھی انتظار ہے۔جموں خطے بھر سے 90 کیسوں کا پتہ چلا ہے جن میں راجوری میں 3، ڈوڈہ میں 3، کٹھوعہ میں 7 کیس بشمول 1 مسافر، 2 سانبہ، 1 کشتواڑ، 9 پونچھ، 4 رام بن میں اور ضلع ریاسی میںکوئی مثبت کیس سامنے نہیں آیا ہے۔
پٹنی ٹاپ آنے والوں کیلئے ریپڈ اینٹی جن ٹیسٹ لازمی
ایم ایم پرویز
رام بن// گزشتہ چند دنوں سے اومیکرون خطرے اور کورونا معاملات میں اضافے کے پیش نظرڈسٹرکٹ مجسٹریٹ رام بن نے منگل کو پتنی ٹاپ آنے والے سیاحوں کیلئے RATٹیسٹ کرنے کو لازمی قراردیا ہے ۔یہ حکم منگل سے اگلے احکامات تک نافذ العمل رہے گا۔چیف میڈیکل آفیسر رام بن کو پٹنی ٹاپ پر فوری طورجانچ کی سہولت قائم کرنے کو کہاگیااور انہیں مزید ہدایت کی گئی کہ وہ پٹنی ٹاپ پر ایک ڈاکٹر کی قیادت میں ایک طبی ٹیم کو مطلوبہ ادویات / آلات کے ساتھ تعینات کرے۔سینئر سپرنٹنڈنٹ آف پولیس رام بن سے کہا گیا کہ وہ اس حکم کے نفاذ کو یقینی بنائیں ۔
