سری نگر// قومی تحقیقاتی ادارہ (این آئی اے) نے مزاحمتی محاذ (ٹی آر ایف) گروپ کے ایک آپریٹو ارسلان فیروز کو مبینہ طور پر انتہا پسندی اور نوجوانوں کو جنگجوﺅں کی صفوں میں شامل ہونے کے لیے بھرتی کرنے کے الزام میں گرفتار کیا ہے۔
ایجنسی کے ایک ترجمان نے بتایا کہ جمعرات کو کشمیر میں تلاشی لی گئی جس کے دوران شہر سری نگر کے رہائشی فیروز کو گرفتار کیا گیا۔
یہ مقدمہ کالعدم لشکر طیبہ تنظیم کی سایہ دار تنظیم ٹی آر ایف کے کمانڈروں سجاد گل، سلیم رحمانی عرف ابو سعد اور سیف اللہ ساجد جٹ کی طرف سے یونین ٹیریٹری اور ملک کے دیگر حصوں میں پرتشدد سرگرمیوں میں شامل ہونے کے لیے جموں و کشمیر کے نوجوانوں کو بنیاد پرستی، بھڑکانے اور بھرتی کرنے کے الزام میں درج کیا گیا ہے.
حکام کے مطابق فیروز، ان لوگوں کے ساتھ ایک مجرمانہ سازش کے تحت پہلے سے طے شدہ اہداف کی جاسوسی کے لیے افراد کو بھرتی کرنے کے علاوہ لشکر اور اس کے فرنٹ ملحقہ، ٹی آر ایف کی مدد کے لیے ہتھیاروں کی نقل و حمل میں بھی تعاون کر رہا تھا۔
ایجنسی اب تک اس معاملے میں چار ملزمان کو گرفتار کر چکی ہے۔
