جموں// وزیر اعظم نریندر مودی 24اپریل کو ’پنچایتی راج ڈے‘ کے موقع پر جموں و کشمیر کا دورہ کریں گے جس کے دوران وہ پنچایتی راج اداروں کے ارکان سے بات چیت کریں گے، صنعتی سرمایہ کاری کا آغاز کریں گے اور مختلف ترقیاتی منصوبوں کا افتتاح کریں گے یا سنگ بنیاد رکھیں گے۔
سرکاری ذرائع کے مطابق 24اپریل کو پنچایتی راج ڈے کے موقع پر وزیر اعظم کے جموں و کشمیر کے دورے کو حتمی شکل دے دی گئی ہے اور اس موقع کو مرکزی زیر انتظام حکومت کی جانب سے کئی ترقیاتی منصوبوں کے افتتاح اور سنگ بنیاد رکھنے کے لیے بھی استعمال کیا جائے گا۔
پنچایتی راج دن ہر سال 24اپریل کو پورے ملک میں منایا جاتا ہے۔ گزشتہ کچھ سالوں کے دوران، مودی اس موقع پر پنچایت ممبران سے بات چیت کے لیے مختلف ریاستوں کا سفر کر رہے ہیں۔اس سال، جموں اور کشمیر کو وزیر اعظم کے دورے کے لئے منتخب کیا گیا ہے۔
ذرائع نے کہا کہ مرکزی حکومت یوٹی حکومت کے ساتھ مشاورت سے تقریب کے مقام کو حتمی شکل دے گی۔ غالب امکان یہ ہے کہ تقریب جموں میں ہوگی۔
وزیر اعظم پنچایتی راج اداروں بشمول ضلع ترقیاتی کونسلوں ، بلاک ترقیاتی کونسلوں اور پنچایتوں (سرپنچوں اور پنچوں) سے خطاب کریں گے۔
جموں و کشمیر کی خصوصی حیثیت کے خاتمے اور سابقہ ریاست کو دو مرکز کے زیر انتظام علاقوں جموں و کشمیر اور لداخ میں تقسیم کرنے کے بعد سرحدوں کے علاوہ یہ وزیر اعظم کا جموں و کشمیر کا پہلا دورہ ہوگا۔ تاہم، انہوں نے 27اکتوبر 2019کو راجوری اور 3نومبر 2021 کو جموں ڈویژن کے نوشہرہ سیکٹر میں فوجی جوانوں کے ساتھ دیوالی منائی تھی۔ ریاست کے طور پر جموں و کشمیر کا ان کا آخری دورہ 3فروری 2019کو تھا جب انہوں نے تینوں خطوں بشمول جموں، سری نگر اور لداخ کا دورہ کیا تھا اور ہزاروں کروڑ روپے کے پروجیکٹوں کا آغاز کیا تھا۔
