مزید خبریں

سرینگر// ڈسٹرکٹ پنچایت الیکشن آفیسر (ڈی پی ای او) کپوارہ انشول گرگ نے آج ضلع ترقیاتی کونسل (ڈی ڈی سی) انتخابات کیلئے ڈالے گئے ووٹوں کی گنتی کے انتظامات کو حتمی شکل دے دی۔انہوں نے کائونٹنگ مراکز کی تیاری ، سکیورٹی انتظامات ، مجسٹریٹ کی تقرری ، عملے کی تربیت ، کوویڈ 19 ایس او پیز کی پاسداری اور ٹریفک مینجمنٹ کے علاوہ مناسب گرمی، روشنی اور پینے کے پانی کی سہولیات کی دستیابی سمیت مختلف انتظامات پر تبادلہ خیال کیا۔انہوں نے تمام پارٹی ایجنٹوں کو اعتماد میں لیتے ہوئے غیر جانبدارانہ اور شفاف گنتی کے عمل کے لئے متعلقہ افسران سے اپیل کرتے ہوئے کہا کہ گنتی صبح 9 بجے آئی ٹی آئی کپوارہ ، جے این وی پوتشائی ، آئی ٹی آئی ہندوارہ اور منی سیکریٹریٹ ٹنگڈارمیں شروع ہو گی۔انشل گرگ نے کہا کہ ووٹوں کی گنتی کو یقینی بنانے کے لئے متعلقہ آر اوز کو سہولیات فراہم کرنے کے لئے نوڈل افسران پہلے ہی مقرر کیے گئے ہیں۔ انہوں نے کہا کہ گنتی کے عمل میں شامل عہدیداروں کو ٹرانسپورٹ اور دیگر سہولیات فراہم کی جائیں گی۔ڈی پی ای او نے متعلقہ آر اوز کو یہ بھی ہدایت دی کہ اسٹورونگ رومز کی افتتاحی ویڈیو گرافی ہو۔اس سے قبل گنتی کوآسانی سے انجام دینے کے طریقہ کار اور ضروری تکنیکی معلومات سے متعلق متعلقہ افسران کو آگاہ کیا۔اجلاس میں اے ڈی سی ہندوارہ نذیر احمد میر ، ڈپٹی ڈسٹرکٹ پنچایت الیکشن آفیسر ، بشیر احمدبٹ ، ریٹرننگ افسران، اسسٹنٹ ریٹرننگ افسران ، گنتی کے نگران ، ماسٹر ٹرینراور دیگر متعلقہ افراد موجود تھے۔دریں اثنا ، کرناہ سب ڈویڑنل مجسٹریٹ (ایس ڈی ایم) ڈاکٹر بلال محی الدین بٹ جو ڈی ڈی سی حلقہ کرناہ کے ریٹرننگ آفیسر بھی ہیں ، نے ڈی ڈی سی انتخابات کی گنتی کے ہموار اور منصفانہ انعقاد کے انتظامات کو حتمی شکل دے دی۔ضلع پنچایت الیکشن آفیسر (ڈی پی ای او) گاندربل شفقت اقبال نے فزیکل کالج کا دورہ کیا جہاں گنتی مراکز قائم ہیں۔انہوں نے ضلع کے 14 ڈسٹرکٹ ڈیولپمنٹ کونسل (ڈی ڈی سی) حلقوں کے لئے ووٹوں کی گنتی کے لئے رکھے گئے انتظامات کا معائنہ کیا ، جس کی شروعات آج صبح 9 بجے سے پنڈال سے ہوگی۔ڈی پی ای او نے کہا کہ گنتی کے ہال ، پبلک ایڈریس سسٹم ، سیکورٹی اور ووٹوں کی گنتی آسان اور شفاف عمل کے لئے ضروری انتظامات کے سلسلے میں تمام انتظامات ترتیب دیئے گئے ہیں۔انہوں نے تمام سیاسی جماعتوں اور مقابلہ کرنے والے امیدواروں سے گنتی کے عمل کے دوران متعلقہ عملہ سے تعاون بڑھانے کی اپیل کی اور مزید کہا کہ پوری شفافیت کو یقینی بنانے کے لئے گنتی کی پوری مشق کی نگرانی کی جائے گی۔سیکورٹی انتظامات کے بارے میں ڈی پی ای او کو بتایا گیا کہ سیکورٹی کے وسیع انتظامات کئے گئے ہیں تاکہ گنتی کا عمل پر امن طریقے سے انجام پایا جاسکے۔ڈی پی ای او نے آر اوز اور اے آر اوز کو ہدایت دی کہ وہ گنتی کے دوران طے شدہ طریقہ کار پر عمل کریں اور گنتی سے متعلق معلومات اور تفصیلات کی ایک جامع اور درست نظام کو یقینی بنائیں۔دورے کے دوران ایڈیشنل ڈپٹی کمشنر گاندربل فاروق احمد بابا ، اے سی آر بصیر احمد ، ایس ڈی ایم کنگن اور ڈی آئی او گاندربل بھی ان کے ہمراہ تھے۔ڈسٹرکٹ پنچایت الیکشن آفیسر (ڈی پی ای او) پلوامہ ڈاکٹر راگھو لنگرنے ڈی ڈی سی انتخابات کے مقابلہ کرنے والے امیدواروں کے اجلاس کی صدارت کی اور انہیں ووٹوں کی گنتی کے حوالے سے مختلف پہلوؤں کے بارے میں آگاہ کیا۔ڈی پی ای او نے متعلقہ افراد کو یقین دلایا کہ ریاستی الیکشن کمیشن (ایس ای سی) کی ہدایت کے مطابق ووٹوں کی گنتی آزاد اور شفاف ماحول میں کی جائے گی۔انہوں نے بتایا کہ ضلع بھر کے تمام مراکز میں صبح 9 بجے گنتی کا آغاز ہو گا اور انہوں نے مزید کہا کہ بیلٹ پیپروں کی گنتی شفاف طریقے پر کی جائے گی۔ دریں اثنا انہیں بتایا گیا کہ پوری شفاف نظام کے لئے گنتی کی پوری مشق کی نگرانی اور ریکارڈنگ کی جائے گی۔ڈی پی ای او نے تمام امیدواروں سے گنتی کے عمل کے دوران گنتی عملہ کے ساتھ اپنا مکمل تعاون کرنے کی اپیل کی اور مزید کہا کہ ریٹرننگ افسران گنتی کے عمل کے انچارج ہوں گے۔ان کا مزید کہنا تھا کہ گنتی ہالوں اور مطلوبہ عملہ کے حوالے سے تمام انتظامات مناسب طریقے سے ترتیب دیئے گئے ہیں۔ میٹنگ میں ایڈیشنل ڈپٹی کمشنر پلوامہ ، ترال اور اونتی پورہ ، ایس پی پلوامہ آشیش مشرا ،ڈپٹی ڈسٹرکٹ الیکشن آفیسر ، ریٹرننگ آفیسر ، مبصرین ، مختلف سیاسی جماعتوں کے انتخابی امیدوار ، آزاد امیدوار اور دیگر متعلقہ افسران اور عہدیداران نے شرکت کی۔ڈسٹرکٹ الیکشن آفیسر (ڈی ای او) بارہمولہ ڈاکٹر جی این ایتو نے آج گنتی کے عمل کو ہموار اور شفاف طریقے سے انجام دینے کے لئے رکھے گئے انتظامات کو حتمی شکل دینے کے لئے ضلع کے گنتی مراکز کا معائنہ کیا۔اس موقع پر ڈی ای او نے گورنمنٹ ڈگری کالج بوائز بارہمولہ ، سکاسٹ واڈورہ اور آئی ٹی آئی پٹن کا دورہ کیا جہاں ڈی ڈی سی اور یو ایل بی انتخابات کیلئے ووٹوں کی گنتی کے انعقاد کے لئے مراکز قائم کیے گئے ہیں۔دریں اثنا ، ڈی ای او نے مختلف متعلقہ افسران کا اجلاس طلب کیا جس میں انہوں نے ووٹوں کی گنتی کو آسانی انجام دینے کو یقینی بنانے پر زور دیا۔انہوں نے متعلقہ افراد کو ہدایت دی کہ وہ گرمی ، روشنی اور دیگر ضروری انتظامات کو یقینی بنائیں تاکہ اس عمل سے وابستہ عملے کو کسی قسم کی تکلیف کا سامنا نہ کرنا پڑے۔ 

 

 

 

 

 

 

 

 

 

 

ارشاد احمد

گاندربل//حکومت جموں کشمیرکے سابق ڈائریکٹر جنرل معاشیات و شماریات جی اے قریشی نے سنٹرل یونیورسٹی کشمیر میں ایک تقریب کے دوران شعبہ معاشیات میں’’جموں و کشمیر میں پنچایتی راج اور لوکل ایریا ڈیولپمنٹ‘‘ کے موضوع پر خصوصی درس دیا۔تقریب سے قبل شعبہ اکنامکس کے سربراہ پروفیسر جی ایم بٹ نے مہمان کا سنٹرل یونیورسٹی کشمیر کی آمد پر استقبال کیا اور ان کی جانب سے خطاب دینے پر ان کا شکریہ ادا کیا۔قریشی نے اپنے خطاب کے دوران جموں و کشمیر میں پنچایتی راج نظام کے تاریخی پس منظر پر مفصل روشنی ڈالی۔انہوں نے کہا کہ جموں و کشمیر میں پنچایتی راج نظام اس وقت کے مہاراجہ نے 1935 میں متعارف کرایا تھا اور حکومت نے اسے مضبوط بنانے کے لئے بہت سے اقدامات کئے تھے۔انہوں نے جموں وکشمیر میں پنچایت راج اداروں کی مختلف سطحوں کی تشکیل، اختیارات اور افعال کے بارے میں بھی وضاحت کی۔انہوں نے مزید کہا کہ جموں کشمیر میں نئے ضلع ترقیاتی کونسلوں کے ڈھانچے ،ان کی تشکیل اور اہمیت پر بھی وضاحت کی۔تقریب کے اختتام پر اسسٹنٹ پروفیسرتسلیم عارف نے شکریہ کی تحریک پیش کی۔

 

 

 

 سرینگر//اننت ناگ میں مویشی چوری کا سلسلہ جاری ہے۔ اتوار اور سوموار کی درمیانی رات کو چوروںنے ایک اورواقعہ میں گائو خانے سے قریب 2لاکھ روپئے مالیت کے مویشی چرالئے۔گزشتہ تین راتوں میں مویشی چوروں نے 5گائیں اور 5بچھڑے چرالئے ہیں جن کی مالیت 6لاکھ روپے کے قریب بتائی جارہی ہے ۔ تازہ واقعہ میں اتوار اور سوموار کی درمیانی رات کو چوروںنے گرانگسو اننت ناگ میں غلام حسن کھانڈے کے گائو خانے سے 2گائیں اور 2بچھڑے چرا لئے ہیں ۔مقامی لوگوں نے اس سلسلے میں پولیس حکام سے مداخلت کی اپیل کی ہے۔ سی این آئی

 

 

 

 سرینگر//اونتی پورہ پولیس کی جانب سے منشیات مخالف بیداری مہم کے تحت پیر کو پانپورتھانہ میں’’معاشرے میں منشیات کے استعمال کے مضر اثرات‘‘کے بارے میں جانکاری پروگرام کا اہتمام کیا۔ پانپور سے تعلق رکھنے والے طلبہ اور علاقے کے معزز شہریوں نے پروگرام میںشرکت کی جس میں ایس ڈی پی او پانپوراور ایس ایچ او پانپور نے عوام سے گفتگو کی۔پانپور تھانہ میں بات چیت کے بعد ایس ڈی پی او اور ایس ایچ او کی سربراہی میں منشیات کے استعمال اور معاشرے پر اس کے مضر اثرات کے خلاف جانکاری پیدا کرنے کے لئے ایک ریلی نکالی گئی ۔ ریلی پانپور تھانہ سے شروع ہوکر کدلہ بل اور درنگہ بل سے ہوتے ہوئے نمبلہ بل تک نکالی گئی ۔عوام نے اونتی پورہ پولیس کی جانب سے منشیات کی روکتھام کے سلسلے میں کئے جارہے اقدامات کی کافی سراہنا کی۔

 

 

 

 

غلام بنی رینہ+اشرف چراغ

کنگن+کپوارہ// گاندربل پولیس نے سویک ایکشن پروگرام کے تحت گنڈ میں ضرورتمند لوگوں میں کووڈ سے محفوظ رہنے کیلئے سیفٹی کٹ تقسیم کئے۔ ایس ڈی پی او کنگن سید یاسر قادری نے ایس ایس پی گاندربل کی ہدایت پرگنڈ تھانہ میں مستحق افراد میں کووڈ کٹ تقسیم کئے۔ اس موقع پر ایس ایچ او گنڈ سید سجاد احمد اور پولیس کے دیگر افسران بھی وہاں موجود تھے ۔پروگرام میں شریک لوگوں نے پولیس کا شکریہ ادا کیا۔اس موقع پر ایس ڈی پی او کنگن سیدیاسر قادری نے کہا کہ گنڈ کے باقی علاقوں میں بھی سویک ایکشن پروگرام منعقد کئے جائیں گے اور غریب کنبوں میں سیفٹی کٹ تقسیم کئے جائیں گے۔ادھر کورونا وائرس جیسی خطرناک وبا سے روکتھام کے لئے ہندوارہ پولیس نے ضرورتمند لوگوں تک پہنچنے کے لئے اپنی کوششوںکو جاری رکھتے ہوئے ہندوارہ، راجوار، ماور اوررامحال علاقوںمیں غریب اور نادار لوگوں میںکووڈسیفٹی کٹس تقسیم کئے ۔یہ پروگرام ہندوارہ پولیس نے پولیس لائنز ہندوارہ میں منعقد کیا جس دوران ایس پی ہندوارہ ڈاکٹر سندیپ چکروردی نے کووڈسیفٹی کٹس تقسیم کئے۔اس موقع پر ایس پی ہندوارہ مشکور احمد، ڈی وائی ایس پی محمد رقیب ملک ودیگر افسران موجودتھے۔لوگوں نے ہندوارہ پولیس کا شکریہ اداکیا۔

 

 

 

 

سرینگر// نیشنل کانفرنس صدر ڈاکٹر فاروق عبداللہ نے پارٹی کے دیرینہ رکن حاجی عبدالاحدر ڈار ساکن فرصل کولگام کے انتقال پرگہرے صدمے کا اظہار کیا ہے۔ انہوں نے اس سانحہ ارتحال پر مرحوم کے جملہ سوگواران کے ساتھ تعزیت کا اظہار کیا اور مرحوم کی جنت نشینی کیلئے دعا کی۔پارٹی کے نائب صدر عمر عبداللہ، سینئر لیڈر سکینہ ایتو، جنوبی زون صدر ڈاکٹر بشیر احمد ویری، ضلع صدر کولگام ایڈوکیٹ عبدالمجید لارمی اور ترجمان عمران نبی ڈار نے بھی اس سانحہ ارتحال پر تعزیت کا اظہار کیا ہے۔

 

 

سرینگر//معروف اسکالر پروفیسر جوہر قدوسی کی والدہ کی وفات کے سلسلے میں محفل بہار ادب شاہورہ کے صدر اورریٹائرڈ ڈسٹرکٹ انفارمیشن آفیسر حمید اللہ حمید کی صدارت میں ایک تعزیتی مجلس منعقد ہوئی ۔ اجلاس میں ڈاکٹر جوہر قدوسی سے اظہار تعزیت کرتے ہوئے مرحومہ کے حق میں مغفرت کی دعا کی گئی اورمرحومہ کے ایصال ثواب کے لئے فاتحہ خوانی کی گئی ۔

 

 

 

 

 

موں//لیفٹیننٹ گورنر کے مشیر راجیو رائے بھٹناگر نے  صحت و طبی تعلیم محکمہ کے بڑے پروجیکٹوں کی طبعی اور مالی پیش رفت کا جائزہ لینے کے لئے ایک اعلیٰ سطحی میٹنگ کی صدارت کی ۔ اِن پروجیکٹوں پر پی ایم ڈی پی ، مرکزی معاونت والی سکیموں اور دیگر سکیموں بشمول اے آئی آئی ایم ایس جموں اور اے آئی آئی ایم ایس کشمیر کے تحت مختلف تعمیراتی ایجنسیاں کام کر رہی ہیں ۔میٹنگ کے دوران عمل درآمد کرنے والی ایجنسیوں کے ذریعہ شروع کئے گئے تمام بڑے پروجیکٹوں کے کاموں کی موجودہ صورتحال پر تفصیلی تبادلہ خیال کیا گیا ۔ اس کے علاوہ ان کاموں میں حائل رُکاوٹوں پر بھی تفصیل سے غور و خوض کیا گیا۔مشیر نے اننت ناگ ، بارہمولہ ، ڈوڈہ ، کٹھوعہ اور راجوری کے نئے قائم میڈیکل کالجوں کے لئے طبی سازوسامان اور فرنیچر کی خریداری کے کاموں کا بھی جائزہ لیا۔ اِس کے علاوہ ان کالجوں کے لئے فیکلٹی پوزیشن اور پیرا میڈیکل سٹاف کا بھی جائزہ لیا گیا۔اے آئی آئی ایم ایس وِجے پور سانبہ کے بارے میں مشیر کو جانکاری دی گئی کہ بیرونی کام مکمل طور پر مکمل ہورہے ہیں ۔اس کے علاوہ تعلیمی سیشن 2020-21ء کے لئے ایم بی بی ایس کے پہلے بیچ کی کلاسز عارضی انتظام کی بنیاد پر جی ایم سی کٹھوعہ سے شروع کی گئیں۔اِسی طرح اے آئی آئی ایم ایس اونتی پورہ سے متعلق مشیر کو جانکاری دی گئی کہ بیرونی کام مکمل ہونے کو قریب ہیںاور روڈ کی تعمیر کا کام شد و مد سے جاری ہے ۔ اِس کے علاوہ تعلیمی سیشن 2021-22کے لئے ایم بی بی ایس کا پہلا بیچ شروع کرنے کا انتظام بھی کیا گیا ہے۔مشیر بھٹناگر نے متعلقہ عمل آوری ایجنسی کو ہدایت دی کہ وہ کام کی رفتارمیں سرعت لائیں تاکہ ان بڑے پروجیکٹوں کو مقررہ مدت کے اندر مکمل کر کے جلد از جلد عوام کو وقف کیا جاسکے۔مشیر نے جے کے پی سی سی کے ذریعے انجام دئیے جانے والے جی ایم سی اننت ناگ اور جی ایم سی بارہمولہ  منصوبوں کے بارے میں کاموں کی موجودہ حیثیت کا تفصیلی پروجیکٹ وار جائزہ لیا ۔ایم ڈی جے کے پی سی سی نے مشیر کو ایجنسی کے ذریعہ عمل میں لائے جانے والے مختلف پروجیکٹوںکی پیش رفت کے بارے میں جانکاری دی۔مشیر نے ایم ڈی جے کے پی سی سی کو ہدایت دی کہ وہ کام کی رفتارمیں سرعت لائیں اور اُن رُکاوٹوں کو دُور کریں جو کاموں کی رفتار میں رکاوٹ ہیں اور الاٹ شدہ تمام منصوبوں کو مقررکردہ مدت کے اندر مکمل کریں۔ اُنہوں نے ایم ڈی جے کے پی سی سی پر زور دیا کہ وہ نئے تعلیمی سیشن کے آغاز سے پہلے کلاس روموں اور لیبارٹریوں پر کام مکمل کرے جس کے لئے داخلے جاری ہیں۔ آر اینڈ بی جموں کے ذریعہ سرانجام دئیے جارہے جی ایم سی ڈوڈہ، کٹھوعہ اور راجوری منصوبوں کے بارے میں مشیر کو بتایا گیا کہ ان منصوبوں پر کام شدو مدسے جاری ہے اور ان کو مقررہ مدت کے اندر مکمل کیا جائے گا۔مشیر کو یہ بھی بتایا گیا کہ مرکزی معاونت والی سکیموں کے مرحلہ سوم کے تحت ہندواڑہ اور ادھمپور کے لئے دو نئے میڈیکل کالجوں کی منظوری دی گئی ہے جس کے لئے مطلوبہ رسمی کاموں کا آغاز کردیا گیا ہے اور پی ڈبلیو ڈی (آر اینڈ بی) سول ورکس کو انجام دینے کے لئے عمل آوری ایجنسی کی حیثیت سے مصروف ہے۔مشیر بھٹناگرنے افسران کو ہدایت دی کہ وہ ان کالجوں پر جلد سے جلد کام شروع کریں۔ اس کے علاوہ ایم سی آئی کے رہنما خطوط کے مطابق پوسٹس بنانے کا عمل بھی پہلے سے شروع کیا جانا چاہئے۔اِسی طرح مشیر بھٹناگر نے حکومت کے دیگر صحت پروجیکٹوں یونانی میڈیکل کالج اور ہسپتال گاندربل ، گورنمنٹ آیورویدک میڈیکل کالج و ہسپتال جموں اور پانچ نرسنگ کالج جموں ، کشتواڑ ، سوپور ، بارہمولہ اور اننت ناگ (پی ایم ڈی پی کے تحت منظور شدہ) کو جے کے ایچ بی اور جے کے پی ایچ سی جیسے مختلف اداروں نے منظوری دی ہے، کا تفصیلی جائزہ لیا۔ عمل آوری ایجنسیوں کے افسران نے مشیر کو ان منصوبوں کی صورتحال سے آگاہ کیا اور انہیں جانکاری دی گئی کہ ان اہم منصوبوں پر کام سرعت سے جاری ہے۔منظوری دینے والی ایجنسیوں کے افسران سے خطاب کرتے ہوئے مشیر بھٹناگر نے انہیں ہدایت دی کہ وہ اپنے افرادی قوت اور مشینری کو تیار رکھیں تاکہ زمین پر نتائج کے حصول کے لئے مطلوبہ کام کی رفتار کو برقرار رکھا جاسکے۔مشیر نے ایجنسیوں کے اعلی افسران سے کہا کہ وہ پروجیکٹو ں پر ذاتی طور پر دورہ کریں تاکہ معاملات کو زمینی سطح پر حل کئے جائیں۔دورانِ میٹنگ فائنانشل کمشنر صحت و طبی تعلیم اَتل ڈولو نے عمل آوری اَفسران اور نمائندوں سے کہا کہ وہ کاموں کی رفتار میں سرعت لائیںتاکہ منصوبوں کو وقت پر مکمل کر کے عوام کو وقف کیا جاسکے۔

 

 

 

 

جموں// نیشنل کانفرنس نے پارٹی صدر ڈاکٹر فاروق عبداللہ کی جائیدادیں منسلک کرنے کی کارروائی کو سیاسی انتقام گیری قرار دیا ہے جس کا مقصد جموں و کشمیر کی کلیدی اور اہم سیاسی جماعتوں کو کمزور کرنا ہے۔ پارٹی کے صوبہ جموں کے لیڈران نے اپنے ایک مشترکہ بیان میں کہا کہ یہ کارروائی نیشنل کانفرنس کی جڑیں مزید مستحکم ہونے سے بی جے پی کو ہورہی مایوسی کی عکاس ہے ۔ اُن کا کہنا تھا کہ اس طرح کے مذموم ہتھکنڈے نیشنل کانفرنس ،کی پیش قدمی کو نہیں روک سکتے۔ لیڈران نے کہا کہ ڈی ڈی سی انتخاب کے اختتام پر مذموم کارروائی معاملے کو مزید سنگین بنا دیتی ہے اور کارروائی کا وقت بھاجپا کے ارادوں پر سوالات کھڑے کرتا ہے،جس نے اپنے سیاسی ایجنڈے کو آگے بڑھانے کے لئے ایجنسیوں کو استعمال کرنے میں مہارت حاصل کر لی ہے۔ مشترکہ بیان میں کہا گیا کہ نیشنل کانفرنس کا پورا کیڈر آزمائش کی اس گھڑی میںڈاکٹر فاروق عبداللہ کیساتھ شانہ بہ شانہ کھڑا ہے، متحد ہوکر چیلنجوں کا سامنا کرنا نیشنل کانفرنس کی تاریخ رہی ہے، پارٹی نے ہمیشہ ہمت اور حوصلے کیساتھ آزمائشوں کا مقابلہ کیا ہے اور اس بار بھی پارٹی کیڈر متحد ہوکر چیلنجوں کا بہادری کیساتھ مقابلہ کرنے کیلئے پُرعزم ہے۔ نیشنل کانفرنس لیڈران نے پارٹی صدر ڈاکٹر فاروق عبد اللہ سے اظہار یکجہتی کرتے ہوئے کہا کہ بی جے پی حد سے زیادہ نیچے گر کر بھی اپنے مخالفین کو بدنام کرنے میں ناکام اور نامراد ہی رہے گی۔ مشترکہ بیان کے دستخط کنندگان میں پارٹی صدرِ صوبہ جموں دیوندر سنگھ رانا، سینئر لیڈران اجے سدھوترا، سرجیت سنگھ سلاتیہ، سردار ہربنس سنگھ، رتن لعل گپتا، شیخ بشیر احمد، سجاد احمد کچلو، سید مشتاق احمد بخاری، جاوید احمد رانا، خالد نجیب سہروردی، اعجاز جان، ڈاکٹر گگن بھگت، سورن لتا، پریم ساگر عزیز، دلشادہ ملک شامل ہیں۔ 

 

 

 

سرینگر//فاروق عبداللہ کی جائیداد کو اینفورسمنٹ ڈائریکتوریٹ کی طرف سے منسلک کرنے کو کشمیرمیں سیاسی انتقام گیری سے دیکھاجارہا ہے۔اس بات کا اظہار سابق مرکزی وزیر پروفیسر سیف الدین سوز نے ایک بیان میں کیا ہے ۔انہوں نے کہا کہ جموں کشمیر کے سابق وزیراعلیٰ عمر عبداللہ نے اینفورسمنٹ دائریکٹوریٹ کی  ڈاکٹر فاروق عبداللہ کی جائیداد منسلک کرنے کی کاررائی پر صحیح ردعمل کا اظہار کرتے ہوئے کہا کہ وہ اس معاملے کو عدالت میں لیجائیں گے۔سوزنے کہا کہ شاید یہ بہترین طریقہ ہے جو اس کنبے کو میسر ہے۔انہوں نے کہا کہ جموں کشمیر کرکٹ ایسوسی ایشن کے معاملات کی تحقیقات کرناحکومت کافرض ہے لیکن اینفورسمنٹ ڈائریکتوریٹ کی فوری کارروائی کو کشمیرمیں سیاسی انتقام گیری کی نظر سے دیکھا جارہاہے ۔ سوز نے کہا کہ نینشل کانفرنس کے رہنما نے دفعہ370کی تنسیخ کی مذمت کرتے ہوئے اِسے غیر قانونی اور غیرآئینی قراردیا اور اس کا سیاسی طور مقابلہ کرنے کا عزم ظاہر کیا جس کی وجہ سے مرکزکے اہم حصوں میں بے چینی پیدا ہوئی ۔

 

 

 

سرینگر //پیپلز ڈیموکریٹک پارٹی نے دو سینئر لیڈران کی گرفتاری کی شدید الفاظ میں مذمت کی ہے ۔پی ڈی پی سینئر لیڈر محمد سرتاج مدنی اور پیر زادہ منصور حسین کی گرفتاری کی مذمت کرتے ہوئے پارٹی نے اس کارروائی کو سیاسی انتقام گیری سے تعبیر کیا  ۔پارٹی کے سرینگر  کے ضلع صدر اور سابق ایم ایل سی محمد خورشید عالم نے  ایک بیان میں کہا کہ جموں و کشمیر میں جمہوری اداروں کی مضبوطی کے دعویٰ بے بنیاد ثابت ہو رہے ہیں ۔ عالم نے کہا کہ محمد سرتاج مدنی اور پیرزادہ منصور کی گرفتاری نے ایک بار پھر یہ بات ثابت کر دی ہے کہ لوگوں کے حقوق کو یہاں پامال کیا جارہا ہے اور اختلاف کرنے کی ہمت رکھنے والوں کو سرکاری ایجنسیوں کی طرف سے انتہائی مذموم اور غیر جمہوری انداز میں خوفزدہ کیا جاتا ہے۔انہوں نے کہا کہ پارٹی کے دونوں سینئر رہنماؤں کی گرفتاری حکومت کی جانب سے غیر منصفانہ ، بلاجواز ہے ۔انہوں نے حکام سے مانگ کی ہے کہ دونوں لیڈران کو فوری طور پر رہا کیا جائے ۔

 

 

سرینگر//کمیونسٹ پارٹی آف انڈیا (مارکسسٹ) سیکریٹری غلام نبی ملک نے پی ڈی پی رہنما سرتاج مدنی اور پیرزادہ منصور حسین کی ایک مرکزی ایجنسی کے ذریعے حراست میں لینے کو بلاجوازقرار دیتے ہوئے ان کی فوری رہائی کا مطالبہ کیا۔ایک بیان میں انہوں نے کہا کہ یہ گرفتاریاں ضلع ترقیاتی کونسل انتخابات کے نتائج کے سامنے آنے سے ایک روزقبل عمل میں لائی گئیں جو سراسرسیاسی انتقام گیری ہے ۔انہوں نے کہا کہ جموں کشمیرمیں قانون کے قواعدکی خلاف ورزی کھلے عام کی جارہی ہے.۔

 

 

 

سرینگر// بانڈی پورہ ضلع کے گریزحلقہ کی ضلع ترقیاتی کونسل اُمیدوار ثریا رفیق نے اپنے خاوند فیروزاقبال وانی کے ہمراہ اپنی پارٹی میں شمولیت اختیار کی۔ایک بیان کے مطابق سوموار کوپارٹی کے سرینگر دفتر پرانہوںنے پارٹی صدر سعید محمد الطاف بخاری ، صوبائی صدر کشمیر محمد اشرف میر، پارٹی میڈیا ایڈوائزر فاروق اندرابی اور ریاستی سیکریٹری اور ضلع صدر بڈگام منتظرمحی الدین کی موجودگی میں اپنی پارٹی میں شمولیت اختیار کی۔ اس موقع پر انہوں نے پارٹی کو زمینی سطح پر مضبوط بنانے اور گریز میں لوگوں کو درپیش مشکلات ومسائل کو اِس سیاسی پلیٹ فارم سے اُجاگر کرنے کا عزم کیا۔ ُثریا نے اپنے خیالات کا اظہار کرتے ہوئے کہا،’’ہم نے اپنی مرضی سے سیاست کو بطور پیشہ اختیار کیا ۔ اپنی پارٹی کے ترقیاتی ایجنڈے کا دیگر سیاسی جماعتوں کے ساتھ موازنہ کرنے کے بعد ہم اِس نتیجے پر پہنچے کہ ہم اِس جماعت کے بینر تلے آکر سماجی کام کریں‘‘۔ موصوفہ کے خاوند نے کہاکہ اپنی پارٹی صدر سعید محمد الطاف بخاری کے حقیقت پسندانہ رویہ نے انہیں پارٹی میں شمولیت پر آمادہ کیا۔ انہوں نے مزید کہا،’’اپنی پارٹی میں شمولیت سے قبل ہم نے دیگر روایتی سیاسی جماعتوں کی کارکردگی کا تجزیہ کیا اور محسوس کیا کہ دیگر سیاسی فورم نہ صرف جموں وکشمیر میں غیر یقینی صورتحال کے لئے ذمہ دار ہیں بلکہ وادی گریز کی پسماندگی کی بھی وجہ ہیں‘‘۔ بیان کے مطابق الطاف بخاری نے نئے ساتھیوں کا اپنی پارٹی میں شمولیت پر خیر مقدم کرتے ہوئے کہاکہ اُن کی جماعت جموں وکشمیر کے سبھی خطوں اور ذیلی علاقوں کی یکساں ترقی کے لئے وعدہ بند ہے۔ ادھرضلع گاندربل کے بلاک کنگن سے نوپنچایتی ممبران نے اپنے درجنوں حمایتوں سمیت اپنی پارٹی میں شمولیت اختیار کی۔ پارٹی صدر دفتر لال چوک سرینگر میں منعقدہ تقریب کے دوران شمولیت کرنے والوں میں پنچایت حلقہ چھترگل کے وارڈ نمبر8سے پنچ معراج الدین بٹ، پنچایت حلقہ اڑی گوری پورہ۔ اے کے وارڈ نمبر 3سے پنچ عبدالاحد میر، اسی پنچایت کے وارڈ نمبرایک سے سائمہ بانو، پنچایت حلقہ مار گنڈ کے وارڈ نمبر2سے پنچ شریفہ بانو، اسی پنچایت کے وارڈ نمبر8سے طاہرہ بانو، حلقہ مارگنڈ کے وارڈ نمبر7سے پنچ عبدالمجید بجران، پنچایت حلقہ کچ نمبل کے وارڈ نمبر6سے پنچ منظور احمد سیام کے علاوہ علاقہ کے معروف سیاسی کارکنان منظور احمد گکھڑ اور غلام حسن سیام مارگنڈ قابل ذکر ہیں۔ مذکورہ پنچایتی ممبران کے درجنوں حمایتوں نے بھی اپنی پارٹی میں شمولیت اختیار کی جن کا صوبائی صدر کشمیر نے خیر مقدم کیا۔ نئے شامل ہونے والوں نے کہاکہ اپنی پارٹی کے سماجی۔اقتصادی اور ترقیاتی سے متاثر ہوکر انہوں نے متعلقہ علاقوں میں لوگوح کی بہبودی کے لئے اِس بینر کا انتخاب کیا۔ صوبائی صدر کشمیر محمد اشرف میر نے اِن کا خیر مقدم کرتے ہوئے اُمیدظاہر کی کہ وہ عوامی شکایات کا ازالہ کرنے کے لئے تندہی سے کام کریں گے۔

 

 

 

نئی دہلی//دہلی کی ایک عدالت نے کشمیری علیحدگی پسند رہنماآسیہ اندرابی اوراس کی دوساتھیوں کیخلاف حکومت  ہندکے خلاف جنگ چھیڑنے  اورملک کے ساتھ بغاوت اور سازش کرنے الزامات وضع کرنے کاحکم دیا ہے۔سپیشل جج پروین سنگھ نے حکم دیا کہ آسیہ اور فہمیدہ صوفی اورناہیدہ نسرین کوتعزیرات ہند اورانسدادغیرقانونی سرگرمیوں کے قانون کے تحت مقدمہ چلایا جائے ۔ایف آئی آر کے مطابق اندرابی،فہمیدہ اور نسرین دختران ملت تنظیم چلارہی تھیں جس پر غیرقانونی سرگرمیوں کی روکتھام سے متعلق قانون کے تحت پابندی عائد ہے۔تینوں کواپریل 2018میں گرفتار کیاگیااور اس وقت کو عدالتی تحویل میں ہیں۔ 

 

 

سرینگر//جموں کشمیر میں سوموار کی صبح ایک بار پھر زلزلے کا ایک ہلکا جھٹکا محسوس کیا گیا ہے ۔ محکمہ موسمیات نے اس کی تصدیق کرتے ہوئے بتایا کہ زلزلے کی شدت ریکٹر سکیل پر 3.7ریکار ڈکی گئی تاہم کسی بھی جگہ سے کسی نقصان کی کوئی اطلاع موصول نہیںہوئی ہے ۔ سوموار کی صبح قریب  8 بجکر 33 منٹ پر زلزلہ کے جھٹکے محسوس ہوئے جس کے نتیجے میںلوگوں میں خوف و ہراس کی لہر دوڑ گئی ۔ نیشنل سینٹر فار سسمالوجی  کے مطابق جموں کشمیر میں سوموار کی صبح 8 بجکر 33 منٹ پر زلزلہ آیا۔ اس کی شدت ریکٹر اسکیل پر 3.7 درج کی گئی۔

 

 

سرینگر //پولیس سربراہ دلباغ سنگھ نے دوران سروس فوت ہوئے پولیس اہلکاروں اور ایس پی اوزکے لواحقین کے حق میں 1.25کروڑ روپے کی مالی امدادکو منظوری دی ۔ایک بیان کے مطابق متوفی سب انسپکٹر غلام محمد،ہیڈ کانسٹبل محمدشبیر،غلام محمد، ویرسنگھ، بلبیرسنگھ، اورٹھاکرا سنگھ کے لواحقین کو بیس بیس لاکھ روپے کی خصوصی بہبودی امداددی گئی ۔اس میں سے ان کے کنبوں کو پہلے ہی ایک ایک لاکھ روپے ان کی آخری رسومات کی انجام دہی کیلئے فراہم کی گئی ۔یہ مالی امدادکنٹری بیوٹری پولیس ویلفیئر فنڈ سے مہیا کی گئی ۔پولیس سربراہ نے ایس پی اومنظور احمد کے لواحقین کے حق میں بھی پانچ لاکھ روپے کی امداد کو منظوری دی۔

 

 

 سرینگر//پاکستان نے بھارت پرجنگ بندی معاہدے کی خلاف ورزی کرتے ہوئے حدمتارکہ پرجارحیت کامظاہر ہ کرنے پرشدیداحتجاج کرتے ہوئے اِسے علاقائی امن کیلئے خطرہ قرار دیا ہے۔سی این آئی کے مطابق پاکستانی دفترخارجہ کے ترجمان کے بیان کے مطابق پاکستان نے حدمتارکہ پرجاری اشتعال انگیزیوں پر بھارت کے سینئر سفارتکار کو دفتر خارجہ طلب کرکے شدیداحتجاج کیا۔پاکستانی دفتر خارجہ نے کہا کہ رواں سال بھارت نے جنگ بندی معاہدے کی3003بار خلاف ورزیاں کیں ۔پاکستانی دفتر خارجہ نے الزام لگایا کہ بھارت کی فوج کے حدمتارکہ اور بین الاقوامی سرحد پرشہری آبادی کونشانہ بنارکھا ہے اور بھارتی اشتعال نگیزیوں سے 27بیگناہ شہری ہلاک اور250زخمی ہوگئے۔پاکستان نے بھارت کی مسلسل اشتعال انگیزیوں کو علاقائی امن کیلئے خطرہ قرار دیاہے۔بیان کے مطابق بھارت ایسے ہتھکنڈوں سے کشمیرکی صورتحال سے دنیا کو گمراہ نہیں کرسکتا۔ انہوں نے کہا کہ پاکستان نے بھارتی اشتعال انگیزی کے حوالے سے اقوام متحدہ کے سیکرٹری جنرل اور سلامتی کونسل کو خط لکھاروانہ کیا ہے۔دفترخارجہ کی جانب سے جاری ہونے والے بیان کے مطابق پاکستان نے بھارتی فوج کی جانب سے اقوام متحدہ کے فوجی مبصروں کی گاڑی پر حملے کا معاملہ اقوام متحدہ میں اٹھا یا ہے، بھارتی حملے کا معاملہ اقوام متحدہ میں پاکستان کے مستقل مندوب نے خط کے ذریعے اٹھایا۔

 

 

 سرینگر//پاکستانی ڈرون نے ایک بار پھر بھارتی حدود میں داخل ہونے کی کوشش کی جس دوران بارڈر سیکورٹی فورسز نے ڈرون پر گولیاں چلائی تاہم ڈرون واپس چلا گیا ۔ اس دوران تلاشی مہم کے دوران نزدیک ہی 11گرنیڈوں کوبرآمد کرلیا گیا ہے جن کے بارے میں بتایا جاتا ہے کہ یہ گرنیڈ ڈرون کے زریعے وہاں گرائے گئے ۔سی این آئی کے مطابق پنجاب میں بھارت اور پاکستانی سرحدوں پر ڈرونوں کی دراندازی کے واقعات بڑھ رہے ہیں۔ تازہ واقعہ میں پنجاب کے گرداس پور ضلع میںسوموار کی صبح ایک بار پھر پاکستانی ڈرون طیارے دراندازی کرکے بھارتی حدود میں داخل ہوئے جس دوران وہاں پر تعینات بی ایس ایف اہلکاروں نے ڈرون پر فائرنگ کی تاہم ڈرون وہاں سے واپس پاکستانی طرف چلے گئے ۔ اس دوران جب علاقے میں تلاشی کارروائی شروع کی گئی تو فورسز نے وہاں گیارہ گرنیڈ برآمد کرلئے  ۔ذرائع سے معلوم ہوا ہے کہ HG-84قسم کے مذکورہ گرنیڈ پاکستانی ڈرونوں کے ذریعے وہاں پرگرائے گئے تھے ۔

 

 

سوپور //غلام محمد// حفاظتی فورسز نے سوموار شام سوپور کے علاقے آرم پورہ میں گھرگھرتلاشی کارروائی شروع کی ۔ذرائع کے مطابق فوج کی 22آر آر، جموں وکشمیر پولیس کے اسپیشل آپریشن گروپ اور سی آر پی ایف 179بٹالین کی مشترکہ ٹیم نے آرم پورہ سوپور کے کبو محلہ میں تلاشی آپریشن شروع کیا جس دوران انہوں نے گھر گھر تلاشی لی ۔ایک اعلی پولیس افسر کے مطابق علاقے میں جنگجوئوں کی موجودگی کی اطلاع ملنے کے بعد ہی  تلاشی کارروائی شروع کی گئی ہے ۔آخری اطلاع ملنے تک علاقے میں تلاشی کارروائی جاری تھی ۔

 

 

نئی دہلی//سیکورٹیزاینڈ ایکسچینج بورڈ آف انڈیا کوفیوچر رٹیل لمیٹڈکی طرف سے پیش کی گئی اسکیم کو منظور کرنا ہوگا جہاں تک وہ اسکیم سیکورٹیزاینڈایکسچینج بورڈ آف انڈیا کے قواعد وضوابط کے مطابق ہو۔دہلی ہائی کورٹ نے سوموار کو حکم دیا کہ اسکیم کی منظوری کیلئے سیکورٹیزاینڈ ایکسچینج بورڈ آف انڈیاکی منظوری پر ایمزون کے اعتراضات اب مناسب نہیں ہے.۔فیوچر رٹیل لمیٹڈ بورڈ کے اسکیم اوربزنس کی سیل ریلائنس کو دینے کاریزیولیوشن صحیح اورقواعد کے مطابق ہے اور ایمزون کے دعوئوں کے مطابق خالی نہیں ہے۔ ایزون نے ایف ای ایم اے  اور ایف ڈی آئی کے ضوابط کوتوڑا ہے۔حصہ داروں کے معاہدے میں لکھاہے کہ ایمزون نے ایف آر ایل پر’’کنٹرول‘‘حاصل کیا ہے اور حکومت کی منظوری کے بغیر یہ ایف ای ایم اے اور ایف ڈی آئی ضوابط کے برعکس ہے۔ ایمزون نے ایف آر ایل اور ریلائنس کے خلاف غلط کیا ہے جس پردونوں ایف آر ایل اور ریلائنس کارروائی کرسکتے ہیں۔

 

 

بانڈی پورہ//عازم جان //صدرکوٹ بانڈی پورہ میں اڑھائی ماہ کی دلہن کمرے میںمشتبہ حالت میں مردہ پائی گئی۔پولیس نے لاش کو تحویل میں لیکر قانونی لوازمات پورا کرکے تحقیقات شروع کردی ۔دلہن کے باپ نے پولیس اسٹیشن بانڈی پورہ میں مطالبہ کیا کہ لاش کو میکے والوں کے سپرد کیا جائے۔معلوم ہواہے کہ اڑھائی مہینے قبل عبدلرحمن مٹہ ہانجی ساکن لہروال پورہ بانڈی پورہ کی بیٹی صدر کوٹ پائین میں نظیراحمدکولہوکے بیٹے شبیراحمد کولہوکے ساتھ بیاہی گئی۔لیکن سات روز کے دوران ہی آپسی اَن بن اور چپقلش کی بناپر دلہن میکے چلی گئی اور وہیں تھیں۔بتایا جاتا ہے کہ ڈیڑھ ہفتہ قبل لڑکی کے گھروالوں اور سسرالیوں کے درمیان مفاہمت ہوئی اور لڑکی کو سسرال بھیج دیاگیا۔اس دوران لڑکی کوسوموار صبح کمرے میں مردہ پایاگیا۔ادھر لڑکی کے باپ نے پولیس سے مطالبہ کیا کہ لاش کو میکے والوں کے سپرد کیا جائے تاکہ اس کی تجہیزوتکفین عمل میں لائی جائے۔ ایس ایچ اوبانڈی پورہ نے لڑکی کے گھر والوں کو لاش حاصل کرنے کیلئے اجس پولیس چوکی روانہ کیا۔

 

 

بارہمولہ //فیاض بخاری//جلشیری بارہ مولہ میں محکمہ جل شکتی کی پائپ لائین پھٹ جانے کی وجہ سے پانی جمع ہونے کی وجہ سے سڑک جھیل میں تبدیل ہوگئی ہے اور مقامی لوگوں کو سخت مشکلات کا سامنا ہے۔معلوم ہواہے کہ جلشیری بارہ مولہ کی پانی کی پائپ لائین میں سراخ ہوئے ہیں جن سے پانی خارج ہوکرسڑک پر جمع ہوگیا ہے اورسڑک پرچلنادشوارہوگیا ہے۔مقامی لوگوں نے متعلقہ محکمہ پرالزام عاید کیا ہے کہ وہ پائپ لائین کی مرمت کرنے کی طرف کوئی دھیان نہیں دے رہا ہے ۔بلاک ڈیولپمنٹ کونسل کے نائب چیئرمین اور سرپنچ جلشریری سمیراحمد گیلانی نے بتایا کہ پائپ لائین میں سراخ ہونے کی وجہ سے ان کا بارہ مولہ قصبے سے واحد سڑک رابطہ پانی کی جھیل میں تبدیل ہواہے اور متعلقہ محکمہ پائپ لائین کی مرمت کرنے کی طرف کوئی توجہ نہیں دے رہاہے۔گیلانی نے کہا کہ وادی میں ان دنوں سخت سردی کا موسم ہے اور سڑک پر جمع پانی منجمند ہوا ہے اور لوگ اس پرچل نہیں سکتے جبکہ ٹرانسپورٹروں کو اس سڑک پرگاڑیاں چلانے میں دشواری ہورہی ہے۔انہوں نے کہا کہ جلشیری میں یہ پائپ لائین ڈیڑھ کلومیٹر لمبی ہے اور یہ زیرزمین ہونی چاہیے تھی تاہم یہ پائپ لائین سڑک کے کنارے بچھائی گئی ہے ۔انہوں نے کہا کہ کئی بار متعلقہ محکمہ کواس پائپ لائین کی مرمت کرنے کی درخواست کی گئی لیکن اس پرکوئی غور نہیں کیاگیا۔اس سلسلے میں محکمہ جل شکتی کے ایگزیکیٹوانجینئرعبدالقیوم نے یقین دلایا کہ وہ اس معاملے کو ترجیحی طور دیکھیں گے اورپائپ لائین کی مرمت کا کام جلد ہی شروع کیاجائے گا۔

 

 

سرینگر//بھاجپا کی ترجمان اور سینئر رہنما ڈاکٹر درخشان اندرابی کو ان کی مسلسل سماجی خدمات کے عوض ’ہیومینٹیرین ایکسی لینس ایوارڈ2020‘عطاکیاگیا۔یہ اعزازمختلف شعبوں میں نمایاں کام انجام دینے کیلئے ملک کیااکاون شخصیات کو عطاکیاگیا جن میں  بیس خواتین ،بیس مرداور گیارہ رضاکار تنظیمیں شامل ہیں.۔ورچیول طریقے پر یہ اعزاز ڈاکٹر درخشان اندرابی کو راجیہ سبھا کے رکن شری پردیپ تمتا نے عطا کیا۔ڈاکٹر اندرابی کو یہ اعزاز تشددزدہ جموں کشمیرمیں بلا لحاظ مذہب وملت،رنگ ونسل، سماج کے پسماندہ طبقوں کی خدمت کرنے اور پریشان حال لوگوں تک پہنچنے کیلئے دیاگیا۔ ان کی سماجی خدمات کو اس سے قبل بھی قومی سطح پر متعددتنظیموں اور اداروں نے تسلیم کیا ہے۔اس موقعہ پر گوتم گوروفائونڈیشن کے چیئرپرسن نے کہا کہ ڈاکٹر اندرابی کی سماجی خدمات ہمدردی اور جانبازی کی اورضرورت مندوں کو راحت پہنچانے کی ایک کہانی ہے ۔

 

 

سری نگر//وادی میں سخت سردی کی وجہ سے گرم ملبوسات ،جوتے اور کمروں اور گھروں کو گرم رکھنے والے آلات کی مانگ میں زبردست اضافہ ہوا ہے اور لوگ اقتصادی بدحالی کے باوجود گرم ملبوسات اور گرمی پہنچانے والے آلات کی خریداری کررہے ہیں۔خبررساں ایجنسی جے کے این ایس کے مطابق حالیہ دنوں سردی کی شدت میں اضافہ ہونے کے بعدبیشتر لوگ اپنے آپ اورساتھ ہی گھروں کے کمروں کوگرم رکھنے کے انتظامات کرنے میں لگے ہوئے ہیں ۔بازاروں میں گرم ملبوسات بشمول برف میں پہنے جانے والے مخصوص جوتوں اوربجلی وگیس پرچلنے والے جدیدالیکٹرانک آلات کی مانگ بڑھ گئی ہے اورلوگ بازاروںسے زیادہ تریہی چیزیں اورسامان خریدرہے ہیں ۔گرم ملبوسات بشمول جیکٹ وبنیان،دستانوںوٹوپیوں اورجوتوں کاکاروبار کرنے والے دکانداروں اورچھاپڑی فروشوں نے بتایاکہ لوگ زیادہ ترگرم کپڑے ،جوتے اورگرمی دینے والے الیکٹرانک آلات ہی خریدتے ہیں ۔اُدھر بازاروں میں کانگڑیوں اوران میں ڈالے جانے والے کوئلوں کے علاوہ لکڑیوں والی بخاریوں کی مانگ میں بھی اضافہ ہوا ہے ،اورجولوگ بجلی ،رسوئی گیس یامٹی کے تیل پرچلنے والے الیکٹرانک آلات خریدنے کی استطاعت نہیں رکھتے ہیں ،وہ کانگڑیاںخریدنے کیساتھ ساتھ لکڑیوں پرچلنے والی ٹین کی بخاریاںخریدرہے ہیں۔ کانگڑیوںکوبنانے اوراُن کاکاروبار کرنے والوں نے بتایاکہ بیشتر لوگ کانگڑیاں خریدتے ہیں جبکہ ٹین سے مخصوص قسم کی بخاریاں بنانے والوںنے بتایاکہ ہاں امسال ایسی بخاریوں کی کچھ زیادہ ہی مانگ ہے ،وہ اس کیلئے بجلی کی عدم دستیابی اوراب تیل خاکی سرکاری اسٹوروں سے عام صارفین کوفراہم نہ کئے جانے کوایک وجہ بتاتے ہیں ۔

 

 

 

اشرف چراغ 

 

کپوارہ//نا ظم تعلیمات کشمیر نے شمالی ضلع کپوارہ میں ایک سرکاری مدرس کو درس و تدریس کے کام کاج میں بہترین کارکردگی کیلئے انعام سے نوازا ۔ضلع کے ہندوارہ کے ایک گائو ں کے سرکاری سکول میں تعینات مدرس نذیر احمد ملک کو ناظم تعلیمات نے درس و تدریس کے بہترین کام کاج کے حوالے سے انعام یافتہ افراد کی فہرست میں شامل کیا  ۔نذیر احمد ملک جو زون درگمولہ کے زونل صدر بھی ہے، کو درس و تدیس میں بہتر کار کر دگی پر یہ انعام ملا ہے ،نذیر احمد ملک کو یہ اعزاز بھی حاصل ہے کہ انہو ں نے ڈی ڈی کاشر اور آل انڈیا ریڈیو سرینگر میں ٹیلی کلاس پیش کئے ۔نذیر احمد ملک ایک محنتی مدرس کے نام سے ضلع بھر میں مشہور ہیں ۔

 

 

 

اشرف چراغ 

کپوارہ// کپوارہ ضلع میں سرکاری اسکولوں میں بچوں کو داخل کرانے کے لئے محکمہ تعلیم کی طلبہ کے اندراج کی مہم بڑے پیمانے پر جاری ہے اور اب تک زون لنگیٹ کے سرکاری اسکولوں میں1900نئے طلبہ کا داخلہ سرکاری اسکولوں میں عمل میں لایا گیا ہے جن کے والدین نے اُنہیں نجی اسکولوں سے نکال کر سرکاری اسکولوں میں داخل کیا۔محکمہ تعلیم کے اعلیٰ عہددار نے بتایا کہ ضلع کپوارہ کے تعلیمی زون لنگیٹ میں سرکاری اسکولوںمیں بچوں کے اندراج کے حوالے سے گورنمنٹ ہائی اسکول سوپر ناگہامہ لنگیٹ میں زونل سطح پر ایک شاندار تقریب کا انعقاد کیا گیا جس میں سینکڑوں بچوں کے علاوہ ان کے والدین، سول سوسائٹی سے وابستہ افراد اور زون سے وابستہ اساتذہ اور زونل ریسورسز گروپ کی ٹیم نے شرکت کی ۔  انچارچ زونل ایجوکیشن آفیسر لنگیٹ منظور احمد بٹ نے خبر نگار سے بات کرتے ہوئے بتایا کہ محکمہ نے ایک سماجی بیداری مہم شروع کی ہے جس میںلوگوں کو اس بات کی طرف مائل کیا جارہا ہے کہ وہ اپنے بچوں کا سرکاری اسکولوں میں داخلہ کرائیں کیونکہ سرکاری سکولوں میں طلبہ کو بہتر تعلیم کے ساتھ ساتھ دوسرے فائدے بھی دیئے جاتے ہیں۔ انہوںنے کہاکہ والدین کو اس بات کی طرف راغب کیا جارہا ہے کہ وہ اپنے بچوں کو سرکاری اسکولوں میں ہی تعلیم دیںجبکہ محکمہ تعلیم کا مقصد ہے کہ طلباء کو بہتر سے بہتر تعلیم دی جائے۔ انہوںنے کہاکہ نئی تعلیمی پالیسی کا مقصد تعلیم کے تمام پہلوئوں کی تجدید کرناہے اور تعلیم کو بہترین عالمی میعار کے نزدیک لانا ہے۔انہوںنے کہاکہ تعلیمی پالیسی واضح نظریات و مقاصد پر مبنی ہے۔اس تقریب میں ڈسٹرکٹ پلانگ آفسیر کپوارہ عبدالرشیدمیر، ہیڈ ماسٹر ہائی اسکول سوپر ناگہامہ غلام محی الدین ڈار زونل رسورسز گروپ کے وابستہ الطاف حسین ڈار، منظور احمد میر، ،ریاض احمد ملہ ،رخسار احمد لون اور طاہر احمد بٹ بھی موجود تھے۔بتایا جاتا ہے کہ زون کے مختلف اسکولوںمیں اب تک1900سے زائد بچوں کا داخلہ ہوا ہے جس کی عوامی سطح پر سراہنا کی گئی ہے۔

 

 

 

سید اعجاز 

پانپور//اعلیٰ تعلیم کے کمشنر سیکٹری طلعت پرویز نے گورنمنٹ ڈگری کالج پانپور کا دورہ کر کے یہاں تعلیمی سرگرمیوں اور طلاب کے لئے موجود سہولیات کا جائزہ لیا  ۔دورے کے دوران انہوں نے لائیری  بلاک کا سنگ بنیاد رکھنے کے علاوہ کالج میگزین جاری کیا ۔جموں و کشمیر کے اعلیٰ تعلیم کے کمشنر سیکٹری طلعت پرویزنے سوموار گورنمنٹ ڈگری کالج پانپور کا دورہ کر کے یہاںطلاب کو دستیاب سہولیات اور تعلیمی سرگرمیوں کا جائزہ لیا ۔دورے کے دوران کالج میں ایک تقریب منعقد ہوئی ،جس دوران کالج کی پرنسپل ڈاکٹر سیما ناز نے ادارے کی کارکردگی کی کمشنر سیکٹری کو مکمل جانکاری دی ۔ اس دوران کمشنر سیکریٹری نے یہاں تمام سہولیات کا جائزہ لے کر کالج کی لائبیری کا سنگ بنیاد ررکھااور جم سینٹر کا افتتاح کیا ۔دورے کے بعد میڈیا کے ساتھ بات کرتے ہوئے کمشنر سیکٹری نے بتایا مذکورہ ڈگری کالج میں طلاب کو مہیاسہولیات کی کمی کا اعتراف کرتے ہوئے بتایا کہ یہاں طلباء کیلئے صرف6کمرے موجود ہیں جبکہ لیبارٹری اور لایبریری کی کمی کا سامنا ہے۔انہوں نے بتایا یہاں بنیادی ڈھانچے کی کمی ہے ۔انہوںنے بتایا یہاں4کروڑ روپے کی لاگت سے ایک عمارت تعمیر ہوگی جو محکمہ جون جوالائی میں فراہم کرے گا۔انہوں نے کہاکہ کالج میں لیبارٹریوں کی کمی ہے۔ انہوں نے بتایا کہ پہلے مرحلے میں سرکاریہاں 8لیبارٹریاں بنائے گا جس کے بعد باقی سہولیات بھی تعمیر کئے جائیں گی ۔طلعت پرویزنے بتایا کہ اس کالج کو ایک ماڈل کالج بنانے کے لئے تمام ضروری انتظامات کئے جائیں گے اور پانپور کالج ایک ماڈل کالج کے روپ 2سال کے اندر وجود میں آئے گا۔اس دوران انہوں نے کالج میگزین اور پراسپکٹس کو بھی اجرا کیا ۔