نیوز ڈیسک
سرینگر// ’اپنی پارٹی‘ صدر سید محمد الطاف بخاری نے گوری پورہ عید گاہ میں جمعہ کو ایک عوامی اجتماع سے خطاب کرتے ہوئے کہا کہ کہ روایتی سیاسی جماعتوں، جو جموں کشمیر میں برسوں اور دہائیوں تک مسند اقتدار پر قابض رہیں ، عوام کا معیار زندگی بہتر بنانے میں بری طرح ناکام ہوگئی ہیں، حتی کہ سرینگر جیسے تاریخی شہر کے رہائشی علاقے آج بھی بنیادی سہولیات اور لازمی انفراسٹکچر سے محروم ہیں۔ بخاری نے کہا، “روایتی سیاسی جماعتیں اپنے خصوصی مفادات کے حصول کیلئے عوام کو جذباتی سیاست اور جذباتی نعروں کے ذریعے بہکاتے رہے ہیں”۔
انہوں نے مزید کہا ” ان سیاست دانوں اور خود ساختہ لیڈروں نے اپنے لئے عیش و عشرت کے تمام سامان حاصل کئے ہیں لیکن عوام بالخصوص نوجوانوں کو ان کے بنیادی حقوق تک سے محروم رکھا ہے، یہ ظالمانہ سیاست اب ختم ہوجانی چاہیے تاکہ ہمارے نوجوانوں اور آنے والی نسلوں کا مستقبل بہتر ہو‘‘۔ بخاری نے کہا، “ہم پر یہ ذمہ داری ہے کہ ہم ان کے مستقبل کی فکر کریں اور انہیں وہ تمام مواقعے بہم پہنچائیں، جن کی وجہ سے ان کا مستقبل بہتر ہو۔”اپنی پارٹی صدر نے کہا، “شہر میں تعمیر و ترقی کا فقداں اور انفراسٹکچر کی کمی صاف نظر آتی ہے۔ ایسا لگتا ہے کہ متواتر حکومتیں تاریخی شہر اور یہاں کے لوگوں کو مسلسل نظر انداز کرتی آئی ہیں۔
سیاستدانوں نے اپنے سیاسی مفادات کے حصول کے لئے لوگوں کو بلی کا بکرا بنادیا ہے۔”انہوں نے یقین دہانی کرائی کہ اپنی پارٹی اس منظر کو تبدیل کرتے ہوئے عوام کے تابناک مستقبل یقینی بنانے میں کوئی دقیقہ فروگزاشت نہیں کرے گی۔ انہوں نے کہا، ” ہم عوام کا مزید سیاسی استحصال نہیں ہونے دیں گے۔ تباہی کی سیاست کا خاتمہ لازمی طور پر ہونا چاہیے۔ ہمیں امن اور خوشحالی کی راہ پر چلنے کی ضرورت ہے تاکہ ہمارے نوجوانوں اور آنے والی نسلوں کا مسقبل روشن ہو۔
