عمران خان نے وزیرا عظم عہدہ سنبھالا

اسلام آباد//پاکستان کے22ویں نومنتخب وزیر اعظم عمران خان نے اپنے عہدے کا حلف اٹھالیا۔صدر مملکت ممنون حسین نے وزیر اعظم عمران خان سے ان کے عہدے کا حلف لیا۔تقریب حلف برداری میں نگراں وزیر اعظم جسٹس(ر) ناصر الملک، آرمی چیف جنرل قمر جاوید باجوہ سمیت تینوں مسلح افواج کے سربراہان، غیر ملکی سفیر، 1992 میں عمران خان کے ساتھ کرکٹ کھیلنے والے سابق کھلاڑی، فلم اسٹارز اور بھارت سے آئے مہمان سابق کرکٹر نوجوت سنگھ سدھو بھی شریک ہوئے۔حلف وفاداری کے بعد انہوں نے وزیر اعظم آفس میں اپنا عہدہ سنبھالا جہاں انہیں گارڈ آف آنر پیش کیا گیا۔سہ پہر کو عمران خان نے اپنی 20رکنی کابینہ کا اعلان کیا ۔ شاہ محمود قریشی کو وزیر خارجہ بنایا گیا ہے۔ وزارت داخلہ کا قلمدان عمران خان نے اپنے پاس رکھا جبکہ پرویز خٹک کو وزیر دفاع بنایا گیا ہے۔