نئی دہلی //صدر جمہوریہ عہدہ کے لیے این ڈی اے کے ذریعہ اعلان کردہ امیدوار دروپدی مرمو 24 جون کو اپنا پرچہ نامزدگی داخل کریں گی۔ بی جے پی ان کی نامزدگی پروگرام کو عالیشان بنانے کی تیاری کر رہی ہے۔ یہی وجہ ہے کہ جب وہ نامزدگی کا پرچہ داخل کریں گی تو وزیر اعظم نریندر مودی سمیت بی جے پی کے تمام سرکردہ لیڈران موجود رہ سکتے ہیں۔دروپدی مرمو کی نامزدگی کے دوران پی ایم مودی، بی جے پی صدر جے پی نڈا، وزیر داخلہ امت شاہ اور وزیر دفاع راجناتھ سنگھ سمیت بی جے پی پارلیمانی بورڈ کے وہ سبھی اراکین موجود رہیں گے جنھوں نے منگل کی میٹنگ میں اتفاق رائے سے مرمو کو بی جے پی طرف سے صدر جمہوریہ کا امیدوار منتخب کیا تھا۔ بتایا جا رہا ہے کہ دروپدی مرمو کی نامزدگی کے دوران مودی حکومت کے کئی مرکزی وزراء ، بی جے پی کے مشہور لیڈر اور بی جے پی حکمراں ریاستوں کے وزرائے اعلیٰ بھی موجود رہیں گے۔اپوزیشن پارٹیاں پہلے ہی یشونت سنہا کو اپنا مشترکہ امیدوار طے کر چکی ہیں۔ حالانکہ نوین پٹنایک اور نتیش کمار کی حمایت دینے کے اعلان کے بعد صدر جمہوریہ انتخاب سے متعلق نمبر گیم دروپدی مرمو کے حق میں جاتا ہوا دکھائی پڑ رہا ہے۔ مرمو اگر یہ انتخاب جیتتی ہیں تو وہ صدر جمہوریہ بننے والی پہلی قبائلی خاتون ہوں گی۔
کونسلر سے صدارتی امیدوار تک
نئی دہلی //مورمو 20 جون 1958 کو اڈیشہ کے میور بھنج ضلع میں پیدا ہوئیں۔ایک انتہائی پسماندہ اور دور دراز ضلع سے تعلق رکھنے والی مورمو نے غربت اور دیگر مسائل سے لڑتے ہوئے بھونیشور کے رام دیوی ویمنس کالج سے آرٹس میں گریجویشن کیا اور اڑیسہ حکومت کے محکمہ آبپاشی اور بجلی میں جونیئر اسسٹنٹ کے طور پر اپنے کیریئر کا آغاز کیا۔سنتھل برادری سے تعلق رکھنے والی مورمو نے 1997 میں رائرنگ پور نگر پنچایت میں کونسلر کے طور پر اپنے سیاسی کیریئر کا آغاز کیا۔ بعد میں وہ رائرنگ پور نیشنل ایڈوائزری کونسل کی نائب صدر بن گئیں۔2013 میں، وہ پارٹی کے ایس ٹی مورچہ کی قومی ایگزیکٹو ممبر کے عہدے تک پہنچ گئیں۔ دروپدی مورمو اوڑیسہ میں بھارتیہ جنتا پارٹی اور بیجو جنتا دل کی مخلوط حکومت کے دوران تجارت اور نقل و حمل کے لیے آزادانہ چارج کے ساتھ ماہی پروری اور جانوروں کے وسائل کی ترقی کی وزیر مملکت تھیں۔مورمو کی شادی شیام چرن مورمو سے ہوئی تھی اور ان کے تین بچے تھے – دو بیٹے اور ایک بیٹی۔ مورمو کی زندگی ذاتی سانحات سے بھری ہوئی ہے کیونکہ انہوں نے اپنے شوہر اور دونوں بیٹوں کو کھو دیا ہے۔ ان کی بیٹی اتشری کی شادی گنیش ہیمبرم سے ہوئی ہے۔وہ سال 2000 اور 2004 میں اڈیشہ کے رائرنگ پور اسمبلی حلقہ سے ایم ایل اے تھیں۔ وہ 2015 میں جھارکھنڈ کی گورنر کے طور پر حلف لینے والی پہلی خاتون تھیں۔ وہ پہلی خاتون قبائلی رہنما ہیں جنہیں گورنر مقرر کیا گیا۔ منتخب ہونے کے بعد دروپدی مورمو ہندوستان کی پہلی قبائلی صدر اور دوسری خاتون صدر ہوں گی۔ اس کے علاوہ وہ اڑیسہ سے پہلی صدر بھی ہوں گی۔ انہوں نے تقریباً دو دہائیاں سیاست اور سماجی خدمت میں گزاری ہیں۔
