عظمیٰ نیوز سروس
سرینگر// سینٹرل انڈسٹریل سیکورٹی فورس(سی آئی ایس ایف)نے جموں و کشمیر کی دو سب سے محفوظ سینٹرل جیلوں کی سیکورٹی سنبھال لی ہے۔یہ پیشرفت تقریبا ًتین سال بعد ہوئی ہے جب سی آئی ایس ایف نے جموں اور سرینگر کے ہوائی اڈوں کی سیکورٹی جموں و کشمیر پولیس سے سنبھال لی ہے۔ایکس پر ایک پوسٹ میں، سی آئی ایس ایف نے کہا کہ اسے سرینگر جیل کو محفوظ بنانے، ہر وقت مضبوط اور چوکس حفاظتی موجودگی کو یقینی بنانے پر بہت فخر ہے۔پوسٹ میں کہا گیا ہے”ہمارے اہلکار اس اہم ادارے کی حفاظت کے لیے پیشہ ورانہ مہارت کے اعلی ترین معیارات کے ساتھ کام کرتے ہیں،” ۔سی آئی ایس ایف، جو عام طور پر مرکزی حکومت کے دفاتر، ہوائی اڈوں، بندرگاہوں، میٹرو سہولیات، اور کچھ صنعتی یونٹوں کی حفاظت کے لیے ذمہ دار ہوتی ہے، نے اب دو ہائی سیکورٹی جیلوںسرینگر سینٹرل جیل اور سینٹرل جیل جموں، کوٹ بھلوال کا چارج سنبھال لیا ہے۔دو حساس جیلوں میں کئی ملی ٹینٹ اور دیگر مجرم ہیں۔ دونوں جیلوں میں ایک اندازے کے مطابق 1400 سے زیادہ قیدی ہیں۔جہاں سی آئی ایس ایف دونوں جیلوں کو سیکورٹی فراہم کرتا ہے، وہیں سینٹرل ریزرو پولیس فورس (سی آر پی ایف)جیل کے بیرونی حصے کو محفوظ بنانا جاری رکھے گی۔ایک افسر نے کہاہاں، دونوں جیلوں کی چوبیس گھنٹے حفاظت کی ذمہ داری سی آئی ایس ایف کی ہے، ۔ “جموں و کشمیر میں مزید جیلوں کی سیکورٹی سنبھالنے پر غور کیا جا رہا ہے۔”اس وقت جموں و کشمیر میں 14 فعال جیلیں ہیں، جن میں دو سینٹرل جیل، 10 ڈسٹرکٹ جیل، ایک خصوصی جیل اور ایک سب جیل شامل ہیں۔ 3629 قیدیوں کی گنجائش کے مقابلے جموں و کشمیر جیل خانہ جات 5300 سے زیادہ قیدیوں کو جگہ دے رہا ہے۔
