عظمیٰ نیوز سروس
سرینگر// پردیش کانگریس کمیٹی کے صدر اور مرکزی شالٹنگ کے رکن اسمبلی طارق حمید قرہ نے پیر کے روز اپنے حلقے کا تفصیلی دورہ کیا تاکہ ترقیاتی صورتحال کا جائزہ لیا جا سکے اور عوامی شکایات کو سنا جا سکے۔دورے کے دوران قرہ نے مختلف محکموں کے متعلقہ افسران کے ساتھ موقع پر ہی میٹنگ کی اور انہیں ہدایت دی کہ عوامی مسائل، خاص طور پر نشیبی اور سیلاب زدہ علاقوں سے متعلق معاملات پر فوری اور مؤثر کارروائی کی جائے۔ انہوں نے زور دیا کہ ترقیاتی کاموں کو ترجیحی بنیادوں پر مکمل کیا جائے تاکہ خراب موسم کے دوران عوام کو مشکلات کا سامنا نہ کرنا پڑے۔کانگریس رہنما نے خاص طور پر بمنہ اور اس سے ملحقہ علاقوں میں ناقص نکاسی آب اور پانی جمع ہونے کے مسائل پر تشویش کا اظہار کیا۔ انہوں نے انتظامیہ پر زور دیا کہ وہ کسی بھی ہنگامی صورتحال کے لیے تیار رہے اور سیلابی انتظامات، سڑکوں کی مرمت اور نکاسی آب کی بحالی جیسے کاموں کو موسمِ سرما سے قبل ترجیح دی جائے۔ انہوں نے مقامی لوگوں سے بھی ملاقات کی، جنہوں نے انہیں روزمرہ کی مشکلات سے آگاہ کیا اور بروقت حل کی اپیل کی۔
