سیاحتی مقامات کیلئے ہیلی کاپٹر سروس آزمائشی طور شروع کرنے پرغور:بصیرخان

سری نگر//جموںوکشمیر میں سیاحتی شعبے کے لئے دونوں خطوں میں ہیلی کاپٹر سروس شروع کرنے سے اس شعبے کی سہولیات کو بڑے پیمانے پر فروغ حاصل ہوگا۔حکومت نے یوٹی میں سیاحت کو فروغ دینے کے لئے کچھ سیاحتی مقامات پر ائیر سفاری اور ائیر سواریوں کا آغاز کر نے کا بھی فیصلہ لیا ہے جس میں ڈل جھیل اور اس سے ملحقہ علاقوں میں سواری شامل ہے۔اِس بات کا اظہار لیفٹیننٹ گورنر کے مشیر بصیر احمد خان نے  یہاں سول سیکرٹریٹ میں ایک میٹنگ کی صدارت کرنے کے دوران کیا۔میٹنگ میں کمشنر سول ایو ی ایشن ، سیکرٹری سیاحت ، منیجنگ ڈائریکٹر جے کے ٹی ڈی سی ، ڈائریکٹر ٹوراِزم کشمیر اور ڈائریکٹر فائنانس سول ایو ی ایشن نے شر کت کی۔دورانِ میٹنگ مشیر موصوف نے کہا کہ اِس اقدام سے جموں وکشمیر میں سیاحت کو فروغ ملے گا اور دوروں پر آئے سیاحوں کی دلچسپی میں مزید اضافہ ہوگا۔ اُنہوں نے مزید کہا کہ محکمہ اہم مقامات کے مابین روابط استوار کرنے اور زیادہ سیاحوں کو راغب کرنے کے لئے ہیلی کاپٹر خدمات پر غور کر رہا ہے ۔ مشیر موصوف نے اَفسران کو ہدایت دی کہ وہ جموں کے علاوہ کشمیر کے بھی کچھ سیاحتی مقامات کی نشاندہی کریں تاکہ ہیلی کاپٹر خدمات آزمائشی بنیاد پر شروع کی جاسکیں۔جموں وکشمیر کے دونوں صوبوں سے ہیلی کاپٹر خدمات متعارف کرنے کے لئے بہت ساری جگہیں زیر بحث آئیں۔مشیر بصیر خان نے اَفسران کو ہدایت دی کہ اِس مقصد کے لئے درکا بنیادی ڈھانچے اور اَفرادی قوت کے حوالے سے مناسب بنیاد پر کام کریں۔اُنہوں نے جموںوکشمیر کے ناظمین کو ہدایت دی کہ وہ ہیلی کاپٹر خدمات اور مقامات کے بارے میں تفصیلات تیار کریں۔اُنہوں نے کہا کہ پوری مشق کا مقصد جموںوکشمیر میں سفر اور سیاحتی شعبے میں تبدیلی لانا ہے اور دُور دراز مقامات پر سیاحوں کی نئی منزلیں کھولیں گے ۔مشیر موصوف نے کہا کہ اِس سلسلے میں لیفٹیننٹ گورنر نے پہلے ہی ہیلی کاپٹر خدمات کے لئے سیاحتی مقامات کی نقشہ سازی کے لئے منظور ی دے دی ہیں۔